ഞാന്‍ കണ്ട ലോകം

ഒരു ആഫ്രിക്കന്‍ സഫാരി

2011-10-11T22:37:00.000-07:00

കുട്ടികളുടെ ബഹളമില്ലാതെ ഞങ്ങളുടെ ദിവസങ്ങള്‍ പലതും വിരസമായിരുന്നു. ഉണ്ണിയും,ധനുവും കൃസ്തുമസ്സ് ഒഴിവുകാലത്ത് വരുന്നു എന്നറിഞ്ഞപ്പോള്‍ ഞങ്ങള്‍ സന്തുഷ്ടരായി. മൂന്നുമാസം മുന്നേതന്നെ ഒരുക്കങ്ങള്‍ തുടങ്ങി.അവര്‍ക്കിഷ്ടപ്പെട്ട അച്ചാറുകളും, പലഹാരങ്ങളും ഒരുക്കി ഞാന്‍ ദിവസങ്ങള്‍ എണ്ണി.

2008 ജനുവരിയിലാണ് അവര്‍ ആദ്യമായി കെനിയായില്‍ വന്നത്.ഇവിടെത്തെ ഇലക്ഷന്‍ കഴിഞ്ഞ് ആര് പ്രസിഡെണ്ടാവണം എന്ന ചേരി തിരിഞ്ഞുള്ള കലാപം നടക്കുന്ന കാലം. ഹിംസയും തീവെപ്പും നാടാകെ. പുറത്തിറങ്ങാതെ ഞങ്ങള്‍ രണ്ടാഴ്ച്ച കഴിച്ചുകൂട്ടി.. ഇപ്പോള്‍ അന്തരീക്ഷം ശാന്തമാണ്. coalition government ഉണ്ടാക്കി രണ്ട് ഗ്രൂപ്പും രമ്യതയിലെത്തി. അതിനാല്‍ ഈ തവണ വെക്കേഷന്‍ കേമമായി ആഘോഷിക്കാന്‍ തീരുമാനിച്ചു. പോകേണ്ട സ്ഥലങ്ങള്‍ മുന്നേ തീരുമാനിച്ചു. ലോകപ്രസിദ്ധമായ മസായ്-മാര ഗേയിം പാര്‍ക്കും, വെള്ളമണല്‍ വിരിച്ച അതി മനോഹരമായ ഡയാനി ബീച്ചും സന്ദര്‍ശിക്കാന്‍ ഹോളിഡേ പാക്കേജ് ബുക്ക് ചെയ്തു.

എന്റെ ഹോളിഡേ പ്ലാനുകള്‍ കേട്ട് കുട്ടികള്‍ വളരെ ആവേശഭരിതരായി.കനഡായിലെ തിരക്ക് പിടിച്ച ജീവിതരീതിയില്‍ നിന്ന് തികച്ചും വ്യത്യസ്തമായ, അലസമായ, രാജകീയമായ,നെയ് റോബി [കെനിയായുടെ തലസ്ഥാനം] ജീവിതവും സുഖമുള്ള തണുത്ത കാലാവസ്ഥയും അവര്‍ക്ക് വളരെ ഇഷ്ടപ്പെട്ടു.അവരുടെ പാട്ടും,ബഹളവും ഉറങ്ങികിടന്നിരുന്ന ഞങ്ങളുടെ വീടിനെ ഉണര്‍ത്തി.

ഡിസംബര്‍ 28ന് ഞങ്ങള്‍ നേരത്തെ ഉണര്‍ന്ന് മസായ്-മാര യാത്രക്കൊരുങ്ങി. പുലര്‍ച്ചെ 6മണിക്ക് ഞങ്ങള്‍ക്ക് പോകാനുള്ള വാന്‍ എത്തി. 8 സീറ്റുകള്‍ ഉള്ള, മുകള്‍വശം തുറക്കാന്‍ സൌകര്യമുള്ള വാന്‍. ഉള്ളില്‍ Wireless radio system ഉണ്ട്. കാട്ടിലെങ്ങാനും കുടുങ്ങിപോയാല്‍ സമ്പര്‍ക്കം പുലര്‍ത്താനും, മൃഗങ്ങള്‍ എവിടെയുണ്ടെന്ന വിവരങ്ങള്‍ അറിയുവാനും ഇത് ഉപകരിക്കും.മൃഗങ്ങളെ കണ്ടാല്‍ ഡ്രൈവര്‍മാര്‍ അന്യോന്യം സമ്പര്‍ക്കം പുലര്‍ത്തുന്നത് ഇതിലൂടെയാണ്. അജാനബാഹുവായ ഞങ്ങളുടെ ഡ്രൈവര്‍-കം-ഗൈഡ് , ബെന്‍സെന്‍ ഹൈ സ്പിരിറ്റില്‍ ആണ്.

നെയ് റോബിയില്‍ നിന്ന് 7 മണിക്കൂര്‍ എടുക്കും മസായ്-മാരയിലെത്താന്‍. വഴിയുടെ ഇരുവശത്തും കുന്നും താഴ്വരകളും,സൈസാല്‍ തോട്ടങ്ങളുമാണ്. സൈസാല്‍ കൈത പോലെയാണ്. ഇതിന്റെ ഇല ചീന്തി കുട്ട, ബാഗ് , പല തരം അലങ്കാരവസ്തുക്കള്‍ ഉണ്ടാക്കി വരുന്നു. വഴിയില്‍ നിര്‍ത്തി കൊണ്ടുവന്ന ബ്രേയ്ക്ക് ഫാസ്റ്റ് കഴിച്ചു.

ഞങ്ങള്‍ മൂന്ന് വര്‍ഷം മുന്നെ നടത്തിയ സാഹസികമായ മസായ്-മാര ട്രിപ്പ് എന്റെ ഓര്‍മ്മയിലെത്തി. അന്ന് ,രാത്രി ടെന്റിന് പുറത്ത് ഹിപ്പോവിന്റെ ശബ്ദം കേട്ട് സിംഹമാണെന്ന് കരുതി പേടിച്ച് വിറച്ചതും, നിര്‍ത്താതെ പെയ്ത മഴയില്‍ മാര നദി നിറഞ്ഞൊഴുകിയപ്പോള്‍ ഞങ്ങളുടെ വാന്‍ നദി മറികടക്കാനാവാതെ [പാലമില്ലാത്തതിനാല്‍] കാട്ടില്‍ കുടുങ്ങി പോയതും,മസായികള്‍ [മസായ്-മാരയിലും ചുറ്റുപാടും താമസിക്കുന്ന വര്‍ഗ്ഗക്കാര്‍]] വന്ന് വന്യമൃഗങ്ങളില്‍ നിന്ന് ഞങ്ങളെ സംരക്ഷിക്കാനായി വാനിന്റെ അടുത്ത് തീയിട്ട് രാത്രി കാവലിരുന്നതും ഇന്നലെ കണ്ട ഒരു ദു:സ്വപ്നം പോലെ തോന്നി. അതിനാല്‍ ഈ തവണ നദിയുടെ മറുവശത്തുള്ള മാര-സിംബ [സിംബ=സിംഹം] എന്ന ഹോട്ടലാണ് ഞങ്ങള്‍ തിരഞ്ഞെടുത്തത്.

മസായ്

2008 ലെ മസായ്-മാര യാത്രയില്‍ നദി കടക്കുന്ന ചിത്രം

ഏതാണ്ട് മൂന്ന് മണിക്കൂര്‍ കഴിഞ്ഞപ്പോള്‍ മനോഹരമായ rift valleyയില്‍ എത്തി. അഗ്നി പര്‍വ്വതം പൊട്ടി ഭൂമി പിളര്‍ന്നുണ്ടായ ഈ വാലിയില്‍ hot water springs അവിടെയിവിടെയായുണ്ട്.6000മൈല്‍ നീണ്ട ആഫ്രിക്കന്‍ റിഫ്റ്റ് വാലി,വടക്ക് ലെബനോനില്‍ നിന്ന് തുടങ്ങി തെക്ക് മൊസാമ്പിക്ക് വരെ നീണ്ടു കിടക്കുന്നു. റിഫ്റ്റ് വാലി വ്യൂ പോയിന്റില്‍ നിന്ന് ഞങ്ങള്‍ കുറച്ച് ചിത്രങ്ങള്‍ എടുത്തു.

ഇരുവശത്തും കുറേ ക്യൂരിയോ ഷോപ്പുകളാണ്. മരം കൊണ്ടും തോലു കൊണ്ടും വിവിധ തരം മാസ്കുകള്‍, ചെണ്ട, കറുത്ത എബൊണി മരത്തില്‍ കടഞ്ഞെടുത്ത മനോഹരമായ മാന്‍, ജിരാഫ്, ഹിപ്പോ, ആന.....സോപ്പ്-സ്റ്റോണില്‍ നിര്‍മ്മിച്ച ശില്‍പങ്ങള്‍, പ്ലെയ്റ്റ്സ്.....പലനിറത്തിലുള്ള കല്ലുകള്‍ മിനുക്കി കോര്‍ത്തിണക്കിയ മാലകള്‍......

Rift valley view-point

Rift valley

Curio shop

ഒരുമണിയോടെ ഞങ്ങള്‍ മാര-സിംബയില്‍ എത്തിച്ചേര്‍ന്നു. വളരെ Eco-friendly ആയ ഹോട്ടല്‍. കാടിന് നടുവില്‍ മരങ്ങള്‍ അധികം നശിപ്പിക്കാതെ ഓലയും മരവും ഉപയോഗിച്ച് പണിതീര്‍ത്ത 30ഓളം കോട്ടേജുകള്‍. എല്ലാ സൌകര്യങ്ങളും ഉള്ള മനോഹരമായി അലങ്കരിച്ച മുറികള്‍.

ഒഴിവുകാലമായതിനാല്‍ വിനോദസഞ്ചാരികളാല്‍ നിറഞ്ഞിരിക്കുന്നു.ഉച്ചഭക്ഷണത്തിനായി താഴേക്കിറങ്ങി മരങ്ങള്‍ക്കിടയിലൂടെയുള്ള നടപ്പാതയിലൂടെ നടന്നു. അപ്പോള്‍ കൌതുകകരമായ ഒരു കാഴ്ച കണ്ടു. കുറേ ബബൂണുകള്‍ [വളരെ വലിയ കുരങ്ങന്മാര്‍] വരി വരിയായി നടന്നു പോകുന്നു. കുട്ടിക്കുരങ്ങന്മാര്‍ അച്ഛ്നമ്മമാരുടെ പുറത്താണ് സവാരി.

Reception-Mara-Simba

Mara-Simba Cottage

cottage-roomന് മുന്നില്‍

Outside the Cottage

റെസ്റ്റോറെണ്ട്, ചുറ്റും തുറന്ന വിസ്താരമുള്ളതാണ്. ഇന്ത്യന്‍ ഡിഷസുകളടക്കം പലതരം വിഭവങ്ങള്‍ നിറഞ്ഞ buffet lunch. ഇന്ത്യയില്‍ നിന്ന് വിനോദയാത്രക്ക് വന്ന പലരേയും കാണാന്‍ കഴിഞ്ഞു. റെസ്റ്റോറെന്റിന്റെ തൊട്ട് താഴെ വീതികുറഞ്ഞ ഒരു നദിയാണ്.[അധികം വെള്ളമില്ലാത്തതിനാല്‍ എനിക്ക് അത് ചെളി കെട്ടികിടക്കുന്ന ഒരു കനാലായാണ് തോന്നിയത്] അതില്‍ നിറയെ ഹിപ്പോപൊട്ടാമസ്സ്. അച്ഛനും അമ്മയും കുട്ടികളും അടങ്ങുന്ന ഹിപ്പോ കുടുംബം ഇടക്കിടെ പുറത്ത് വന്ന് വെയില്‍ കായുന്ന കാഴ്ച കാണേണ്ടതു തന്നെ. മരച്ചില്ലകളില്‍ നിറയെ കലപില കൂട്ടുന്ന മഞ്ഞകിളികളും കൂടുകളും.

റെസ്റ്റോറെണ്ടിന്റെ താഴെ കാണുന്ന കാഴ്ച

ഭക്ഷണത്തിനു ശേഷം വിശ്രമിക്കാനായി മുറിയിലേക്ക് തിരിച്ചു.റൂമിന്റെ അടുത്തുള്ള മരത്തിന് കീഴില്‍ 50തോളം കീരികളും കുട്ടികളും. വൈകിയിട്ട് 4-6വരേയാണ് ഇന്നത്തെ ഗെയിം ഡ്രൈവ് [മൃഗങ്ങളെ കാണാന്‍ മസായ്-മാര നാഷണല്‍ പാര്‍ക്കിലേക്ക്]. പാര്‍ക്ക് എന്നാല്‍ 1500km2 വിസ്താരമുള്ള savanna grass land [പുല്‍മേട്ടില്‍ അവിടെയിവിടെയായി ചെറിയ മരങ്ങള്‍] ആണ്.അതിനാല്‍ മൃഗങ്ങളെ കാണാന്‍ എളുപ്പമാണ്.

ഗെയിം ഡ്രൈവ്

പാര്‍ക്കിലേക്ക് കടക്കാന്‍ ടിക്കറ്റ് എടുത്തു. big-fiveനെ [ആന,സിംഹം,റൈനൊ,പുള്ളിപുലി,കാട്ട്പോത്ത്] കാണിച്ച് തരണമെന്ന് ഞങ്ങള്‍ ബെന്‍സനോട് ആവശ്യപ്പെട്ടു.

ജിറാഫും,സീബ്രയും,പല തരം മാനുകളും[impala,gazelle,black-buck,dik-dik,toppy..] കാട്ടുപന്നിയും, ഹൈനയും പുല്‍മേട്ടില്‍ ഉടനീളം ധാരാളമുണ്ട്. വണ്ടികള്‍കണ്ട് അവര്‍ ഒന്ന് തലപൊക്കി നോക്കുക പോലും ചെയ്യുന്നില്ല.ഇത് അവര്‍ക്ക് നിത്യ സംഭവമാണല്ലോ.

Hard Beasts

വഴി മുറിച്ച് കടക്കുന്ന ആനകൂട്ടങ്ങള്‍ക്കായി ബെന്‍സന്‍ വണ്ടി നിര്‍ത്തി.ആനക്കുട്ടികളുടെ കൂടെയാണെങ്കില്‍ അവര്‍ അക്രമാസക്തരാവും. വലിയ പരന്ന ചെവികളുള്ള ആഫ്രിക്കന്‍ ആനക്കൂട്ടങ്ങള്‍ ചിഹ്നം വിളിയും, മണ്ണുകുത്തലും ഒക്കെയായി ചുറ്റുവട്ടത്ത് നിറയെയുണ്ട് . mds പേടിച്ച് വേഗം വണ്ടി സ്റ്റാര്‍ട്ട് ചെയ്യാന്‍ പറഞ്ഞു. ബെന്‍സന്‍, ‘ഞാനില്ലേ’ എന്ന് പറഞ്ഞ് ചിരിക്കുന്നുണ്ട്. കുട്ടികള്‍ ഫോട്ടോ എടുക്കുന്ന തിരക്കിലാണ്.

റോഡ് മുറിച്ച് കടക്കുന്ന ആനകുടുംബം

ഞങ്ങളുടെ വാനിന്റെ ടയര്‍ ഒരു ചാലില്‍ പെട്ടെന്ന് കുരുങ്ങി പോയി. പുറത്തിറങ്ങി ശരിയാക്കാമെന്ന് വെച്ചാല്‍ സിംഹക്കൂട്ടത്തിന് വിരുന്നാവും.10 അടി അകലെ 4 സിംഹങ്ങളും 10ല്‍ പരം കുട്ടികളും - ഉറക്കം തൂങ്ങിയിരിക്കുന്ന അമ്മമാരുടെ അടുത്തായി ,സിംഹക്കുട്ടികള്‍ പൂച്ചക്കുട്ടികളെ പോലെ കടിപിടികൂടിയും സമ്മര്‍സോല്‍ട്ട് അടിച്ചും കളിക്കുന്നുണ്ട്. കുറേ നേരത്തെ പരിശ്രമത്തിന് ശേഷം ടയല്‍ പുറത്ത് വന്നു.ഹാവൂ.ആശ്വാസമായി.

പോക്ക് വെയില്‍ കൊള്ളുന്ന അമ്മമാരും മക്കളും

നേരം പോയതിനാല്‍ ഇനി ഗെയിം ഡ്രൈവ് നാളെ വെളുപ്പിനാണ്. രാത്രി ഹോട്ടലില്‍ മസായ് ഡാന്‍സ് ഉണ്ടായിരുന്നു. പെട്ടെന്ന് ഡൈനിങ്ങ് ഹാളിലെ ലൈറ്റുകള്‍ അണഞ്ഞു..പാട്ടും ചെണ്ടമേളവും ആയി നൃത്തം ചെയ്ത്കൊണ്ട് chefഉം, സഹായികളും കേയ്ക്കും മെഴുകുതിരികളുമായി പല മേശകളും ചുറ്റി. ഞങ്ങളും ആ ആഘോഷത്തില്‍ പങ്ക് കൊണ്ടു. ഒരു അതിഥിയുടെ പിറന്നാള്‍ ആഘോഷം ആണെത്രെ.

Restaurant

കാലത്ത് 6 മണിക്ക് ഉണര്‍ന്ന് മോണിങ്ങ് ഡൈവിന് തയ്യാറായി. ചായ കുടിക്കാന്‍ റെസ്റ്റോറെണ്ടില്‍ ചെന്നപ്പോള്‍ പുറം മതിലില്‍ ഒരു കറുത്ത കുരങ്ങന്‍ ഇരിക്കുന്നുണ്ട്. ഞാന്‍ മേശക്കടുത്തിരുന്ന് അതിനെ -come,come...എന്ന് വിളിക്കേണ്ട താമസം അവന്‍ ഓടി എന്റെ അടുത്തെത്തി.ഞാന്‍ ജീവനും കൊണ്ടോടി.ഹിഹി. വെള്ളക്കാര്‍ ധാരാളം വരുന്നതിനാലാവാം ഈ കുരങ്ങന് ഇംഗ്ലീഷ് അറിയുന്നത്.

തണുത്ത പ്രഭാതത്തില്‍ മഞ്ഞിന്‍ കണങ്ങള്‍ തങ്ങി നില്‍ക്കുന്ന പുല്‍മേട് കൂടുതല്‍ ഉന്മേഷം നല്‍കി.പുല്ല് അയവിറക്കി നില്‍ക്കുന്ന കാട്ടുപോത്തിന്‍ കൂട്ടങ്ങള്‍. അവരുടെ മുതുകില്‍ സല്ലാപം നടത്തുന്ന സുന്ദരികളായ കുഞ്ഞിക്കിളികള്‍. റോഡരികത്ത് നിറയെ ഗിനി പക്ഷികള്‍. അതിമനോഹരമായ സ്വര്‍ണ്ണകിരീടധാരികളായ gold-crown birds. മണ്‍കൂനക്ക് മുകളിലിരുന്ന് പാടുന്ന മഞ്ഞക്കാലുള്ള ചേതോഹരമായ വിവിധവര്‍ണ്ണപക്ഷി. നിണ്ടകാലുകളുള്ള ,കരുത്തരായ , ഒട്ടകപക്ഷികള്‍.

Wild Buffalo

gold-crown bird

ഒട്ടകപക്ഷികള്‍

പെട്ടെന്ന് ബെന്‍സന്‍ വാന്‍ നിര്‍ത്തി.മുന്നിലെ റോഡില്‍ ഒരു പെണ്‍സിംഹം കിടക്കുന്നു .വാഹനത്തിന്റെ ഒച്ചയൊന്നും കൂസാതെ ഞങ്ങളെ വഴിമുടക്കിയ, അതൊന്ന് അവിടേനിന്ന് എഴുന്നേല്‍ക്കാന്‍ ക്ഷമയോടെ ഞങ്ങള്‍ കാത്ത് നിന്നു.

വഴിയില്‍ കിടക്കുന്ന സിംഹം

മൃഷ്ടാനഭോജനം കഴിഞ്ഞാണെന്ന് തോന്നുന്നു സിംഹരാജന്‍ ഒറ്റക്ക് തണലത്ത് പള്ളിയുറങ്ങുന്നുണ്ട്.പതിയിരിക്കുന്ന ആപത്ത് അറിയാതെ പുല്‍മേട്ടില്‍ മേഞ്ഞു നടക്കുന്ന സൌമ്യമായ മാന്‍ പേടകള്‍.

Gazelle

ചിത്രകാരന്‍ ചായം ചാലിച്ച് വരച്ചത്പോലെ മനോഹരമായ കറുത്ത വരകളുള്ള തടിച്ച് കൊഴുത്ത സീബ്രാകള്‍.പ്രൌഡിയില്‍ തലയുയര്‍ത്തി അകേഷ്യ മരങ്ങളുടെ ഇലയും,മുള്ളും തിന്നുന്ന ജിറാഫുകള്‍. ഇതിനിടയില്‍ ശീഘ്രത്തില്‍ ഓടുന്ന പൂവാലുള്ള സൂത്രക്കാരായ കുറുക്കന്മാര്‍.ചെറിയ വാല്‍ മേല്‍പ്പോട്ട് പൊക്കി ഓടുന്ന കാട്ടുപന്നികള്‍. അവിടെയിവിടെയായി അലഞ്ഞു തിരിയുന്ന തീരെ ഭംഗിയില്ലാത്ത ഹൈന [കഴുതപുലി].ഗര്‍വ്വോടെ നടക്കുന്ന കമനീയമായ പുള്ളികളുള്ള നീണ്ടു നിവര്‍ന്ന ചെമ്പുലി [cheetah].

Cheetah

മരങ്ങള്‍ക്കിടയില്‍ നിന്ന് ഇറങ്ങി വന്ന double horned black rhino കുടുംബത്തെ ശ്വാസമടക്കി ഞങ്ങള്‍ കണ്ടു നിന്നു.അമ്മയുടെ പിന്നാലെ കുട്ടി റൈനൊ. കുഞ്ഞിന്റെ പുറകില്‍ ബോഡിഗാര്‍ഡ് പോലെ പിന്തുടരുന്ന കറുത്തു തടിച്ച male rhino ഇടക്കിടക്ക് വാഹനങ്ങള്‍ നോക്കി ദേഷ്യത്തില്‍ മുരളുന്നുണ്ട്.കാട്ടില്‍ നിന്നിറങ്ങി വന്ന അവര്‍ ഞങ്ങളുടെ മുന്‍ വശത്ത് കൂടെ റോഡ് മുറിച്ച് കടന്ന് പോയി.

double horned black Rhinoceros

വരിവരിയായി ജാഥപോലെ നടക്കുന്ന മുന്നൂറില്‍ പരം wild beasts. ഇവ എല്ലാ വര്‍ഷവും ,ഒക്ടോബര്‍ മാസത്തില്‍ മസായ്-മാരയില്‍ നിന്ന് അടുത്തുള്ള Serengeti national parkലേക്ക് [Tanzania] കുടിയേറിപ്പാര്‍ക്കുന്നു. ജലദൌര്‍ലഭ്യവും,പുല്ലിന്റെ ഉയരം കുറയുന്നത് മൂലവും ആണ് ഈ മൈഗ്രേഷന്‍ നടക്കുന്നതെന്ന് പറയപ്പെടുന്നു. പിന്നീട് ജൂണ്‍-ജൂലൈ മാസത്തില്‍ സെരങ്കേട്ടിയില്‍ നിന്ന് ഇവര്‍ മസായ്-മാരക്ക് തിരിച്ച് പോരുന്നു-1.5 മില്യന്‍ വൈല്‍ഡ് ബീസ്റ്റ്,സീബ്ര,മാനുകള്‍ ആണെത്രെ 1800മൈല്‍ പിന്നിട്ട്,മാര നദി താണ്ടി എല്ലാകൊല്ലവും ഈ യാത്രക്ക് ഒരുങ്ങുന്നത്.

Wild beasts

ഈ പരേഡിന്റെ അകമ്പടിയായി കഴുതപുലികളും,സിംഹങ്ങളും ധാരാളം കാണുമത്രെ. ഈ ഉദ്യമത്തില്‍ അനേകായിരം മൃഗങ്ങള്‍ കൊല്ലപ്പെടുന്നു-ദാഹത്താലും,സിംഹം,ചീങ്കണ്ണി തുടങ്ങിയവരുടെ ഇരയാവുന്നതിനാലും. മാര നദിയിലെ ചീങ്കണ്ണികള്‍ക്ക് ഇത് ഒരു വാര്‍ഷിക വിരുന്നാണ്.ഈ അത്ഭുതപ്രതിഭാസം കാണാനായി ലോകമെമ്പാടുള്ള വിനോദ സഞ്ചാരികള്‍ ഇവിടെ എത്തിചേരാറുണ്ട്.ഡിസംബര്‍ ആയതിനാല്‍ ഞങ്ങള്‍ക്കിത് കാണാനായില്ല. ഇനിയൊരിക്കല്‍ മൈഗ്രേഷന്‍ സമയത്ത് ഇവിടെ വരണമെന്നുണ്ട്.

ഇത്ര സന്തോഷം നല്‍കിയ മറ്റൊരു വിനോദയാത്ര എനിക്കുണ്ടാട്ടില്ല എന്നു തന്നെ പറയാം.പലയിടങ്ങളിലും യാത്ര ചെയ്തു. ഇവിടം തികച്ചും വിസ്മയജനകമാണ്, അത്ഭുതലോകമാണ്. മസായ് മാരയെ മാസ്മര-മാരയെന്ന് ഞാന്‍ വിളിച്ചോട്ടെ.

Wild Beasts Parade ന്റെ വീഡിയോ ക്ലിപ് ഇവിടെ കാണാം .

ആഫ്രിക്കന്‍ ആനകൂട്ടങ്ങളുടെ വീഡിയോ ക്ലിപ് ഇവിടെ കാണാം

റോഡ് മുറിച്ച് കടന്ന് പോകുന്ന റൈനൊ കുടുംബത്തെ ഇവിടെ കാണാം.

കടിപിടി കൂടുന്ന സിംഹകുട്ടികളെ ഇവിടെ കാണാം

Mount Kenya Safari Club

2011-08-08T22:33:00.000-07:00

ഈ തവണ ഈസ്റ്റര്‍ ഒഴിവ്കാലത്ത് എവിടെ പോകണമെന്ന ചിന്തയിലായിരുന്നു.mds ചൈന യാത്രയും ഞാന്‍ നാട് സന്ദര്‍ശനവും കഴിഞ്ഞ് തിരിച്ചെത്തിയിട്ട് ഒരു മാസമേ ആയിട്ടുള്ളൂ.അത് കൊണ്ട് എങ്ങോട്ടും പോകേണ്ട എന്ന തീരുമാനമെടുത്തു.പക്ഷേ നാല് ദിവസ്സം വീട്ടില്‍ എന്ത് ചെയ്യും എന്നതിനാല്‍ ഈസ്റ്റര്‍ ഞായറാഴ്ച ഒരു ചെറിയ ആഫ്രിക്കന്‍ സഫാരിക്കൊരുങ്ങി.

നെയ് റോബിയില്‍ നിന്ന് അധികം അകലത്തിലല്ലാത്ത സ്ഥലം തിരഞ്ഞെടുത്തു-Mount Kenya Safari Club.മൌണ്ട്-കെനിയായുടെ താഴ്വരയില്‍ , പ്രസിദ്ധമായ Fairmont Hotel Chainല്‍ വരുന്ന resort ആണിത്.ഇത് നെയ് റോബിയില്‍ നിന്ന് കാറില്‍ മൂന്നര മണിക്കൂര്‍ ദൂരമേ ഉള്ളൂ.കൂട്ടുകാരെ വിളിച്ച് പറഞ്ഞപ്പോള്‍ അവരും വരാന്‍ തയ്യാറായി.നേരത്തെ തന്നെ lunch ബുക്ക് ചെയ്യണം.

ഞങ്ങള്‍ 6 പേര്‍ കൂടി അവരുടെ കാറില്‍ ഞായറാഴ്ച കാലത്ത് എട്ടരമണിയൊടെ പുറപ്പെട്ടു.നല്ല റോഡ്.ഇരുവശത്തുള്ള മനോഹരമായ മരങ്ങളും പൂക്കളും കുന്നുകളും,താഴ്വരകളും മനസ്സിന് ഉന്മേഷം നല്‍കി.കൊണ്ടു വന്ന ഉണ്ണിയപ്പവും,മുറുക്കും കഴിച്ചും, മലയാളം പാട്ടുകള്‍ കേട്ടും നേരം പോയതറിഞ്ഞില്ല. ഏതാണ്ട് 12മണിയോടെ റിസോര്‍ട്ടില്‍ എത്തി.

Mount-Kenya

Mount-Kenya Safari Club

Spectacular എന്ന വിശേഷണം ആയിരിക്കും ഈ റിസോര്‍ട്ടിന് കൂടുതല്‍ യോജിക്കുന്നത്.കടലലകള്‍ പോലെ പ്രതലമുള്ള മൌണ്ട് കെനിയാ താഴ്വരയില്‍ അതിമനോഹരമായ സഫാരി ക്ലബ്.ഇവിടെനിന്ന് മേഘങ്ങളാല്‍ മൂടിയ മൌണ്ട് കെനിയായുടെ പീക്ക് കാണാന്‍ എന്ത് ഭംഗിയാണെന്നോ.എനിക്ക് വര്‍ണ്ണിക്കാന്‍ വാക്കുകള്‍ കിട്ടുന്നില്ല.ചിത്രങ്ങള്‍ കഥ പറയട്ടെ.

ഹോട്ടലിന് ചുറ്റും 4ഏക്കറോളം വിസ്താരത്തില്‍ golf course.പച്ചപരവതാനി വിരിച്ചപോലുള്ള പുല്‍മേട്.അവിടെയിവിടെ കൊച്ചു കുളങ്ങള്‍. അതില്‍ നീന്തിക്കളിക്കുന്ന വെളുത്ത താറാവ് കൂട്ടങ്ങള്‍.കുളത്തില്‍ ചൂണ്ടയിട്ട് മീന്‍ പിടിക്കാനിരിക്കുന്ന വെള്ളക്കാര്‍. ചിറകുകള്‍ വിടര്‍ത്തി വെയില്‍ കായുന്ന വലിയ പെലിക്കന്‍ പക്ഷികള്‍.പീലിവിരിച്ചാടുന്ന മയിലുകള്‍.ആനന്ദലബ്ധിക്കിനി എന്ത് വേണം??

വിശന്ന് തുടങ്ങിയിരിക്കുന്നു.ഹാളില്‍ വരിവരിയായി നിരത്തിയ ഭക്ഷണവിഭവങ്ങള്‍ ഒന്ന് എത്തിനോക്കി.ഭംഗിയില്‍ ഒരുക്കിയ വിവിധ തരം സാലഡുകള്‍.പല പല പേരറിയാത്ത വിഭവങ്ങള്‍.ബട്ടര്‍ ചിക്കന്‍,മട്ടര്‍ പനീര്‍ തുടങ്ങിയ ഇന്ത്യന്‍ വിഭവങ്ങള്‍ കണ്ട് മനസ്സിന് സന്തോഷം തോന്നി.പലതും എടുത്ത് പ്ലേയ്റ്റ് നിറച്ചു.പക്ഷേ ഒന്നിനും രുചിയില്ലായിരുന്നു.പിന്നെ ആശ്വാസം നല്‍കിയത് മധുരപലഹാരങ്ങളാണ്.

ഭക്ഷണം കഴിഞ്ഞ് പുറത്തുള്ള ഗാര്‍ഡനില്‍ ചുറ്റുന്ന നേരത്ത് പെട്ടെന്ന് ഒരു നോട്ടീസ് ശ്രദ്ധയില്‍ പെട്ടു.‘ഹായ്,ഞങ്ങളുടെ പേര്‍ ഓസ്കാര്‍ എന്നും ഗ്രാമി എന്നും ആണ്.റെസപ്ഷനില്‍ നിന്ന് അനുവാദം വാങ്ങി ഞങ്ങളെ ഒന്നു പുറത്ത് നടക്കാന്‍ കൊണ്ടു പോകുമോ?’രണ്ട് കറുത്ത പട്ടിക്കുട്ടികളുടെ കൂടിന് പുറത്ത് തൂക്കിയിട്ടിരിക്കുന്ന അപേക്ഷയാണിത്.അവരെ കൂടിന് പുറത്ത് നിന്ന് ഞാന്‍ തലോടി.വാലിട്ടാട്ടിയും,കൈയ്യില്‍ നക്കിയും അവര്‍ സ്നേഹം പ്രകടിപ്പിച്ചു.സമയക്കുറവ് കൊണ്ട് അവരെ പുറത്തിറക്കാന്‍ സാധിച്ചില്ല.

പുറത്ത് കടന്നാല്‍ NGO നടത്തുന്ന ഒരു animal orphanage ഉണ്ടായിരുന്നു.അത് കാണാന്‍ എല്ലാവരും ടിക്കറ്റ് എടുത്തു.പരിക്കേറ്റ മൃഗങ്ങളെ കാട്ടില്‍ നിന്നെടുത്ത് സ്വാഭാവികമായ ചുറ്റുപാട് ഉണ്ടാക്കി സംരക്ഷിക്കുന്ന ഒരു മൃഗശാല എന്ന് ഇതിനെ വിളിക്കാം.പക്ഷെ ഇവിടെ മൃഗങ്ങള്‍ കുറേകൂടി സ്വതന്ത്രരാണ്.മാത്രമല്ല പലരും വളരെ ഇണക്കമുള്ളവയാണ്. സന്ദര്‍ശകരെ കണ്ടാല്‍ പേടിച്ചോടുന്നില്ല എന്ന് മാത്രമല്ല നമ്മള്‍ തലോടിയാല്‍ നിന്ന് തരും.

പുരാതനമായ ദ്രവിച്ച് കൊണ്ടിരിക്കുന്ന ഒരു രാജകീയ കാളവണ്ടി പടിവാതിലിനടുത്ത് കണ്ടു. പ്രകൃതിസംരക്ഷകനായ colonel Percy Smith ,1935ല്‍ ഈ കാളവണ്ടിയിലായിരുന്നു സൌത്ത് ആഫ്രിക്കായില്‍നിന്ന് മൌണ്ട് കെനിയായില്‍ താമസ്സിക്കാന്‍ വന്നിരുന്നത്. അദ്ദേഹമാണ് ആദ്യമായി bongo എന്ന ,വംശനാശം വന്ന് കൊണ്ടിരിക്കുന്ന antelope കൂട്ടത്തെ മൌണ്ട് കെനിയായില്‍ കണ്ടെത്തിയത്.

Ox-cart

bongo

പുല്ല് തിന്ന് നടക്കുന്ന മാനുകള്‍ പശുക്കുട്ടികളെ ഓര്‍മ്മപ്പെടുത്തി.വിനോദസഞ്ചാരികള്‍, വയസ്സനായ ഒരു വളരെ വലിയ ആമയുടെ മുകളില്‍ സവാരി ചെയ്യുന്നത് കണ്ടു...ഇടയില്‍ നടക്കുന്ന ഒട്ടകപക്ഷി.ഒട്ടകപക്ഷി എന്റെ പിന്നാലെ വന്നപ്പോള്‍ എനിക്ക് അല്പം ഭയം തോന്നി.

ഒട്ടകപക്ഷി

ഏറ്റവും തമാശ തോന്നിയത് കുരങ്ങന്‍മാരുടെ അടുപ്പമാണ്.പുല്ലില്‍ വിശ്രമിക്കുന്ന white nosed monkeyയെ ഞാന്‍ താലോലിച്ചു.കൂടിന് പുറത്ത് കളിക്കുന്ന colobus monkey [വെളുപ്പും കറുപ്പും ഇടകലര്‍ന്ന ഭംഗിയുള്ള ഇവയുടെ fur നായി poachers കൊല്ലുന്നതിനാല്‍ ഇവ വിരളമായിക്കൊണ്ടിരിക്കുന്നു] അതിന്റെ കുഞ്ഞിനെ തൊട്ടപ്പോള്‍ എന്റെ കൈ തട്ടി മാറ്റി.

white-nosed monkeyയൊത്ത്

Colobus Monkeyയുടെ കൂടെ

പുല്ലില്‍ നിറയെ പലതരം പക്ഷികളാണ്.സ്വര്‍ണ്ണകിരീടമുള്ള gold-crown bird,pelican,ducks തുടങ്ങിയവ.

Gold-crown bird

മരത്തിന് മുകളില്‍ കാഴച കണ്ടിരിക്കുന്ന പുള്ളിപുലി ഞങ്ങളെ അത്ഭുതപ്പെടുത്തി.മരക്കുറ്റികള്‍ കൊണ്ടുള്ള ഒരു ചെറിയ വേലിമാത്രമേ അതിന് ചുറ്റും ഉള്ളൂ.അതിനുള്ളിലെ മരത്തില്‍ കയറിയാണ് ഇരിക്കുന്നത്.അവിടെ നിന്ന് ഒന്ന് ചാടിയാല്‍ മതി സന്ദര്‍ശകരുടെ അടുത്തെത്താന്‍!!!

പുള്ളിപുലി

അവിടെ നിന്ന് നീങ്ങിയപ്പോള്‍ കണ്ടത് ഹിപ്പോവിന്റെ കുട്ടിയെയാണ്.മേല്‍ നോട്ടക്കാരന്‍ കേബേജ് കാണിച്ച് വായ തുറക്കാന്‍ പറഞ്ഞപ്പോള്‍ അവന്‍ വായ തുറന്നു.അവിടെ വഴിയരികില്‍ ചെടികള്‍ക്കിടയില്‍ നിന്ന് നീണ്ട കഴുത്തും ചെറിയ തലയും ഉള്ള പഞ്ഞികെട്ട് പോലുള്ള ഒരു മൃഗം എന്റെ അടുത്ത് വന്നു. ഭയമില്ലാതെ ഞാനതിനെ തലോടി.അത് ലാമ എന്ന മൃഗമാണെന്ന് മേല്‍നോട്ടക്കാര്‍ പറഞ്ഞു.

Hippo baby

Llama യൊത്ത്

ഓരോ മൃഗവും സന്ദര്‍ശകരെ ഭയക്കാതെ,ഉപദ്രവിക്കാതെ ഇവിടെ സന്തോഷത്തോടെ വസിക്കുന്നു.അവര്‍ക്ക് നടക്കാനും,ഭക്ഷിക്കാനും,വിശ്രമിക്കാനും പുല്‍മേട് പരന്ന് കിടക്കുന്നു.Zoo എന്ന തടവറയേക്കാള്‍ എത്ര മെച്ചപ്പെട്ടതാണിത്.

വൈകുന്നേരം റെസ്റ്റോറെന്റിന്റെ പുറത്തുള്ള വരാന്തയിലിരുന്ന് മൌണ്ട് കെനിയായുടേയും,താഴ്വരയുടേയും ഭംഗി ആസ്വദിച്ച് കാപ്പി കുടിച്ചു.ഇനി നേയ്റോബിക്ക് തിരിച്ച് പോകാനുള്ള സമയമായി.

സിറ്റാഡെല്‍ -ക്യുബെക്ക്

2011-06-04T21:45:00.000-07:00

ഇന്നും നേരത്തെ ഉണര്‍ന്ന് തയ്യാറായി.ക്യുബെക്കിന്റെ അപ്പര്‍ടൌണിലുള്ള La Citadel കാണാനാണ് ഉദ്ദേശം.കനഡായുടെ കാലാള്‍പ്പടയായ, Royal 22e Regimentന്റെ ബേയ്സ് ഇവിടെയാണ്. ഇവിടേയ്ക്ക് പോകാന്‍ പ്രത്യേകമായ ഗൈഡഡ് ടൂര്‍ ഉണ്ട്.സിറ്റാഡെല്‍ ഇന്നും ഒരു സജീവമായ മിലിറ്ററി ബേയ്സ് ആയതിനാല്‍ അവര്‍ അനുവദിച്ച ഗൈഡിന്റെ കൂടെ മാത്രമേ ഇവിടേയ്ക്ക് പോകാന്‍ അനുവാദമുള്ളൂ.ഇത് കനഡാ ഗവര്‍ണ്ണര്‍ ജനറലിന്റെ ഔദ്യോഗിക വസതി കൂടിയാണ്. ഇന്ന്,ജൂലൈ ഒന്നാം തിയ്യതി Canada Day ആയതിനാല്‍ അവിടെ നടക്കുന്ന പരേഡും കാണാന്‍ കഴിയും.

Citadel Entrance

ടിക്കെറ്റ് എടുത്ത് ഗൈഡിന്റെ വിവരണം കേട്ട് ഞങ്ങള്‍ 30ഓളം പേര്‍ അദ്ദേഹത്തെ പിന്തുടര്‍ന്നു.ഇവിടെ,Plains of Abrahamല്‍ നടന്ന മൂന്ന് യുദ്ധങ്ങളെ കുറിച്ച് ഗൈഡ് ആവേശത്തോടെ വിവിരിച്ചു.കാണികള്‍ കൈയ്യടിച്ചു. സിറ്റാഡെലിന്റെ പല ഭാഗങ്ങളിലേക്കും അദ്ദേഹം ഞങ്ങളെ നയിച്ചു.

മുനമ്പായ Cape Diamantല്‍,നക്ഷത്രാകൃതിയില്‍ നിര്‍മ്മിച്ച 25 ബില്‍ഡിങ്ങുകളുള്ള ഒരു Fortress ആണ് സിറ്റാഡെല്‍.1850ല്‍ പണിതീര്‍ത്ത ഈ കോട്ട Vauban എന്ന ഫ്രെഞ്ച് എഞ്ചിനീയര്‍ ആണ് ഡിസൈന്‍ ചെയ്തത്. കോട്ടയുടെ ഉള്ളില്‍ നിരനിരയായി വലിയ പീരങ്കികള്‍. കുന്നും, താഴ്വരയും,കെട്ടിടങ്ങളും നിറഞ്ഞ സിറ്റാടെല്‍ വളരെ മനോഹരമാണ്. ഇവിടെ Change of guards, beating of the retreat, gunnery തുടങ്ങിയ സൈനികസംബന്ധിയായ ചടങ്ങുകള്‍ ഇപ്പോഴും നിലനിര്‍ത്തുന്നുണ്ട്.

കവാടത്തിന്റെ രണ്ടു വശത്തും തോക്ക് കൈയ്യില്‍ പിടിച്ച് ചലനമില്ലാതെ നില്‍ക്കുന്ന ചുവന്ന യൂണിഫോമും ,കറുത്തനീണ്ട നനുനനുത്ത തൊപ്പിയുമണിഞ്ഞ രണ്ട് കാവല്‍ ഭടന്മാര്‍ സന്ദര്‍ശകര്‍ക്ക് കൌതുകമുണ്ടാക്കി.അരമണിക്കൂര്‍ കഴിഞ്ഞപ്പോള്‍ അവര്‍ ഒറ്റയടിവെച്ച് ഇരുവശത്തേയ്ക്കും 20അടി നടക്കുന്നത് കണ്ടു.അത് പോലെ തന്നെ തിരിച്ച് വന്ന് വീണ്ടും ജീവച്ഛവമായി നിന്നു.എന്തൊരു ശിക്ഷയാണിത്??കഷ്ടം തോന്നി.

പിന്നിട് ഗൈഡ് ഞങ്ങളെ Royal 22e Regiment Museum കാണാന്‍ കൊണ്ടുപോയി.ഇത് ഒരു bunker ന്റെ ഉള്ളിലാണ്.ഇരുട്ട് മൂടിയ ഇത് പണ്ട് കാലത്ത് യുദ്ധ തടവുകാരെ പിടിച്ചിടാനുള്ള തടവറ ആയിരുന്നു. ഇപ്പോള്‍ ഇവിടെ, അക്കാലത്ത് പട്ടാളക്കാര്‍ ഉപയോഗിച്ചിരുന്ന ആയുധങ്ങള്‍, യൂണിഫോം,മെഡലുകള്‍, യുദ്ധകാലത്തെ ചിത്രങ്ങള്‍......ഇങ്ങിനെ പലതും പ്രദര്‍ശിപ്പിച്ചിക്കുന്നു. ഒന്നു രണ്ട് ചെറിയ വിടവുകളിലൂടെ ഉള്ളില്‍ നിന്ന് പുറം ലോകം കാണാം. എന്നെ ആകര്‍ഷിച്ചത് ഒരു വെളുത്ത മുട്ടനാടിനെ പിടിച്ച് നില്‍ക്കുന്ന സൈനികരൂപമാണ്. വിക്ടോറിയ രാജ്ഞി ഇവര്‍ക്ക് സമ്മാനമായി നല്‍കിയ Battisse എന്ന് പേരുള്ള ഒരു വെളുത്ത ആടിന്റെ മാതൃകയാണിത്.അതിനാല്‍ ആട് അവരുടെ mascotആയി.

Citadel Museum

കോട്ടയുടെ മുന്നില്‍ സൈനികര്‍ അണിനിരന്നു തുടങ്ങി .ഇനി പരേഡിന്റെ സമയമാണ്. ബാന്‍ഡിന്റെ മ്യൂസിക്കിനൊത്ത് അവര്‍ മാര്‍ച്ച് ചെയ്തപ്പോള്‍ ഞങ്ങളും താളത്തിനൊത്ത് ചുവട് വെച്ചു.അച്ചടക്കത്തോടെ അണിയണിയായി നടക്കുന്ന ആ പടനീക്കം കാണാന്‍ നല്ലൊരു കാഴ്ചയായിരുന്നു.അവര്‍ മാര്‍ച്ച് ചെയ്ത് സിറ്റിയിലേക്ക് പോകുന്ന കാഴ്ച ജനങ്ങള്‍ നിശബ്ദരായി നോക്കിനിന്നു.

Canada Day Parade

സിറ്റാഡെലിന്റെ തെക്ക്-കിഴക്കായി കിടക്കുന്ന വിസ്താരമുള്ള പുല്‍മേടാണ് Plains of Abraham. ഉയര്‍ന്നും താഴ്ന്നും കിടക്കുന്ന ഇത്, അബ്രഹാം എന്ന കൃഷിക്കാരന്റെ വയലായിരുന്നു.ഈ പുല്‍മേട് മൂന്ന് യുദ്ധങ്ങളുടെ ദൃക് സാക്ഷിയാണ്.ഇവിടെ 1759ല്‍ നടന്ന യുദ്ധത്തില്‍ വെച്ചാണ് ബ്രിട്ടീഷുകാര്‍ ഫ്രെഞ്ചുകാരെ തോല്‍പ്പിച്ച് ക്യുബെക്ക് പിടിച്ചെടുത്തത്.ചരിത്രമുറങ്ങുന്ന മനോഹരമായ ഈ പുല്‍മേടിന്റെ ഒരറ്റത്തായി ഒരു സുവനീര്‍ ഷോപ്പും,കോഫീ ഷോപ്പും ഉണ്ട്.പുറത്ത് മുന്നില്‍ നിറയെ പേരറിയാത്ത വെളുത്ത പൂത്തടം. ഇവിടെ ചെടികള്‍ക്കിടയില്‍ നിന്ന് പെട്ടെന്ന് ഒരു എലിപോലുള്ള മൃഗം പുറത്ത് വന്ന് എത്തി നോക്കി. ഇത് കനഡായുടെ മൃഗമായ beaver ആണത്രെ.

Plains of Abraham

beaver

ഈ മുനമ്പില്‍ നിന്ന് നോക്കിയാല്‍ തൊട്ട് താഴെ സെന്റ് ലോറെന്‍സ് നദിയാണ്. നദിയുടെ മറുവശത്തുള്ള പട്ടണം ഇവിടെനിന്ന് ഭംഗിയായി കാണാം. നദിയിലൂടെ പട്ടണം കാണാനായി ബോട്ട് ക്രൂയ്സ് ഉണ്ട്. കൂടാതെ whale Watching ബോട്ട് ടൂറും ഇവിടെ നിന്നുണ്ട്.

St.Lawrence River

ഇവിടെത്തെ ഏറ്റവും പുരാതനമായ റോമന്‍ കാത്തലിക് ചര്‍ച്ച് ആണ് Notre-Dame de Quebec.1647ല്‍ പണിചെയ്ത ഈ ചര്‍ച്ചിന്റെ പല ഭാഗങ്ങളും 1759ലെ യുദ്ധത്തില്‍ നശിച്ചു പോയിരുന്നു.പിന്നീട് ഇതിന്റെ പുനര്‍നിര്‍മ്മാണം നടത്തുകയുണ്ടായി.ആഡംബരത്തോടെ അലങ്കരിച്ച ഈ ചര്‍ച്ച് വളരെ ഇമ്പ്രെസ്സിവ് ആയിരുന്നു. പെയ്ന്റിങ്ങുകളും,സ്റ്റേയിന്റ് ഗ്ലാസ്സ് ജനവാതിലുകളും, സ്വര്‍ണ്ണം പൊതിഞ്ഞ Altarഉം എല്ലാം വളരെ മനോഹരം.ഇത് പാരീസിലെ ലോകപ്രസിദ്ധമായ Notre-Dame de Paris നെ അനുകരിച്ചാണ് പണിതീര്‍ത്തിരിക്കുന്നത്.

Notre-dame -Quebec

നാളെ ഈ സുന്ദരമായ താഴ്വരയില്‍ നിന്ന് യാത്രയാവുകയായി.തിരിച്ചുള്ള യാത്ര ഒട്ടാവയിലൂടെ [കനഡായുടെ തലസ്ഥാന നഗരം] കാറിലാണ്. അവിടെത്തെ വിശേഷം പിന്നീടൊരിക്കലാവാം.

സിറ്റാഡെല്‍-പരേഡ് വീഡിയോ ക്ലിപ് ഇവിടെ കാണാം

ക്യുബെക്ക് സിറ്റി

2011-04-23T09:00:00.000-07:00

ഇന്ന് ജൂണ്‍ 30.കാലത്ത് 7മണിയുടെ ഫ്ലൈറ്റില്‍ ടൊറോണ്ടോവില്‍ നിന്ന് Quebec Cityയിലേക്ക് പോകുകയാണ്.അതിനാല്‍ നേരത്തേ ഉണര്‍ന്നു.ടാക്സി പിടിച്ച് ടൊറൊണ്ടൊ എയര്‍പോര്‍ട്ടില്‍ എത്തി.ചെക്ക് ഇന്‍ ചെയ്യാനായി നീണ്ട ക്യൂവില്‍ ചേര്‍ന്നു.കൌണ്ടറിന് അടുത്തെത്തിയപ്പോള്‍ അവര്‍ ഞങ്ങള്‍ നാലുപേരോട് വെയ്റ്റ് ചെയ്യാന്‍ പറഞ്ഞു.എന്തേ ഇങ്ങിനെ തരം തിരിക്കല്‍ എന്ന് മനസ്സില്‍ ഒരു ചോദ്യചിഹ്നമുദിച്ചു.

എല്ലാവരുടേയും ചെക്ക് ഇന്‍ കഴിഞ്ഞിരിക്കുന്നു.കൌണ്ടറിലെ സ്ത്രീ അടുത്ത് വന്ന് പറഞ്ഞു-‘ഫ്ലൈറ്റ് ഓവര്‍ബുക്ക്ട് ആണ്- ക്ഷമ ചോദിക്കുന്നു. നിങ്ങള്‍ക്ക് അടുത്ത ഫ്ലൈറ്റില്‍ [10മണിക്ക്] പോകാം’. എന്ത് കൊണ്ടാണ് ഞങ്ങളെ ഇതിനായി തിരഞ്ഞെടുത്തതെന്ന് ചോദിച്ചു.നിങ്ങള്‍ ഓണ്‍ ലൈന്‍ ചെക്ക് ഇന്‍ ചെയ്യാത്തതിനാല്‍ ഏറ്റവും ഒടുവിലായിപ്പോയി എന്ന് മറുപടി കിട്ടി.ഇനി മുതല്‍ ഓണ്‍ലൈന്‍ ചെക്ക് ഇന്‍ ചെയ്തിട്ടേ യാത്ര തുടങ്ങാവൂ എന്ന പാഠം പഠിച്ചു.

ഞങ്ങളെ അതിശയിപ്പിച്ചു കൊണ്ട് അവര്‍ ഞങ്ങള്‍ക്ക് നാല് എയര്‍ കനഡാ കൂപ്പണുകള്‍ [ഓരോരുത്തര്‍ക്കും 200 ഡോളറിന്റെ] തന്നു-ഒരു കൊല്ലത്തിനുള്ളില്‍ ഇത് ഉപയോഗിക്കണമെന്ന എന്ന നിര്‍ദ്ദേശവും തരികയുണ്ടായി-കൂടെ ബ്രേക്ക്ഫാസ്റ്റിനായി ഫ്രീ കൂപ്പണും!!!!. കനഡാക്കാര്‍ അമേരിക്കാക്കാരേക്കാള്‍ എത്ര ആദിത്യമര്യാദ പുലര്‍ത്തുന്നു.

കോട്ടവാതില്‍

ക്യുബെക്ക് എയര്‍പോര്‍ട്ടില്‍ ഇറങ്ങുമ്പോല്‍ സമയം ഉച്ചയ്ക്ക് 12.30യായി .ചെറിയ എയര്‍പോര്‍ട്ട്. പുറത്ത് കടന്നപ്പോള്‍ നല്ല തണുപ്പ്.മോന്‍ നേരത്തേതന്നെ ടൊറൊണ്ടൊവില്‍ നിന്ന് ക്യുബെക്കില്‍ ചുറ്റാനായി കാര്‍ ബുക്ക് ചെയ്തിരുന്നു. അതിനാല്‍ എയര്‍പോര്‍ട്ടില്‍ ഞങ്ങളെ കാത്ത് കാര്‍ നില്പുണ്ട്. മോന്‍ കാര്‍ ഏറ്റെടുത്ത് പതുക്കെ ഓടിയ്ക്കാന്‍ തുടങ്ങി.ഇവിടേയും GPS ആണ് വഴികാട്ടി. ഒരുവിധം വഴി തെറ്റിയും,വീണ്ടും കണ്ടുപിടിച്ചും ബുക്ക് ചെയ്ത 'Best Western' ഹോട്ടലിലെത്തി. എല്ലാവരും സംസാരിക്കുന്നത് ഫ്രെഞ്ചില്‍ ആണ്. ഇംഗ്ലീഷ് അത്യാവശ്യത്തിന് മാത്രം.

റെസെപ്ഷന്‍ കൌണ്ടറിനടുത്ത് വെച്ച് ഒരു ഇന്ത്യന്‍ കുടുംബത്തെ പരിചയപ്പെട്ടു. അവര്‍ സൌത്ത് ആഫ്രിക്കായില്‍ നിന്ന് എത്തിയ തെക്കേ ഇന്ത്യക്കാര്‍ ആയിരുന്നു.

ഞങ്ങള്‍ ഉച്ചഭക്ഷണത്തിനായി പുറത്തേക്കിറങ്ങി.ഹോട്ടലിന് അടുത്തായി പല ഷോപ്പുകളും,റെസ്റ്റോറെണ്ട്കളും ഉണ്ട്. അടുത്തുള്ള ഒരു ഹോട്ടലില്‍ കയറി എന്തൊക്കേയൊ ഓര്‍ഡര്‍ ചെയ്തു.മെനു-കാര്‍ഡിലെ പേരുകളെല്ലാം ഫ്രെഞ്ചില്‍ ആണ്. പല യാത്രകളും ചെയ്യുന്നതിനാല്‍ ഏത് ഭക്ഷണം കഴിക്കാനും ഞങ്ങള്‍ക്ക് ബുദ്ധിമുട്ടില്ലാതായിരിക്കുന്നു.ഞങ്ങള്‍ താമസ്സിച്ചിരുന്ന ഹോട്ടല്‍ സിറ്റിയുടെ ഉള്ളില്‍ തന്നെയായിരുന്നതിനാല്‍ എല്ലായിടത്തേക്കും നടക്കാവുന്ന ദൂരമേ ഉള്ളൂ.അതിനാല്‍ കാര്‍ വാടകക്കെടുത്തത് നഷ്ടമായി.കൂടാതെ കാര്‍ പാര്‍ക്ക് ചെയ്യാനുള്ള സ്ഥലം കണ്ടെത്തുന്നതിന്റെ തലവേദനയോര്‍ത്ത് കാര്‍ ഹോട്ടലില്‍ പാര്‍ക്ക് ചെയ്ത് നടക്കുന്നതാണ് സൌകര്യപ്രദം എന്ന് കണ്ടെത്തി!!

കനഡായുടെ കിഴക്ക് വശത്തുള്ള ഒരു French-speaking പ്രോവിന്‍സ് ആണ് ക്യുബെക്ക്. സെന്റ് ലോറെന്‍സ് നദിയുടെ വടക്ക് തീരത്തെ താഴ്വരയില്‍ സ്ഥിതിചെയ്യുന്ന മനോഹരമായ ഈ നഗരം ,കോട്ടകളാല്‍ ചുറ്റപ്പെട്ട ഒരു ഫ്രെഞ്ച് കോളണിയായിരുന്നു..വളരെ ചരിത്രപ്രധാനമായ ഒരു പട്ടണമാണ് ക്യുബെക്ക് സിറ്റി [ക്യുബെക്കിന്റെ തലസ്ഥാനം].19താം നൂറ്റാണ്ടില്‍ പണിതീര്‍ത്ത കെട്ടിടങ്ങളാണ് അധികവും. ഇവിടെത്തെ പുരാതനമായ കെട്ടിടങ്ങളും,കോട്ടയും ,ഫ്രെഞ്ച് ആര്‍ക്കിടെക്ചെറും പ്രകൃതിഭംഗിയും ഈ പട്ടണത്തെ വിനോദസഞ്ചാരികളുടെ ആകര്‍ഷണകേന്ദ്രമായി മാറ്റിയിരിക്കുന്നു.

കോട്ടമതിലില്‍ നിന്ന് താഴേക്കുള്ള കാഴ്ച

ഇതിന് രണ്ട് ഭാഗങ്ങളുണ്ട്.അപ്പര്‍-ടൌണ്‍, നദിയില്‍ നിന്ന് വളരെ ഉയരത്തിലുള്ള മുനമ്പില്‍ ‍[Cape Diamant] ആണ്. ലോവര്‍-ടൌണ്‍ ,നദിയുടെ തീരത്തായി കിടക്കുന്നു. ഇതിന് ചുറ്റും 4.6 കിലോമീറ്റര്‍ നീളത്തില്‍ കല്ലുകൊണ്ടുണ്ടാക്കിയ കോട്ടയാണ്. അപ്പര്‍ ടൌണില്‍ മിലിറ്ററി ഓഫീസ്സര്‍മാരും,ക്രൈസ്തവപുരോഹിതരുമാണ് ആദ്യകാലത്ത് താമസ്സിച്ചിരുന്നത്.ലോവര്‍ ടൌണില്‍ കച്ചവടക്കാരും,കലാകാരന്മാരും.

കോട്ടമതില്‍

ഒരു ഫ്രെഞ്ച് ദേശപര്യവേഷകനായ Samuel de Champlain ആണ് ഈ സിറ്റിയുടെ സ്ഥാപകന്‍ ‍[1608].അദ്ദേഹത്തെ Father of New France[ക്യുബെക്ക്] എന്ന് വിശേഷിക്കപ്പെടുന്നു.പിന്നിട് ക്യുബെക്ക് പിടിച്ചെടുക്കാനായി ബ്രിട്ടീഷുകാരും ഫ്രെഞ്ചുകാരും തമ്മില്‍ 1759 മുതല്‍ 1775 വരെ തുടരെയായി മൂന്ന് യുദ്ധങ്ങള്‍ നടന്നു.അതിന് ശേഷം കനഡാ സ്വതന്ത്രമാകുന്നത് വരെ ,ക്യുബെക്ക് ബ്രിട്ടീഷ് ഭരണത്തിന് കീഴിലായിരുന്നുവെങ്കിലും ക്യുബെക്ക് സിറ്റി ഇന്നും ഫ്രെഞ്ച് ഭാഷയും സംസ്കാരവും നിലനിര്‍ത്തുന്നു.

ഈ മൂന്നു യുദ്ധങ്ങളും നടന്നത് പ്ലേയിന്‍സ് ഓഫ് അബ്രഹാം എന്ന സ്ഥലത്ത് വെച്ചാണ്.ഇത് അബ്രഹാം മാര്‍ട്ടിന്‍ എന്ന ഒരു കൃഷിക്കാരെന്റെ വയലായിരുന്നു.പ്ലെയിന്‍സ് ഓഫ് അബ്രഹാം ഇന്ന് മനോഹരമായ ഒരു പാര്‍ക്കാണ്.ഇത് മുനന്‍പിന്റെ അറ്റത്തായി സ്ഥിതി ചെയ്യുന്നു.

ഉയര്‍ന്നും താഴ്ന്നും ടോപ്പോഗ്രാഫിയുള്ള ഈ സജീവമായ പട്ടണത്തില്‍ ഉടനീളം ഫ്രെഞ്ച് ഭരണകാലത്ത് നിര്‍മ്മിച്ച കല്ലു കൊണ്ടുള്ള കെട്ടിടങ്ങളാണ്.എല്ലാം അതിന്റെ തനിമയും ഭംഗിയും നഷ്ടപ്പെടാതെ സംരക്ഷിച്ചിരിക്കുന്നു.മറ്റു കനേഡിയന്‍ പട്ടണങ്ങളിലെപോലെ ഇന്ത്യക്കാരേയോ ചൈനക്കാരേയൊ ഇവിടെ അധികം കാണാന്‍ കഴിഞ്ഞില്ല.1985ല്‍ ഈ നഗരത്തെ UNESCO, World Heritage Site ആയി പ്രഖ്യാപിച്ചു.

ഇവിടെ ശിശിരകാലം കൊടും തണുപ്പാണ്.ഈ സമയത്ത് വിന്റര്‍കാര്‍ണിവെല്‍ നടത്താറുണ്ടത്രെ -സ്കീയിങ്ങ്,സ്നോ-റാഫ്ടിങ്ങ്,ഐസ്-സ്കള്‍പ്ച്ചേള്‍സ്... ഇങ്ങിനെ പലതും.വേനല്‍ക്കാലത്ത് 11 ദിവസ്സം നിണ്ടു നില്‍ക്കുന്ന ഇവിടെത്തെ മ്യൂസിക്ക് ഫെസ്റ്റിവെല്‍ പ്രസിദ്ധമാണ്..ഇതില്‍ വിശ്വവിഖ്യാതരായ പല പാട്ടുകാരും പങ്കെടുക്കാറുണ്ട്.

ഞങ്ങള്‍ വീതികുറഞ്ഞ രമണീയമായ വീഥികളിലൂടെ കുറേ ദൂരം നടന്നു.ഇരുവശത്തും മനോഹരമായ വീടുകള്‍.പുറത്ത് നിറയെ തൂക്കിയിട്ടിരിക്കുന്ന പൂച്ചെട്ടികള്‍.പാതക്കരികില്‍ വിശ്രമിക്കാനായി മരം കൊണ്ടുള്ള ബെഞ്ചുകള്‍. വേനല്‍ക്കാലമായതിനാല്‍ നിരത്തുകള്‍ വളരെ സജീവമാണ് .ഭക്ഷണശാലകളില്‍ സന്ദര്‍ശകരുടെ തിരക്ക്. ഇമ്പമുള്ള പിയാനോ സംഗീതം ആസ്വദിച്ച് ഇളം തണുപ്പില്‍ ഈ ഉലാത്തല്‍ ആനന്ദകരമായിരുന്നു.

അലങ്കരിച്ച കുതിരവണ്ടിയോടിക്കുന്ന വെള്ളക്കാരന്റെ വേഷവും തൊപ്പിയും കൌതുകമുളവാക്കുന്നതായിരുന്നു.‍ വണ്ടി നിറയെ വിനോദ സഞ്ചാരികള്‍.ഞങ്ങളെ ആകര്‍ഷിച്ചത് വൈദ്യുതിയില്‍ ഓടുന്ന ചെറിയ eco-bus കള്‍ ആണ്.ഇതിലെ യാത്ര വിനോദസഞ്ചാരികളെ ആകര്‍ഷിക്കാനായി സൌജന്യമാണ് .ഇറങ്ങുമ്പോള്‍ ബസ്സിലെ ഗൈഡ് ഒരു മരത്തില്‍ തറച്ചിരിക്കുന്ന വെടിയുണ്ട കാണിച്ചു തന്നു.യുദ്ധകാലത്തിന്റെ ഓര്‍മ്മക്കായി..

ക്യുബെക്കിന്റെ സ്കൈലൈന്‍ ആയ ഹോട്ടല്‍,Chateau Frontenae [Fairmont]കാണാനായി ഞങ്ങള്‍ ഉയരത്തിലേക്ക് കയറി.വളരെ വളരെ വലിയ അതിമനോഹരമായ ഹോട്ടലിനടുത്ത് നിന്ന് സെന്റ്-ലോറെന്‍സ് നദിയും പട്ടണവും കാണാന്‍ നല്ല ഭംഗിയുണ്ട്.

Hotel Fairmont

ഡിന്നര്‍ കഴിക്കാനായി താഴെ ഇറങ്ങിയത് Funicularല്‍ ആണ്.ഫുനികുലര്‍ ,മുകലിലേക്കും താഴേക്കും സഞ്ചരിക്കുന്ന കേബിള്‍ കാര്‍ ആണ്.ഇതിന്റെ ഗ്ലാസ്സ് ക്യാബിനില്‍ നിന്ന് താഴേക്കിറങ്ങുമ്പോള്‍ പുറത്തേക്കുള്ള കാഴച അതിമനോഹരമായിരുന്നു.
.

Funicular

View from Funicular

താഴെയിറങ്ങി ഡിന്നര്‍ കഴിച്ചതിന് ശേഷം അവിടെയുള്ള ഷോപ്പുകളില്‍ ഒക്കെ കയറിയിറങ്ങി.ഒരു ഷോപ്പില്‍ പല മൃഗങ്ങളുടേയും[മാന്‍,കാട്ടുപോത്ത്..] സ്റ്റഫ് ചെയ്ത തലകള്‍ ,തോലുകൊണ്ടുണ്ടാക്കിയ ജാക്കറ്റുകള്‍,ഹാന്‍ഡ് ബാഗുകള്‍,തൊപ്പികള്‍.......

Curio Shop

പിന്നീട് നടന്നെത്തിയത് ആര്‍ട്ടിസ്റ്റ് സ്ടീറ്റില്‍ ആണ്. വരി വരിയായി റോഡരികില്‍ ഉടനീളം വില്പനക്ക് വെച്ച മേന്മയേറിയ കലാസൃഷ്ടികള്‍ ,പെയ്റ്റിങ്ങുകള്‍ .ഒന്നു രണ്ടെണ്ണം ഞാന്‍ വാങ്ങി.

Artists Street

ഭംഗിയുള്ള അലങ്കാരങ്ങളും, പുരാതനമായ ആര്‍ക്കിടെക്ച്ചറും,ശാന്തമായ ജീവിതരീതിയും ഈ പട്ടണത്തെ തികച്ചും നിരുപമമാക്കുന്നു.രാത്രി 9മണിക്ക് ഒരു വ്യത്യസ്തമായ സര്‍ക്കസ്സ് ഷോ അവിടെ നടക്കുന്നുണ്ടെന്ന് അറിയാന്‍ കഴിഞ്ഞു.ഞങ്ങളും അത് കാണാന്‍ ഉത്സുകരായി. അത്യാധുനികവും, ലോകപ്രസിദ്ധവുമായ ഈ ഷോ തുറന്ന സ്ഥലത്താണ് നടത്തുന്നത്-അവിടെയുള്ള ഓവര്‍ബ്രിഡ്ജിന്റെ താഴെ വലിയ സ്റ്റേജ് ഒരുക്കിയിട്ടുണ്ട്. എതാണ്ട് 1000 ത്തോളം പേര്‍ അവിടെ തടിച്ചു കൂടിയിട്ടുണ്ട്.ഞങ്ങളും ആ ജനാവലിയില്‍ പങ്കു ചേര്‍ന്നു.പുല്‍ത്തകിടില്‍ ഇരുന്നുകൊണ്ടാണ് ഷോ കണ്ടത്.

Circ The Sole

പെട്ടെന്നാണ് ശബ്ദ്ധവും നീലവെളിച്ചവും ചുറ്റും പരന്നത്.ശബ്ദവും വെളിച്ചവും,ആക്രോബാറ്റിക്കും കൊണ്ട് മേന്മപുലര്‍ത്തിയ ഈ ഷോ ഒരു മായാലോകം തന്നെ ജനങ്ങള്‍ക്ക് ചുറ്റും സൃഷ്ടിച്ചു .AVATAR എന്ന സിനിമയിലെ പോലെ പറന്നുവരുന്ന പക്ഷികള്‍.wire ല്‍ വ്യത്യസ്ത ഭാഗങ്ങളില്‍ നിന്ന് ഒഴുകിവരുന്ന ചില mythological characters. ഇതിന്റെ അവതരണശൈലിയുടെ ശ്രേഷ്ടത എങ്ങിനെ വിവരിക്കണമെന്നനിക്കറിയില്ല.

Circ the Sole എന്ന പേരില്‍ വിശ്വവിഖ്യാതമായ Acrobatics Show ആണെത്രെ ഇത്.ഒരു നൃത്തനാടകമെന്നോ,സര്‍ക്കസ്സ് നാടകമെന്നോ ,അതോ ബാലെ എന്നോ എന്താണ് ഇതിനെ നാമകരണം ചെയ്യേണ്ടതെന്നറിയില്ല. മറ്റു രാജ്യങ്ങളില്‍ 200ഡോളര്‍ ആണ് ഇതിന്റെ ടിക്കറ്റിന്. ക്യുബെക്കില്‍ നിന്നാണത്രെ ഇതിന്റെ ഉത്ഭവം.അതിനാല്‍ ക്യുബെക്കുകാര്‍ക്ക് ഇവര്‍ സൌജന്യമായി അവതരിപ്പിക്കുന്നു.

Circ The Sole

രാത്രിയേറിയപ്പോള്‍ തണുപ്പ് വര്‍ദ്ധിച്ച് പല്ലുകള്‍ കൂട്ടിയിടിക്കാന്‍ തുടങ്ങി.ടാക്സി പിടിച്ച് ഹോട്ടലിലെത്തി.നാളെ കനഡാ ഡെ ആണ്. പരേഡ് കാണാന്‍ നേരത്തെ ഉണരണം.ബാക്കി വിശേഷം അടുത്ത പോസ്റ്റിലാവാം.

ഇവിടെ ക്ലിക്ക് ചെയ്താല്‍ Circ The Sole യുടെ വീഡിയോ ക്ലിപ് കാണാം.

വൈനറി ടൂറും, നയാഗ്ര വെള്ളച്ചാട്ടവും

2011-03-05T20:25:00.000-08:00

അമേരിക്കായാത്രക്ക് ശേഷം ടൊറോണ്ടോവിലെ വീട്ടില്‍ മടങ്ങിയെത്തി രണ്ടു ദിവസ്സം വിശ്രമിച്ചു. ഞാനും Mdsഉം കൂടി ,വീടിന്റെ ചുറ്റുവട്ടത്തുള്ള സൂപ്പര്‍മാര്‍ക്കറ്റൊക്കെ നടന്ന് കണ്ടു.അത്യാവശ്യം വീട്ടുസാധനങ്ങളും വാങ്ങാന്‍ പഠിച്ചു.പലപ്പോഴും ഉച്ചഭക്ഷണം പുറമെ നിന്ന് കഴിച്ചാണ് തിരിച്ച് വരുന്നത്..

Mds നാണെങ്കില്‍ പുറത്ത് പോയാല്‍ ഉടനെ കാപ്പി കുടിക്കണം.പോകുന്ന വഴിയിലുള്ള Star Bucks ല്‍ ഞങ്ങള്‍ കാപ്പികുടിക്കാന്‍ കയറി.അവരുടെ ലിസ്റ്റില്‍ കേട്ടുപരിചയമില്ലാത്ത പല പേരുകളും ഉണ്ട്.രണ്ട് Coffee Frappuccino ഓര്‍ഡര്‍ ചെയ്തു.സെല്‍ഫ് സെര്‍വീസ് ആണ്.

കുറച്ച് കഴിഞ്ഞപ്പോള്‍ caramel frappuccino എന്ന് വിളിച്ചു പറയുന്നത് കേട്ടു.ഇത് ഞങ്ങളുടെയാണോ എന്ന് അന്വേഷിച്ചു.അതെ എന്ന് മറുപടി കിട്ടി.പെരെന്തേ മാറിപ്പോയത് എന്ന് സംശയം തോന്നി.എന്തായാലും നല്ല സ്വാദുള്ള കാപ്പി .അവര്‍ വന്ന് ചോദിച്ചു-ആര്‍ യു ഓള്‍ റൈറ്റ്? ഞങ്ങള്‍ പറഞ്ഞു-യെസ്. കാപ്പി കുടിച്ച് പോകാന്‍ ഇറങ്ങിയപ്പോള്‍ അവര്‍ വന്ന് രണ്ട് കൂപ്പണുകള്‍ ഞങ്ങള്‍ക്ക് തന്നു.അടുത്ത തവണ രണ്ടു പേര്‍ക്കും ഫ്രീ ആയി കാപ്പി കുടിക്കാനുള്ളത്. പേര് മാറി കോഫി തന്നതിന് പരിഹാരമാണത്. ഞങ്ങള്‍ക്ക് അത്ഭുതം തോന്നി. ഇത്രയും ആതിഥ്യമര്യാദയോ?!!

ടൊറോണ്ടോവിലേക്ക് യാത്ര പുറപ്പെട്ടപ്പോള്‍ മനസ്സില്‍ ആഗ്രഹിച്ചത് ഒന്ന് മാത്രമാണ്.ലോകപ്രസിദ്ധമായ നയാഗ്ര വെള്ളച്ചാട്ടം കാണണം.ഒരു ഞായറാഴ്ച്ച ഞങ്ങള്‍ ഒരുങ്ങി.ടൊറോണ്ടോവില്‍ നിന്ന് 121കി.മി ദൂരമുണ്ട്.വഴി പറഞ്ഞു തരാന്‍ കാറില്‍ കൂടെ GPS സുന്ദരിയുണ്ട്.അതിനാല്‍ ആരോടും ചോദിക്കാതെ ഇടവും വലവും തിരിഞ്ഞു.വഴിയില്‍ പല തരം orchardകള്‍ കണ്ടു. പ്ലം,പീച്ച്,മുന്തിരിത്തോപ്പുകള്‍....പൊള്ളുന്ന വെയിലത്ത് മനസ്സിനെ തണുപ്പിക്കുന്ന കാഴ്ച്ച.

വഴിയില്‍ പല വൈനറികള്‍ ഉണ്ട്.ഞങ്ങള്‍ കനഡായിലെ പ്രസിദ്ധ വൈനറിയായ,Peller Estates കാണാന്‍ തീരുമാനിച്ചു.മുന്നില്‍ പുല്‍ത്തകിടില്‍ ,പുല്ലുകൊണ്ട് വെട്ടിയുണ്ടാക്കിയ മുയല്‍ രൂപങ്ങള്‍ കൌതുകമുള്ളതായിരുന്നു. പെല്ലെര്‍ എസ്റ്റേറ്റില്‍ ഇറങ്ങിയപ്പോള്‍ മനസ്സിലായി വിനോദസഞ്ചാരികള്‍ക്കായി അവിടെ ഒരു വൈനറി ടൂര്‍ തന്നെയുണ്ടെന്ന്.ഞങ്ങള്‍ അതിനായി ടിക്കറ്റ് എടുത്തു.ഏതാണ്ട് 25 പേരുണ്ട് ഈ ഗ്രൂപ്പില്‍.

Peller Estates

മെലിഞ്ഞു നീണ്ട ഒരു പെണ്‍കുട്ടിയായിരുന്നു ഞങ്ങളുടെ ടൂര്‍ ഗൈഡ്.എല്ലാവരും സ്വയം പരിചയപ്പെടുത്തി.പിന്നീട് അവള്‍ ഞങ്ങളെ കണ്ണെത്താത്ത ദൂരത്തില്‍ പരന്ന് കിടക്കുന്ന മുന്തിരിത്തോട്ടത്തിലേക്ക് നയിച്ചു. നിവര്‍ന്ന കൊമ്പുകളില്‍ പടര്‍ന്നു കയറുന്ന മുന്തിരിവള്ളികള്‍. അതില്‍ പിറന്നുവീണ അനേകം മുന്തിരിക്കുലകള്‍.പഴുത്ത മുന്തിരികള്‍ നിറഞ്ഞ ഈ തോട്ടം കാണാന്‍ എത്ര ഭംഗിയാവും. ഗൈഡ് മുന്തിരി പറിക്കുന്ന സമയത്തെ [സെപ്തംബര്‍-നവംബെര്‍] ക്കുറിച്ചും,ഐസ്സ് വൈന്‍ ഉണ്ടാക്കുന്ന രീതിയെക്കുറിച്ചും വിവരിക്കുന്നുണ്ട്.

ഐസ് വൈന്‍ ഉണ്ടാക്കാനായി എറ്റവും തണുപ്പുള്ള സമയത്ത് [പുലര്‍ച്ച 5മണി] വേണമത്രെ മുന്തിരി പറിക്കാന്‍. ഈ മരവിച്ച മുന്തിരി പ്രെസ്സ് ചെയ്യുമ്പോള്‍ ഒരു തുള്ളി ജൂസ്സ് ആണ് ഓരോ മുന്തിരിയില്‍ നിന്നും കിട്ടുന്നതത്രെ. അതിനാല്‍ ICE WINE വളരെ വിലപിടിച്ചതാണ്.നല്ല മധുരമുള്ള ഈ വൈന്‍ ഭക്ഷണത്തിന് ശേഷം ഒരു മധുരം പോലെയാണ് കഴിക്കാറ്.
\

വൈന്‍യാര്‍ഡിന് മുന്നില്‍

Winery tour

പിന്നീട് വൈന്‍ സംഭരിച്ചുവെച്ച ,ഓക്ക് ബാരലുകള്‍ നിറഞ്ഞ സ്റ്റോര്‍ റൂമിലേക്ക് ഞങ്ങളെ കൊണ്ടുപോയി.അവിടെ നിരനിരയായി ഓക്ക് ഡ്രമ്മുകള്‍ അടക്കി വെച്ചിട്ടുണ്ട്.ഫെര്‍മെന്റേഷന് ശേഷം വൈന്‍ ,ഓക്ക് ഡ്രമ്മുകളിലേക്ക് മാറ്റുന്നു.ഓക്ക് മരത്തിലടങ്ങിയിരിക്കുന്ന രാസവസ്തുക്കള്‍ വൈന് പ്രത്യേകമായ രുചിയും മണവും പകര്‍ന്നുകൊടുക്കുന്നു.3-6 മാസം വരെയാണ് സാധാരണ ഈ ഡ്രമ്മുകളില്‍ സൂക്ഷിക്കാണ്.

ഇനി പലതരം വൈന്‍ രുചിച്ചു നോക്കേണ്ടെ സമയമാണ്.ഗൈഡ് വൈന്‍ കുടിക്കേണ്ട രീതി വിവരിച്ചു തന്നു.എല്ലാവരും ഒന്നൊന്നായി പലതരത്തിലുള്ള വൈന്‍ ടേയ്സ്റ്റ് ചെയ്തു. മുന്തിരിയുടെ ഗുണമനുസ്സരിച്ച് വൈനിന്റെ സ്വാദിനും വ്യത്യാസം വരും. പിന്നിട് അവര്‍ ഞങ്ങളെ വിവിധതരം വൈനുകള്‍ വില്‍ക്കുന്ന, മനോഹരമായി അലങ്കരിച്ച വൈന്‍ സ്റ്റോറിലേക്ക് അനുഗമിച്ചു.അവിടത്തെ സുവിശേഷമായ ഐസ് വൈന്‍ ഞങ്ങള്‍ ഒരെണ്ണം വാങ്ങി.

വിശപ്പും,ദാഹവും ഞങ്ങളെ അലട്ടി തുടങ്ങി.പക്ഷേ ഇവിടെയുള്ള റെസ്റ്റോറെന്റില്‍ നിന്ന് കഴിച്ചാല്‍ പിന്നെ പോക്കറ്റില്‍ ചില്ലറ പോലും മിച്ചം കാണില്ല.അതിനാല്‍ അവിടെ നിന്ന് യാത്രയായി.

Wine store

നയാഗ്ര എത്തുമ്പോള്‍ വൈകുന്നേരമായി.നയാഗ്രയുടെ ഗര്‍ജ്ജനം അകലെ നിന്ന് തന്നെ കേല്‍ക്കാം.ഒച്ചയുണ്ടാക്കി താഴേക്ക് കുതിക്കുന്ന ഈ വെള്ളച്ചാട്ട നിരകളുടെ കമനീയതയെ വര്‍ണ്ണിക്കാന്‍ എനിക്ക് വാക്കുകള്‍ കിട്ടുന്നില്ല.ഗ്ലേഷിയര്‍ ഉരുകുമ്പോള്‍ മുകളിലുള്ള Great Lake നിറഞ്ഞ് കവിഞ്ഞ് ,170അടിയില്‍ കൂടുതല്‍ താഴേയുള്ള നയാഗ്ര നദിയില്‍ വീഴുന്നു.കനഡായുടെ Ontario പ്രോവിന്‍സ്സിന്റേയും,അമേരിക്കായുടെ സംസ്ഥാനാ‍മായ ന്യൂയോര്‍ക്കിന്റേയും ഇടയിലായുള്ള അന്തര്‍ദേശീയ പരിധിയിലാണ് ഇത് സ്ഥിതി ചെയ്യുന്നത്.

American Falls

അസാമാന്യമായ വീതിയും ഉയരവും ഉള്ള ഒരു അത്ഭുത പ്രതിഭാസം എന്നു തന്നെ ഈ വെള്ളച്ചാട്ടത്തെക്കുറിച്ച് വിശേഷിപ്പിക്കാം.

Horse Shoe Falls

ഈ വെള്ളച്ചാട്ടത്തിന് രണ്ട് ഭാഗങ്ങളുണ്ട്.Horse Shoe Fallsഉം,American Fallsഉം.ഇടയിലുള്ള തുരുത്ത് Goat Island എന്ന പേരില്‍ അറിയപ്പെടുന്നു.Horseshoe Falls കനഡായില്‍ ആണ്.അമേരിക്കന്‍ ഫോള്‍സ്സ് അമേരിക്കായുടെ ഭാഗത്തും.

താഴെയുള്ള ഫോട്ടോവില്‍ അമേരിക്കന്‍ ഫോള്‍സ്സിനടുത്ത് താഴേക്കിറങ്ങുന്ന മഞ്ഞ റെയിന്‍ കോട്ടിട്ട അമേരിക്കന്‍ വിനോദ സഞ്ചാരികളെ കാണാം.

വലത്ത് വശത്ത്-Bridal Veil Falls

നയാഗ്ര നദിയില്‍,വെള്ളച്ചാട്ടത്തിന്റെ തൊട്ടു താഴെ വരെ പോകാനുള്ള ബോട്ട് ടൂര്‍ ഉണ്ട്.‘Maid of the Mist’ എന്ന് നാമകരണം ചെയ്ത ഈ ടൂറിനായി ഞങ്ങള്‍ ആവേശത്തോടെ ക്യൂവില്‍ നിന്നു. എല്ലാവര്‍ക്കും ‘മെയ്ഡ് ഓഫ് ദ മിസ്റ്റ്’എന്നെഴുതിയ നീലനിറത്തിലുള്ള റെയിന്‍-കോട്ട് ധരിക്കാന്‍ തന്നു.

Maid Of The Mist Boat Tour

നദിയുടെ ശാന്തമായ ഭാഗത്തുനിന്ന് തുടങ്ങിയ ഈ ടൂര്‍,ആദ്യം അമേരിക്കന്‍ ഫോള്‍സ്സ് വഴി കൊണ്ടുപോയി.അമേരിക്കന്‍ ഫാള്‍സ്സിന് താഴെ ധാരാളം പാറക്കെട്ടുകളുണ്ട്.ചുറ്റും പറക്കുന്ന അനേകം സീഗള്‍ പക്ഷികള്‍. അവിടെ കണ്ട വൃത്താകൃതിയിലുള്ള മഴവില്ല് വിസ്മയജനകമാണ്. അമേരിക്കന്‍ ഫോള്‍സ്സിന്റെ ഒരു ഭാഗമായ Bridal Veil Falls ,നവവധുവിന്റെ തൂവെള്ള തട്ടം പോലെ അതിമനോഹരമാണ്.

പിന്നീട് ബോട്ട് ഹോര്‍സ്ഷൂ ഫോള്‍സ്സിന്റെ അടുത്തേക്കൊഴുകി. നദിയുടെ ഭാവം മാറിത്തുടങ്ങിയിരിക്കുന്നു.-സൌമ്യതയില്‍ നിന്ന് ക്രോധത്തിലേയ്ക്ക്. വെള്ളച്ചാട്ടം സൃഷ്ടിച്ച ഓളങ്ങളുടെ താളത്തിനൊത്ത് ബോട്ട് ആടിത്തുടങ്ങി.. വെള്ളം ശക്തിയോടെ താഴേയ്ക്ക് പതിക്കുമ്പോള്‍ മുകളിലേക്ക് ഉയരുന്ന മൂടല്‍ മഞ്ഞുപൊലെയുള്ള mist. അടുത്തെത്താറായപ്പോള്‍ കിട്ടിയ mist spray രോമാഞ്ചമണിയിക്കുന്നതായിരുന്നു.   ആകസ്മികമായി പെയ്ത ആ പെരുമഴയില്‍ ഞങ്ങളെല്ലാവരും കുളിച്ചു. . എല്ലാവരും ശരിക്കും ആസ്വദിച്ചു.

ബോട്ട് ടൂര്‍ കഴിഞ്ഞ് തിരിച്ചെത്തി എല്ലാവരും റെയിന്‍കോട്ട് അഴിച്ചു. ആവശ്യമുള്ളവര്‍ക്ക്   ഈ യാത്രയുടെ സ്മരണക്കായി റെയിന്‍കോട്ട്   ഏടുക്കാമെന്ന് പ്രഖ്യാപിച്ചതിനാല്‍ അത് മടക്കി ഞാന്‍ കയ്യില്‍ വെച്ചു.മനസ്സിനെ കോരിത്തരിപ്പിച്ച ഈ അനുഭവത്തിന്റെ ഓര്‍മ്മയ്ക്കായി ഒരു Souvenir .

   Maid Of The Mist Tour

മുകളില്‍ കേറുന്നതിനിടയില്‍ ഭക്ഷണശാല കണ്ടു.വെള്ളച്ചാട്ടത്തിന്റെ ഉര്‍ജ്ജവും,ഈണവും,ഭംഗിയും ഉള്‍ക്കൊണ്ട് ഞങ്ങള്‍ ഡിന്നര്‍ കഴിച്ചു.എവിടേ നിന്നാണ് ഇത്രയും നിലക്കാത്ത പ്രവാഹം ഉത്ഭവിക്കുന്നത്???!!!

Niagara at Night

പിന്നിട് മുകളില്‍ കയറി അരുകിലൂടെ നയാഗ്രയുടെ മിസ്റ്റ് ആസ്വദിച്ച് കുറേ ദൂരം നടന്നു. ഇവിടെ എല്ലായിപ്പോഴും പെയ്യുന്ന കുളിര്‍ മഴ ഉന്മേഷം പകരുന്നതാണ്.അവിടെ കണ്ട ഒട്ടുമുക്കാലും വിനോദസഞ്ചാരികള്‍ ഇന്ത്യക്കാരായിരുന്നു എന്നത് എന്നില്‍ അതിശയം ഉണ്ടാക്കി..

നേരം ഇരുട്ടിയപ്പോള്‍ പുറത്ത് ഉയര്‍ന്നു നില്‍ക്കുന്ന സ്റ്റേജില്‍, ലൈവ് മ്യൂസിക്ക് സജീവമായി.പല പ്രസിദ്ധ മ്യുസിഷ്യന്‍സും ഇവിടെ പ്രോഗ്രാം അവതരിപ്പിക്കാറുണ്ട്. മുന്നിലായി വലിയ കസിനോയും,പല റെസ്റ്റോറെന്റുകളും ഉണ്ട്.പലനിറത്തിലുള്ള ശക്തമായ ഫ്ലാഷ് ലൈറ്റുക്കള്‍ പുറമെനിന്ന് നയാഗ്രയിലേക്ക് കേന്ദ്രീകരിച്ചിരുന്നതിനാല്‍ ഇരുട്ടില്‍ ഇത് കൂടുതല്‍ രമണീയമായി.നീലയും,പച്ചയും,ചുവപ്പും നിറങ്ങള്‍ മാറി മാറി പ്രതിഫലിക്കുന്ന നയാഗ്ര കണ്ട് എത്ര നേരം വേണമെങ്കിലും ഇരിക്കാം. ഇവിടെ എന്നും ഉത്സവകാലമാണ്.

മനസ്സ് നിറഞ്ഞു.ഇനി വീട്ടിലേക്ക് മടങ്ങാം.

ഈ ലിങ്കില്‍ ക്ലിക്ക് ചെയ്താല്‍ നയാഗ്ര വീഡിയോ കാണാം.

വാഷിങ്ങ്ടണ്‍ ഡി സി

2011-02-05T00:54:00.000-08:00

ഇന്ന് ജൂണ്28‍.ഉച്ചയൂണ് കഴിഞ്ഞതോടെ ന്യൂയോക്കില്‍ നിന്ന് വാഷിങ്ങ്ടണിലേക്കുള്ള യാത്രക്കൊരുങ്ങി.അമേരിക്കായില്‍ ഒരു ട്രേയിന്‍ യാത്രചെയ്യാനുള്ള ആഗ്രഹവും സഫലമാവുകയായി.

താമസ്സിച്ചിരുന്ന ക്ലബ് ക്വാര്‍ട്ടേഴ്സ്സില്‍ നിന്ന് റേയില്‍വേ സ്റ്റേഷനിലേക്ക് തിരിച്ചു. 4മണിയോടെ യൂണിയന്‍ സ്റ്റേഷനിലെത്തി,Amtrak ല്‍ കയറി. ടിന്‍ന്റട് ഗ്ലാസ്സും,സ്ലൈടിങ്ങ് സീറ്റും,ഏസിയും ഒക്കെയായി സുഖപ്രദമായ യാത്ര. അമേരിക്കകാരിയായ തടിച്ച സ്ത്രീ ടിക്കറ്റ് ചെക്ക് ചെയ്യുന്നതിനോടൊപ്പം എല്ലാവരുമായി സൌഹൃദസംഭാഷണം നടത്തുന്നുണ്ട്.

Amtrak ന് മുന്നില്‍

പോകുന്ന വഴിയില്‍ കേട്ട് പരിചയമുള്ള ചില സ്റ്റേഷനുകള്‍ കണ്ടു-Baltimore,Philadelphia......7.30pm ന് Washington.DCസ്റ്റേഷനിലെത്തി.അമേരിക്കന്‍ പ്രസിഡണ്ടിന്റെ താമസ്സ്സ്ഥലത്തിന്റെ പ്രൌഢി വിളിച്ചറിയിക്കുന്ന വളരെ വലിയതും മനോഹരവുമായിരുന്നു സ്റ്റേഷന്‍ .താഴേയിറങ്ങി ട്രേയിനിന്റെ മുന്നെ നിന്ന് ഫോട്ടോ എടുക്കാന്‍ നേരത്ത് ,ടിക്കറ്റ് കളക്ടര്‍ ഞങ്ങള്‍ ആവശ്യപ്പെടാതെ തന്നെ ഞങ്ങളെ നാലുപേരെ മുന്നില്‍ നിര്‍ത്തി ഫോട്ടൊ എടുത്തു തന്നു.

Washington DC Railway station

ടാക്സി പിടിച്ച് Holiday Innലേക്ക് പുറപ്പെട്ടു. ന്യൂയോക്കിന്റെ തിരക്കോ,തിങ്ങിനിറഞ്ഞ അംബരചുംബികളായ കെട്ടിടങ്ങളോ ഇവിടെ അധികം കണ്ടില്ല.വീതിയുള്ള റോഡുകളും വൃത്തിയുള്ള നടപ്പാതകളും,കല്ലുകൊണ്ടുള്ള കെട്ടിടങ്ങളും ഞാന്‍ കൌതുകത്തോടെ നോക്കിയിരുന്നു..ഹോട്ടലിലെത്തി അല്പമൊന്നിരുന്ന് പുറത്തേക്ക് രാത്രിഭക്ഷത്തിനായി ഇറങ്ങി.മേപ്പ് നോക്കിയാണ് ഭക്ഷണശാല കണ്ടെത്തിയത്.നല്ല Thaiഭക്ഷണം കഴിച്ച് കുറച്ച് ചുറ്റി നടന്നു.

വാഷിങ്ങ്ടണ്‍ നഗരത്തില്‍

പിറ്റേന്ന് നേരത്തെ ഉണര്‍ന്നു.ആകെ ഈയൊരു ദിവസ്സമേ വാഷിങ്ങ്ടണ്‍ കാണാന്‍ വെച്ചിട്ടുള്ളൂ .ഇവിടെയുള്ള cherry blossom festival നടക്കുന്നത് ഏപ്രില്‍-മെയ് യില്‍ ആണ്.കാണാനുള്ളത് കുറെ നാഷനല്‍ മോണുമെന്റുകളും,മെമ്മോറിയലുകളും ആണ്.പിന്നെ ഒബാമയുടെ വീടൊന്നു കാണണം.

.

മെട്രോ പിടിച്ച് Smithsonian എന്ന സ്റ്റേഷനില്‍ ഇറങ്ങി.അവിടേനിന്ന് National Mall and Memorial Parksലേക്ക് നടക്കാവുന്ന ദൂരമേ ഉള്ളൂ.ഒരു പാട് സ്മാരകങ്ങളും,മ്യൂസിയവും,തണല്‍ വൃക്ഷങ്ങളും നിറഞ്ഞ, രണ്ട് മൈല്‍ പരന്ന് കിടക്കുന്ന ഈ പാര്‍ക്ക് ,അമേരിക്കായുടെ തലസ്ഥാനനഗരത്തിന്റെ ഹൃദയഭാഗത്താണ്. അവിടേയുള്ള Washington Monument ആണ് ഇന്നത്തെ ലക്ഷ്യം.

Washington Monument

അമേരിക്കായുടെ ആദ്യത്തെ പ്രസിഡണ്ടായ George Washingtonന്റെ സ്മരണക്കായി പണിതീര്‍ത്ത , നാല് വശങ്ങളുള്ള പിരമിഡ് പോലുള്ള മനോഹരമായ ഒരു സ്തൂപമാണ് വാഷിങ്ങ്ടണ്‍ മോണുമെന്റ്. 555അടി പൊക്കമുള്ള ഇത് വാഷിങ്ങ്ടണ്‍ നാഷനല്‍ മാളിന്റെ പടിഞ്ഞാറ് വശത്താണ്.

മാര്‍ബിളും,ഗ്രാനൈറ്റും,സേന്‍ഡ് സ്റ്റോണും കോണ്ടു നിര്‍മ്മിച്ച ഈ മഹാസ്തംഭം വാഷിങ്ങ്ടണിലെ ഏറ്റവും ഉയര്‍ന്ന ഘടനയാണ്.1848ല്‍ ഇതിന്റെ നിര്‍മ്മാണം തുടങ്ങിവെച്ചെങ്കിലും പല കാരണങ്ങളാലും 1884ലാണ് അത് പൂര്‍ത്തിയായത്--ഇതിന്റെ ആര്‍ക്കിടെക്ട് ആയ Robert Mills മരിച്ച് 30 വര്‍ഷത്തിന് ശേഷം!!!അത് കൊണ്ട് അതിന്റെ കാല്‍ഭാഗം കഴിഞ്ഞാല്‍ നിറവ്യത്യാസം കാണാം. ഇതിന്റെ പടിഞ്ഞാറ് വശത്തായി Reflecting poolഉം,Lincoln Memorialലും ആണ്.

വാഷിങ്ങ്ടണ്‍ മെമ്മോറിയലിന്റെ അടുത്തു തന്നെയാണ് World war-II Memorial. രണ്ടാം ലോകമഹായുദ്ധത്തില്‍ പങ്കെടുത്ത 160 ലക്ഷം പട്ടാളക്കാര്‍ക്കും, 404800 വീരചരമമടഞ്ഞവര്‍ക്കും ആയി സമര്‍പ്പിച്ച സ്മാരകമാണിത്.അവിടെയുള്ള Freedom wall ല്‍ 4048 golden stars കാണാം.ഒരോ സ്റ്റാറും ,മരിച്ച ഓരോ നൂറ് അമേരിക്കാകാരെ പ്രതിനിധീകരിക്കുന്നു.

World war-II Memorial

നടുവില്‍ തടാകവും ഫൌണ്ടനും.ചുറ്റും അര്‍ദ്ധവൃത്താക്രതിയില്‍ ഒരുക്കിയ 56 ഗ്രാനൈറ്റ് തൂണുകള്‍.ഒരോ തൂണിലും അമേരിക്കായുടെ ഓരോ സംസ്ഥനങ്ങളുടെ പേരും,ഒരു ബ്രോണ്‍സ് റീത്തും ഉണ്ട്..തെക്കും,വടക്കും വശത്തായി Pacific എന്നും Atlantic എന്നുംകൊത്തിവെച്ച രണ്ട് ആര്‍ച്ചുകള്‍ .ആര്‍ച്ചിനുള്ളില്‍ മുകളിലായി ബ്രോണ്‍സില്‍ തീര്‍ത്ത ഈഗിളുകളും റീത്തും.

WorldwarII Memorial Arch

ആര്‍ച്ചിനുള്ളില്‍

റിഫ്ലെക്ടിങ്ങ് പൂള്‍ ,നീണ്ട ദീര്‍ഘചതുരത്തിലുള്ള തടാകമാണ്. ഏകദേശം 2000അടി നീളവും,167അടി വീതിയും ഇതിനുണ്ട്.ഇതിന്റെ വശങ്ങളില്‍ നടപ്പാതകളും,തണല്‍ വൃക്ഷങ്ങളും ഉണ്ട്. ഒരറ്റത്ത് വാഷിങ്ങ്ടണ്‍ മോണുമെന്റിന്റേയും,മറ്റേ അറ്റത്ത് ലിങ്കന്‍ മെമ്മോറിയലിന്റേയും പ്രതിബിംബം ഇതിലെ വെള്ളത്തില്‍ കാണാം.രാത്രി പ്രകാശിതമായ ഈ പാര്‍ക്ക് അതിമനോഹരമായിരിക്കുമെന്ന് മനസ്സിലോര്‍ത്തു.

Reflecting Pool

അമേരിക്കായുടെ പതിനാറാമത്തെ പ്രസിഡണ്ടായ അബ്രഹാം ലിങ്കനെ ആദരിക്കാനായി നിര്‍മ്മിച്ചതാണ് Lincoln Memorial. അടിമത്തം നിര്‍മ്മാര്‍ജ്ജനം ചെയ്ത, എല്ലാവര്‍ക്കും തുല്യാവകാശം നല്‍കിയ, സ്വാതന്ത്ര്യത്തിന്റെ ചിഹ്നമായ അബ്രഹാം ലിങ്കന്റെ മാര്‍ബില്‍ പ്രതിമ സര്‍ദര്‍ശകര്‍ക്ക് പ്രചോദനം നല്‍കും..വടക്കും,തെക്കുമുള്ള ചുമരുകളില്‍ അദ്ദേഹം നടത്തിയ ചരിത്രപ്രധാനമായ ഭാഷണം എഴുതി വെച്ചിട്ടുണ്ട്.ഇവിടെനിന്ന് നോക്കിയാല്‍ റിഫ്ലെക്ഷന്‍ പൂള്‍,വേള്‍ഡ് വാര്‍ മെമ്മോറിയല്‍,വാഷിങ്ങ്ടണ്‍ മോണുമെന്റ്,U.S Capitol എന്നിവ ഒരു വരിയില്‍ കാണാം.

Lincoln Memorial

Statue of Abraham Lincoln

View from Lincoln Memorial

പാര്‍ക്കില്‍ നിറയെ മരങ്ങളുള്ളതിനാല്‍ തണലിലൂടെ നടന്നു.ഇത്ര വലിയ പാര്‍ക്കാണെങ്കിലും ഉടനീളം പുല്ല് വെട്ടിനിര്‍ത്തി പച്ച പരവതാനി വിരിച്ചത് പോലെ ഭംഗിയാക്കിയിരിക്കുന്നു. 38ഡിഗ്രിയിലപ്പുറമാണ് ചൂട്.

ഒരു വഴിയോരക്കാഴ്ച്ച

U.S.Capitolലിലാണ് അമേരിക്കന്‍ കോണ്‍ഗ്രസ്സിന്റെ മീറ്റിങ്ങ് നടക്കുന്നത്.നടന്ന് ക്ഷീണിച്ചിരുന്നതിനാല്‍ അവിടേക്ക് ടാക്സിയില്‍ പോയി.ഇതിനുള്ളില്‍ കയറി കാണാന്‍ സന്ദര്‍ശകര്‍ക്ക് സൌജന്യമായി ടിക്കറ്റ് കിട്ടും.പക്ഷേ സമയക്കുറവ് മൂലം ഞങ്ങള്‍ക്കതിന് സാധിച്ചില്ല.Capitol Hillന് മുകളില്‍ ഭംഗിയായി നിര്‍മ്മിച്ച ഈ സ്ഥാപനം നല്ലൊരു കാഴ്ച്ചയായിരുന്നു.പോകുന്ന വഴിയില്‍ Old Executive Office [Eisenhower Executive Office] കാണാന്‍ സാധിച്ചു.ഇത് Federal office ആണ്- പ്രസിഡണ്ടിന്റെയും ,വൈസ് പ്രസിഡെണ്ടിന്റെയും എക്സികൂട്ടിവ് ഓഫീസ്സ്.ഇതിനടുത്താണ് White House.

Eisenhower Executive Office

US Capitol

വൈറ്റ് ഹൌസിനടുത്ത് എത്താറായപ്പോള്‍ മനസ്സിലായി അവിടേക്ക് പ്രവേശനം നിരോധിച്ചിരിക്കുന്നു.സമയം വൈകിയതിനാലാവാം.10-12 മണിവരെയാണ് സന്ദര്‍ശകരെ അനുവദിക്കുകയുള്ളൂ.മറ്റൊരു വഴിയിലൂടെ പോയി പിന്‍ഭാഗത്തെത്തി.

White house -rear view

അമേരിക്കന്‍ പ്രസിഡെണ്ടിന്റെ ഔദ്യോഗിക വസതിയായ വൈറ്റ് ഹൌസ്,സാന്‍ഡ് സ്റ്റോണില്‍ നിര്‍മ്മിച്ച, വെളുത്ത നിറമടിച്ച ഒരു രണ്ട്നില കെട്ടിടമാണ്.ഇതില്‍ അതിഥികളെ സ്വീകരിക്കാനായി ബ്ലൂ റൂം,വിരുന്ന് നടത്താനായി ഈസ്റ്റ് റൂം,140 വിരുന്ന്കാരെ ഒപ്പമിരുത്താനുള്ള ഡൈനിങ്ങ് റൂം,മീറ്റിങ്ങ് നടത്താനായി ഓവല്‍ ഓഫീസ്സ് ....തുടങ്ങിയ സൌകര്യങ്ങളുണ്ട്.

ഈ കോംബ്ലെക്സില്‍ West wing, Cabinet-room, Roosevelt room, East wing,old Executive office building എന്നിവ അടങ്ങിയിരിക്കുന്നു.ഒബാമ ടൊറോണ്ടോവില്‍ G20 മീറ്റിങ്ങിനായി പോയിരിക്കുന്ന സമയമായിരുന്നു ഇത്. വൈറ്റ് ഹൌസ്സിള്ളില്‍ കയറി കാണാനായി self guided tourനുള്ള ഫ്രീ ടിക്കറ്റ് ലഭ്യമാണത്രെ.പക്ഷേ ആറ് മാസം മുന്നെയെങ്കിലും ബുക്ക് ചെയ്യണം.അത് കൊണ്ട് പുറമെ നിന്ന് കണ്ട് തൃപ്തിയടയേണ്ടി വന്നു.
.

വൈറ്റ് ഹൌസിന് മുന്നില്‍

ചൂടും,വിശപ്പും ദാഹവും അലട്ടാന്‍ തുടങ്ങിയപ്പോള്‍ ഹോട്ടലിലേക്ക് തിരിച്ചു.ഇവിടേയുള്ള പല പ്രധാനപ്പെട്ടതും-വിയറ്റ്നാം മെമ്മോറിയല്‍,കൊറിയന്‍ വാര്‍ മെമ്മോറിയല്‍,ബൊട്ടാണിക് ഗാര്‍ഡെന്‍,നാഷണല്‍ ഗാലറി ഓഫ് ആര്‍ട്ട്, മ്യൂസ്സിയം......തുടങ്ങിയവ കാണാന്‍ കഴിയാത്തതില്‍ ഖേദമുണ്ട്.

ഭക്ഷണം കഴിച്ച് പെട്ടിയൊക്കെ അടക്കിയൊതുക്കണം.വൈകുന്നേരത്തെ ഫ്ലൈറ്റില്‍ ടൊറോണ്ടോവിലേക്ക് മടങ്ങണം.അവിടെത്തെ വിശേഷം ചെന്നിട്ടാവാം.

താഴെ കൊടുത്ത ലിങ്കില്‍ ക്ലിക്ക് ചെയ്താല്‍ വീഡിയോ ക്ലിപ്പ് കാണാം.
Video Tour Link

Madame Tussauds-Newyork

2011-01-12T01:31:00.000-08:00

ഇന്ന് ന്യൂയോര്‍ക്കിലെ റോക്ക്ഫെല്ലര്‍ സെന്റ്റും, ടൈം സ്ക്വൊയറും കാണാനാണുദ്ദേശം. താമസ്സിച്ചിരുന്ന ക്ലബ്-ക്വാര്‍ട്ടേഴ്സിനടുത്തുള്ള കോഫീ ഷോപ്പില്‍ നിന്ന് ബ്രേക്ഫാസ്റ്റ് കഴിച്ച് ഞങ്ങള്‍ പതുക്കെ റോഡരികിലൂടെ റേയില്‍വേ സ്റ്റേഷനിലേക്ക് നടന്നു.കാലത്തായതിനാല്‍ നല്ല ഉന്മേഷം തോന്നി. ഉച്ചയായാല്‍ പൊള്ളുന്ന വെയില്‍ ആണ്.

10മിനിട്ട് ട്രേയിന്‍ യാത്ര ചെയ്തപ്പോഴേക്കും ഇറങ്ങേണ്ട സ്റ്റേഷനെത്തി. അടുത്തുള്ള St.Patrick's Cathedral ലക്ഷ്യമാക്കി നടന്നു.ഇത് അമേരിക്കായിലെ ഏറ്റവും വലിയ റോമന്‍ കാത്തലിക് ചര്‍ച്ച് ആണ്.12 side chapels ഉള്ള ഈ ചര്‍ച്ചിന്റെ ഉള്ളിലെ stained-glass ജനവാതിലുകള്‍ അതിമനോഹരമാണ്. ഈ ചര്‍ച്ചിലെ വിശ്വവിഖ്യാതമായ Rose Window,നിര്‍മ്മിച്ചത് പ്രശസ്ത കലാകാരനായ Charles Con nick ആണ്.

St.Patrick's Cathedral

Rose-Window

Rockefeller center നെ അഭിമുഖീകരിച്ചാണ് സെന്റ്-പാട്രിക് കത്തീട്രല്‍ സ്ഥിതി ചെയ്യുന്നത്.Manhattan ടൌണിന്റെ മദ്ധ്യത്തില്‍ 22 ഏക്കര്‍ സ്ഥലത്ത്, 19 ഉയര്‍ന്നു നില്‍ക്കുന്ന കെട്ടിടങ്ങള്‍ ഉള്ള ഒരു private commercial plazaയാണ് റോക്ക്ഫെല്ലര്‍ സെന്റര്‍. ഇത് നിര്‍മ്മിച്ചത് റോക്ക്ഫെല്ലര്‍ കുടുംബമാണ്. John D Rockefeller Jr ആ ണ് ഇതിന്റെ സ്ഥാപകന്‍.

പല ഓഫീസ്സുകള്‍,റെസ്റ്റോറെന്റുകള്‍,സിനിമ ബ്രോഡ് കാസ്റ്റിങ്ങ് സ്റ്റേഷനുകള്‍,മ്യൂസിക് ഹാള്‍,ഷോപ്പുകള്‍ നിറഞ്ഞതാണ് റോക്ക്ഫെല്ലര്‍ സെന്റര്‍. .ഈ പ്ലാസയുടെ പലയിടങ്ങളിലും പ്രസിദ്ധരായ പല കലാകാരന്മാരുടെയും ശ്രേഷ്ഠ്മായ സൃഷ്ടികള്‍ കാണാം.

Statue of Atlas

ഈ പ്ലാസായുടെ സെന്ററിലുള്ള 70നിലയുള്ള GE Building വിനോദസഞ്ചാരികളുടെ ആകര്‍ഷണകേന്ദ്രമാണ്. ഇതിന്റെ മുകളിലെ ഒബ്സെര്‍വേഷന്‍ ഡെസ്ക്കില്‍ ‍[Top Of The Rock] നിന്നാല്‍ ന്യൂയോക്ക് സിറ്റി മുഴുവന്‍ തടസ്സങ്ങളില്ലാതെ കാണാം. NBC [National Broadcasting Company]യുടെ ഹെഡ് ക്വാര്‍ട്ടേഴ്സ് ഈ കെട്ടിടത്തിലാണ്.

GE Building--Rockefeller Center

റൊക്ക്ഫെല്ലര്‍ പ്ലാസായിലെ മറ്റൊരു ബില്‍ഡിങ്ങിലാണ് Radio City Music Hall. Music concert നടത്താനായി 6000സീറ്റുകളുള്ള തിയ്യറ്റര്‍ ആണിത്.ഒരു കാലത്ത് ഇത് ലോകത്തിലെ ഏറ്റവും വലിയതും മേന്മയുള്ളതുമായ തിയ്യറ്റര്‍ ആയിരുന്നു.

Radio City Music Center

പ്ലാസയുടെ താഴെയുള്ള കഫെറ്റേരിയായില്‍ സ്വര്‍ണ്ണനിറത്തിലുള്ള Prometheus[Greek mythology hero]ന്റെ കണ്ണഞ്ചിപ്പിക്കുന്ന പ്രതിമയുണ്ട്. UNനിലെ അംഗങ്ങളായ രാജ്യങ്ങളുടേയും, അമേരിക്കായുടെ വിവിധ സംസ്ഥാനങ്ങളുടേയും 200ഓളം കൊടികള്‍ ചുറ്റും കാണാം.

Statue of Prometheus

പിന്നീട് ഞങ്ങള്‍ ന്യൂയോര്‍ക്ക് സിറ്റിയിലെ ഏറ്റവും സജീവമായ time squareല്‍ എത്തി.ധാരാളം ഷോപ്പിങ്ങ് മാള്‍സ്സും,ഹോട്ടലുകളും,തിയ്യറ്ററുകളും,നൈറ്റ്ക്ലബ്സും നിറഞ്ഞതാണ് ടൈം സ്ക്വൊയര്‍ .ന്യൂയോക്കിലെ മറ്റൊരു സ്റ്റോക്ക് എക്സ്ചേയ്ച് ആയ NASDAQ ഇവിടെയാണ്. ഇവിടെത്തെ ജനാവലി കണ്ടപ്പോള്‍ തൃശൂര്‍ പൂരം കണ്ട് മടങ്ങുന്ന തിരക്കാണ് ഓര്‍മ്മ വന്നത്.

Times Square

NASDAQന് മുന്നില്‍

ഇവിടെയുള്ള Madame Tussauds Wax Museum കാണാന്‍ ഞങ്ങള്‍ ടിക്കറ്റ് എടുത്തു.വിവിധ മേഖലയില്‍ പ്രസിദ്ധരായ വ്യക്തികളുടെ മെഴുകുപ്രതിമകള്‍ ജീവനുള്ളത് പോലെ തോന്നി.പലയിടത്തും മനുഷ്യര്‍ പ്രതിമകള്‍ പോലെനിന്ന് കാഴ്ചക്കാര്‍ വരുമ്പോള്‍ പേടിപ്പിക്കുന്നത് രസകരമായി .അവിടെ തിയ്യറ്ററില്‍ പ്രദര്‍ശിപ്പിച്ച 4D film വളരെ വിഭിന്നമായിരുന്നു.ഫിലിം കാണുന്നതിനിടയില്‍ ഇരിക്കുന്ന സീറ്റ് ചലിപ്പിച്ചും,മുഖത്തേക്ക് വെള്ളം തെറിപ്പിച്ചും ചിത്രത്തെ യാഥാര്‍ത്ഥമാക്കി.

Marie Tussaud എന്ന ഫ്രഞ്ച് കലാകാരിയാണ് ഇതിന്റെ സ്ഥാപക.മേരിയുടെ അമ്മ, Dr.Philip എന്ന ഒരു ഫിസിഷ്യന്റെ വീട്ടുജോലിക്കാരിയായിന്നു .വാക്സ് പ്രതിമയുണ്ടാക്കുന്ന കലാകാരന്‍ കൂടിയായിരുന്ന ഡോക്ടര്‍ ,മേരിക്ക് തന്റെ കലാചാതുര്യം പകര്‍ന്ന് കൊടുത്തു.ഡോക്ടറുടെ മരണത്തിന്ന് ശേഷം മേരി അദ്ദേഹത്തിന്റെ മെഴുകു പ്രതിമാശേഖരത്തിന്റെ അനന്തരാവകാശിയായി.1835ല്‍ അവര്‍ ലണ്ടനില്‍ ആദ്യത്തെ വാക്സ് മ്യൂസിയം തുറന്നു.

പിന്നീട് ന്യൂയോക്ക്,ഹോങ്ങ്കോങ്ങ്,ബാങ്കോക്ക്,...തുടങ്ങിയസ്ഥലങ്ങളില്‍ തുടങ്ങി.2007മുതല്‍ Merlin entertainments ആണ് ഇതിന്റെ നടത്തിപ്പുകാര്‍.

നാളെ ഞങ്ങള്‍ ന്യൂയോര്‍ക്കില്‍ നിന്ന് വാഷിങ്ങ്ടണിലേക്ക് പോവുകയാണ്.അവിടെത്തെ വിശേഷം അടുത്ത പോസ്റ്റിലാകാം.

ന്യൂയോര്‍ക്ക് നഗരത്തില്‍ ഒരു ഓട്ടപ്രദക്ഷിണം

2010-12-01T09:32:00.000-08:00

ടൊറോണ്ടൊവില്‍ നിന്ന് വാഷിങ്ങ്ടണ്‍ലേക്കുള്ള യാത്ര അമേരിക്കായുടെ United Airlines ല്‍ ആയിരുന്നു.പ്ലേയിന്‍ ടെയ്ക് ഓഫിനായി റണ്‍ വേ യില്‍ എത്തി..പ്ലെയിനില്‍ സീറ്റ്പോക്കറ്റിലെ മേഗസിനില്‍ നിന്ന് യുനൈറ്റെട് എയര്‍ലൈനെ കുറിച്ച് സ്തുതിഗീതങ്ങള്‍ [365 ദിവസവും സമയം പാലിച്ച ഫ്ലൈറ്റ്.....] വായിച്ച് കൊണ്ടിരിക്കെ ഒരു വിജ്ഞാപനം-ടെക്നിക്കല്‍ ഫോല്‍ട്ട് കാരണം പ്ലെയിന്‍ റിപെയറിനായി തിരിച്ച് പോവുകയാണെന്നും,അതിനാല്‍ ടെയ്ക്ക് ഓഫ് ചെയ്യാന്‍ താമസ്സിക്കുമെന്നും.

പുലര്‍ച്ച 6മണിക്ക് പുറപ്പെടേണ്ട പ്ലേയില്‍ 8മണിക്ക് ശേഷമാണ് ടെയ്ക്ക് ഓഫ് ചെയ്തത്.ഞങ്ങള്‍ക്കാണെങ്കില്‍ വാഷിങ്ങ്ടണില്‍ എത്തി ഒമ്പതരക്ക് ന്യൂയോര്‍ക്കിലേക്കുള്ള പ്ലേയ്നില്‍ കയറണം.വാഷിങ്ങ്ടണ്‍ Dulles Airportല്‍ ഇറങ്ങിയപ്പോള്‍ സമയം പത്ത് മണി. ഞങ്ങളുടെ വാഷിങ്ങ്ടണ്‍ ഫ്ലൈറ്റ് പോയ്ക്കഴിഞ്ഞിരുന്നു. ഗ്രൌണ്ട് സ്റ്റാഫിനെ സമീപിച്ചപ്പോള്‍ അവര്‍ യാതൊരു ഉത്തരവാദിത്വവും ഏറ്റെടുക്കാന്‍ തെയ്യാറായില്ല. അമേരിക്കകാരുടെ ഔദ്ധത്യം അവിടെ പ്രകടമായിരുന്നു.വളരെ നേരം തര്‍ക്കിച്ചതിന് ശേഷം ഉച്ചയ്ക്ക് 12.30ക്ക് ഉള്ള ഫ്ലൈറ്റില്‍ ഞങ്ങള്‍ക്ക് ഇടം തന്നു.അവിടെയുള്ള കോഫിഷോപ്പില്‍ നിന്ന് ബ്രേക്ക്ഫാസ്റ്റ് കഴിച്ച് ന്യൂയോക്കിലെ JF Kennedy എയര്‍പോര്‍ട്ടിലേക്ക് യാത്രയായി.ഒരു മണിക്കൂറില്‍ ന്യൂയോര്‍ക്കില്‍ എത്തി.

ഞങ്ങള്‍ ബുക്കുചെയ്തിരുന്ന ഹോട്ടലില്‍ [Club Quarters] എത്തുമ്പോള്‍ സമയം മൂന്നര മണി.21 നിലയുള്ള ഹോട്ടല്‍. മുന്നിലെ റോഡിനിരുവശത്തും കണ്ണെത്താത്ത ഉയരത്തില്‍ ഉയര്‍ന്ന് തിങ്ങി നില്‍ക്കുന്ന കെട്ടിടങ്ങള്‍ എനിക്ക് ശ്വാസം മുട്ട് ഉണ്ടാക്കി..ഹോട്ടല്‍ Wall streetല്‍ ആയിരുന്നതിനാല്‍ എല്ലാ historic placesലേക്കും നടക്കാനുള്ള ദൂരമേ ഉള്ളൂ.

ഞങ്ങള്‍ താമസ്സിച്ച ഹോട്ടലിന് മുന്നില്‍

അവിടെ നിന്ന് കുറച്ച് ദൂരം നടന്നാല്‍ Ground Zeroല്‍ എത്താം-11-Sep-2001ല്‍ ലോകത്തെ ഞെട്ടിപ്പിച്ച ദുരന്തം സംഭവിച്ച സ്ഥലം.World Trade center ലെ രണ്ട് എറ്റവും ഉയര്‍ന്ന Towers വിമാനം ക്രാഷ് ചെയ്ത് തകര്‍ത്ത ആ ഭീകരാക്രമണത്തിന്റെ രംഗം ഇന്നും മനസ്സില്‍ നിന്ന് മാഞ്ഞിട്ടില്ല. ഏതാണ്ട് മൂവായിരത്തോളം നിഷ്കളങ്കരുടെ ജീവന്‍ ബലികൊടുത്ത കുരുതിക്കളം. അമേരിക്കായുടെ ഇതിഹാസത്തിലെ കറുത്ത അദ്ധ്യായം.

Sep11-2001 മുന്‍പ് എടുത്ത ചിത്രം-ഉയന്ന് നില്‍ക്കുന്ന രണ്ട് World Trade Center Towers

World Trade Center attack-Sep 11-2001

World Trade Center Preview Site

അവിടെ നിലം പതിച്ച ആ ടവേഴ്സിന്റെ അവശിഷ്ടങ്ങള്‍ മാറ്റാന്‍ തന്നെ ഒരു കൊല്ലത്തിലേറെയെടുത്തു. ഇന്ന് അവിടം ശാന്തമൂകമാണ്. അവിടെ ഒരു Memorial പണിതീര്‍ക്കുവാന്‍ തീരുമാനിച്ചു. അതിനായി world trade center memorial competition 2004ജനുവരിയില്‍ നടത്തി. 5000 entries ല്‍ നിന്ന് തിരഞ്ഞെടുത്തത് Peter Walker &Arad [Israeli American architect] ന്റെ ഡിസൈന്‍ ആയിരുന്നു-

World Trade Center Memorial design

രണ്ടു ടവ്വറുകളുടേയും അടിത്തറ നിലനിര്‍ത്തി [വെള്ളം നിറച്ച്],അതിന്റെ ചുമരില്‍ ഈ ദുരന്തത്തില്‍ മൃതിയടഞ്ഞവരുടെ പേരെഴുതി, ചുറ്റും വൃക്ഷങ്ങളും,മ്യൂസിയവും ഉള്ള ഒരു മെമ്മോറിയല്‍ .Sep11-2011 ല്‍ പണിതീര്‍ക്കാനുദ്ദേശിക്കുന്ന ഈ മെമ്മോറിയലിന്റെ പുരോഗതി വളരെ സാവധാനത്തിലാണ്.

World Trade Center Memorial Construction Site

സൈറ്റിന് മുന്നില്‍ പല demonstrationനും നടക്കുന്നുണ്ടായിരുന്നു.-മൂന്നാമതൊരു ടവ്വര്‍ രണ്ടു ദിവസത്തിന് ശേഷം വീണത് അമേരിക്കാ തന്നെ വീഴ്ത്തിയതാണെന്നും....അങ്ങിനെ പലതും.

ഇവിടെ നിന്ന് 15 മിനിട്ട് നടന്നാല്‍ Brooklyn Bridgeല്‍ എത്താം. 1883യില്‍ East Riverന്റെ മുകളിലൂടെ പണിതീര്‍ത്ത ഈ തൂക്കുപാലം ലോകത്തിലെ ആദ്യത്തെ steel-wire suspension bridgeആണ്.

Brooklyn Bridge

ബൂക്ലിന്‍ബ്രിഡ്ജിന്റെ പഴക്കം കാരണം ഇപ്പോള്‍ വാഹനങ്ങള്‍ അവിടെ നിരോധിച്ചിരിക്കുന്നു. വിനോദസഞ്ചാരികളേയും, സൈക്ലിങ്ങ് ചെയ്യുന്നവരേയും ആണ് അവിടെ കാണാന്‍ കഴിഞ്ഞത്. Williams Burg Bridge [ East riverന് മുകളിലൂടെയുള്ള മറ്റൊരു സസ്പെന്‍ഷന്‍ ബ്രിഡ്ജ്] ആണ് ഇപ്പോള്‍ യാത്രക്കാര്‍ ഉപയോഗിക്കുന്നത്. ബ്രൂക്ലിന്‍ ബ്രിഡ്ജില്‍ നിന്ന് മന്‍ഹാട്ടന്‍ സിറ്റിയുടെ കാഴ്ച മനോഹരമാണ്. ഇവിടെ നിന്നാല്‍ Empire State Building അടക്കം പല പ്രധാന സ്ഥാപനങ്ങളും കാണാം.

ബ്രൂക്ലിന്‍ ബ്രിഡ്ജില്‍

ഈ പാലത്തിനും പറയാനുണ്ട് കുറെ മനുഷ്യരുടെ ത്യാഗത്തിന്റെ കഥ.1869ല്‍ തുടങ്ങിയ വെച്ച ഇതിന്റെ പണി പൂര്‍ത്തിയായത് 14 വര്‍ഷത്തിന് ശേഷമാണ്.

ബ്രൂക്ലിന്‍ ബ്രിഡ്ജില്‍ നിന്ന് Manhattan city view

John Roebling എന്ന പ്രസിദ്ധനായ സിവില്‍ എഞ്ചിനീയറാണ് ഈ ബ്രിഡ്ജ് ഡിസൈന്‍ ചെയ്തത്. 1867ല്‍ അദ്ദേഹം ബ്രൂക്ലിന്‍ ബ്രിഡ്ജിന്റെ ചീഫ് എഞ്ചിനീയറായി നിയമിക്കപ്പെട്ടു. ഈ ബ്രിഡ്ജിന് അനുയോജ്യമായ സ്ഥലം നിരീക്ഷിക്കുന്നതിനിടയില്‍ നിര്‍ഭാഗ്യവശാല്‍ ഒരു ഫെറി അപകടത്തില്‍ അദ്ദേഹത്തിന്റെ കാലില്‍ ഗുരുതരമായ പരിക്കേറ്റു. തുടര്‍ന്നുണ്ടായ ഇന്‍ഫെക്ഷന്‍ മൂലം 1869ല്‍ അദ്ദേഹം മരണമടഞ്ഞു.

പിന്നില്‍ Williams Burg bridge

അതിന് ശേഷം അദ്ദേഹത്തിന്റെ മകനായ Washington Roebling ചീഫ് എഞ്ചിനീയറായി ചുമതലയേറ്റു. പാലത്തിന്റെ അടിത്തറ പണിയാനായി വെള്ളം ഉള്ളില്‍ കടക്കാത്ത compressed air chamber [caisson] ലാണ് ജോലിക്കാര്‍ നദിയുടെ അഗാധതയിലേക്ക് പോയിരുന്നത്.വളരെ ബുദ്ധിമുട്ടുള്ള പരിത:സ്ഥിതിയിലായിരുന്നു അവരുടെ ജോലി. അതില്‍നിന്ന് പുറത്തേക്ക് വരുമ്പോള്‍ വായുമര്‍ദ്ദത്തിന്റെ വ്യത്യാസം മൂലം Caisson's Disease ബാധിച്ച്,ഇതിലെ ഇരുപതോളം ജോലിക്കാര്‍ മരണപ്പെട്ടു.

1872ല്‍ വാഷിങ്ങ്ടന്‍ റോബിലിങ്ങ്, caisson's disease മൂലം ശരീരം തളര്‍ന്ന് കിടപ്പായതിനാല്‍ അദ്ദേഹത്തിന്റെ ഭാര്യ Emily പാലം പണിയുടെ മേല്‍നോട്ടം ഏറ്റെടുത്തു. അദ്ദേഹം കിടക്കയില്‍ കിടന്ന് ഭാര്യക്ക് ഇതിനായി നിര്‍ദ്ദേശം നല്‍കി!! 1883ല്‍ ബൂക്ലിന്‍ ബ്രിഡ്ജിന്റെ ഉത്ഘാടനസമയത്ത് അദ്ദേഹം മരണക്കിടക്കയിലായിരുന്നു.

Manhattanനെ Brooklyn സിറ്റിയുമായി ബന്ധപ്പെടുത്തുന്ന,486.3മീറ്റര്‍ നീളമുള്ള ഈ പാലം അന്ന് ലോകത്തിലെ ഏറ്റവും മഹത്തായ ഒരു എഞ്ചിനീയറിങ്ങ് സൃഷ്ടിയായിരുന്നു
.

സൂര്യന്‍ അസ്തമിച്ചത് 9 മണിയോടെയാണ്.താഴെക്കിറങ്ങി Pier 17 [South Street Seaport] നില്‍ രാത്രിഭക്ഷണം കഴിച്ചു. ഷോപ്പിങ്ങ് മാള്‍,ഹോട്ടലുകള്‍,സുവനീര്‍ ഷോപ്പുകള്‍ നിറഞ്ഞ വളരെ സജീവമായ സ്ഥലമാണ് Pier17. ഇവിടെനിന്ന് ഇലക്ട്രിക് ബള്‍ബുകളാല്‍ അലങ്കൃതമായ ബ്രൂക്ലിന്‍ ബ്രിഡ്ജ് പകിട്ടേറിയ ഒരു കാഴ്ച തന്നെയായിരുന്നു.10-15 മിനിറ്റോളം നീണ്ട മനോഹരമായ വെടിക്കെട്ടും അന്നവിടെ ഞങ്ങള്‍ക്ക് കാണാന്‍ കഴിഞ്ഞു.

Pier17

ഞങ്ങളുടെ ഹോട്ടലില്‍ നിന്ന് അല്പദൂരം നടന്നാല്‍ ലോകത്തിലെ ഏറ്റവും വലിയ സ്റ്റോക്ക് എക്സ്ചേഞ്ചില്‍ എത്താം-New york Stock Exchange[NYSC].

New-york Stock Exchange

NYSC ക്ക് മുന്നില്‍

അതിനടുത്തായി Federal Hall National Memorial കാണാം.ഹാളിന്റെ മുന്നിലായി George Washingtonന്റെ വലിയ പ്രതിമയുണ്ട്.ഇവിടെ വെച്ചാണ് 1789ല്‍ ജോര്‍ജ് വാഷിങ്ങ്ടണ്‍ അമേരിക്കായുടെ ആദ്യത്തെ പ്രസിഡണ്ട് ആയി സ്ഥാനമേറ്റത്. അദ്ദേഹം അന്ന് oath പറയുമ്പോള്‍ ഉപയോഗിച്ച ബൈബിള്‍ ഈ മൂസിയത്തില്‍ പ്രദര്‍ശനത്തിന് വെച്ചിട്ടുണ്ട്.

Federal Hall National Memorial

ഞാന്‍ സ്റ്റോക്ക് എക്സ്ചേഞ്ചിനു മുന്നില്‍ big bullനെ തിരഞ്ഞു. അവിടെ ഒരു കുത്താന്‍ നില്‍ക്കുന്ന കാളയുടെ പ്രതിമയുള്ളതായി കേട്ടിട്ടുണ്ട്. പക്ഷേ അതിനടുത്തൊന്നും കാണാന്‍ കഴിഞ്ഞില്ല.

Big Bull

Wall Street നടുത്ത് Bowling Green എന്ന സ്ട്രീറ്റില്‍ അന്വേഷിച്ച കാളയെ കണ്ടെത്തി.

1987ല്‍ സ്റ്റോക്ക് മാര്‍ക്കറ്റ് തകര്‍ന്നപ്പോള്‍, ജനങ്ങളില്‍ ശുഭാപ്തി വിശ്വാസം വളര്‍ത്താനായി Arturo Di Modica എന്ന ശില്പിയുടെ മനസ്സില്‍ ഉദിച്ച ആശയമാണിത്. ഒരു charging bullനെ വാള്‍സ്ടീറ്റില്‍ പ്രതിഷ്ഠിക്കുക. അധികാരികളുടെ അനുവാദമെടുക്കാതെ അദ്ദേഹം ഒരു സുപ്രഭാതത്തില്‍ 3175കിലോ ഭാരമുള്ള ഈ പ്രതിമയെ ന്യൂയോര്‍ക്ക് സ്റ്റോക്ക് എക്സ്ചേയ്ഞ്ചിന് മുന്നില്‍ സ്ഥാപിച്ചു. ഉടനെ സിറ്റി പോലീസ് അതിനെ എടുത്തു മാറ്റി. പൊതുജനരോദനം അതിന്റെ പുന:പ്രതിഷ്ഠക്ക് വഴി നല്‍കി-മറ്റൊരു സ്ട്രീറ്റില്‍ ആണങ്കിലും അത് വിനോദസഞ്ചാരികള്‍ക്ക് വളരെ ആകര്‍ഷണമായി.

ബാക്കി ന്യൂയോക്ക് വിശേഷം അടുത്തപോസ്റ്റില്‍ പറയാം

Statue of Liberty

2010-11-01T08:26:00.000-07:00

ഇതവണയുള്ള കനഡാ സന്ദര്‍ശനത്തിന് ഒരു പ്രത്യേകതയുണ്ട്.ഭൂമി ഉരുണ്ടതാണെന്ന് തെളിയിക്കുന്ന യാത്ര. കഴിഞ്ഞ തവണ ഞങ്ങള്‍ കിഴക്കോട്ട് പറന്ന് ഹോങ്ങ്കോങ്ങ് വഴി കനഡായിലെ വാങ്കോവറില്‍ എത്തി. ഈ തവണ പടിഞ്ഞാറോട്ട് പറന്ന് ആംസ്റ്റെര്‍ഡാം വഴി ടൊറോന്റോ വില്‍ എത്തി.അല്പം കൂടി പടിഞ്ഞാറോട്ട് പറന്നാല്‍ വാങ്കോവറിലെത്തും-എങ്കില്‍ ഭൂമിയൊന്ന് ചുറ്റിയെന്ന് പറയാമായിരുന്നു.

കാലത്ത് 8.30മണിക്ക് നെയ്രോബിയില്‍ ‍[കെനിയ] നിന്ന് പുറപ്പെട്ട് എട്ടര മണിക്കൂറെടുത്തു ആംസ്റ്റെര്‍ഡാമിലെത്താന്‍. Tulip പൂക്കളുടെ നാട്. കുറച്ച് സമയം എയര്‍പോര്‍ട്ടില്‍ ചുറ്റിനടന്ന് ഒരു ചായ കുടിച്ചു.വേള്‍ഡ് കപ്പ് ഫുട്ട്ബോളിന്റെ [ജൂണ്-2010‍] സമയമായതിനാല്‍ എല്ലാവരുടേയും ശ്രദ്ധ ടീ. വി സ്ക്രീനില്‍ ആണ്.

അവിടെ നിന്ന് പിന്നേയും എട്ട് മണിക്കൂര്‍ പറന്നാണ് ടൊറോന്റോവില്‍ എത്തിയത്-സൂര്യനോടൊപ്പമായിരുന്നു ഞങ്ങളുടെ യാത്ര. 17 മണിക്കൂര്‍ യാത്രയിലുടനീളം നല്ല സൂര്യപ്രകാശമായിരുന്നു. എന്തിനധികം-ഞങ്ങള്‍ ഇറങ്ങുമ്പോള്‍ പകല്‍ പോലെ പ്രകാശം-സമയം-8.30pm!! KLM Airlines ന്റെ പരസ്യം പോലെ തന്നെ ['breakfast in Nairobi,dinner in Toronto] ഞങ്ങള്‍ ഡിന്നറിന് ടൊറോന്റോവിലെത്തി. ജൂണ്‍ മാസാവസാനം അവിടെ സൂര്യാസ്തമനം 9മണിക്ക് ശേഷമായിരുന്നു.പുലര്‍ച്ച മൂന്നരയോടെ ഉദയവും!! അതിനാല്‍ ആദ്യത്തെ ഒരാഴ്ച്ച ഉറങ്ങാന്‍ കുറെ പ്രയാസപ്പെട്ടു.

ഏതായാലും ടൊറോന്റോ വരെയെത്തി. അടുത്തുള്ള അമേരിക്ക ഒന്നു കാണുവാന്‍ ആഗ്രഹം തോന്നി. ജൂണ്‍ 26ന് ന്യൂയോര്‍ക്കിലേക്ക് യാത്ര തിരിച്ചു.

താമസ്സിച്ചിരുന്ന ഹോട്ടല്‍ wall streetന് അടുത്തായിരുന്നതിനാല്‍ എല്ലാ പ്രധാനപ്പെട്ട സ്ഥലങ്ങളും കാണാന്‍ നടക്കേണ്ട ദൂരമേ ഉണ്ടായിരുന്നുള്ളൂ -ഗ്രൌണ്ട് സീറോ,ബ്രൂക്ക്ലിന്‍ ബ്രിഡ്ജ്,...ഇങ്ങിനെ പലതും ഹോട്ടലിന്റെ ചുറ്റുവട്ടത്തായിരുന്നു.ഇവിടെത്തെ വിശേഷങ്ങള്‍ പിന്നീട് വിശദമായി എഴുതാം.

പിറ്റേന്ന് കാലത്ത് statue of liberty കാണാന്‍ ഒരുങ്ങി.അമേരിക്കായുടെ ദേശീയ സ്മാരകമായ ഈ പ്രതിമ സ്ഥാപിച്ചിരിക്കുന്നത് ന്യൂയോര്‍ക്കിലെ ലിബെര്‍ട്ടി ഐലണ്ടിലാണ്.അവിടേയ്ക്ക് പോകാ‍ന്‍ ഫെറി ടിക്കറ്റ് എടുത്തു.ഓഡിയോ ടൂറിനായി മറ്റൊരു ടിക്കറ്റ് എടുത്തപ്പോള്‍ വിവരണങ്ങളടങ്ങിയ ഒരു റെക്കോഡ് പ്ലേയര്‍ ഹെഡ് ഫോണിനൊടൊപ്പം ലഭിച്ചു.അതിലെ വിവിധ അക്കങ്ങള്‍ അമര്‍ത്തിയാല്‍ വിശദ വിവരങ്ങള്‍ കേള്‍ക്കാം.

Audio Tour I-Card

Statue cruises

ഫെറിയില്‍ കയറാന്‍ നീണ്ട ക്യൂ. പ്ലേയിനില്‍ കയറുമ്പോളുള്ള സെക്യൂരിറ്റി പരിശോധനയേക്കാള്‍ അപ്പുറമുള്ള ചെക്ക് അപ്പ്. മെറ്റല്‍ ഡിക്ടറ്റര്‍ ഉപയോഗിച്ച് ഹേന്‍ട് ബാഗടക്കം പരിശോധിച്ചു. തിക്കും തിരക്കിലൂടെ ഒരു വിധം ഫെറിയുടെ മുകളില്‍ എത്തി.സുഖമുള്ള യാത്രയും ,ചുറ്റും മനോഹരമായ കാഴ്ച്ചകളും.20 മിനിറ്റിനുള്ളില്‍ ഞങ്ങള്‍ ലിബെര്‍റ്റി ഐലണ്ടിലെത്തി.

Ferry കയറുന്ന തിരക്കില്‍

Liberty Island ലേക്ക് Ferry യാത്ര

ഭംഗിയുള്ള ഐലണ്ട്.വിസ്മയ ജനകമായ പ്രതിമ.ടൂറിസ്റ്റുകള്‍ക്ക്, ഇതിന്റെ കിരീടം വരെ കയറാന്‍ പ്രത്യേക ടിക്കറ്റ് എടുക്കണം.സുരക്ഷിതത്വം പ്രമാണിച്ച് ടിക്കറ്റുകള്‍ പരിമിതമായിരുന്നു.നവംബര്‍ മാസം വരെയുള്ള ബുക്കിങ്ങ് കഴിഞ്ഞതിനാല്‍ ഞങ്ങല്‍ക്ക് ടിക്കറ്റ് ലഭിച്ചില്ല.ചുറ്റും നടന്ന് കണ്ടു.

Liberty Island

1886ല്‍ ഫ്രഞ്ച് ജനത അമേരിക്കായ്ക്ക് നല്‍കിയ ഒരു സമ്മാനമാണ് 151 അടി ഉയരമുള്ള Statue of liberty. വലത്ത് കൈയ്യില്‍ ദീപനാളം ഉയര്‍ത്തിപ്പിടിച്ച ഈ സ്ത്രീ പ്രതിനിധീകരിക്കുന്നത് സ്വാതന്ത്ര്യത്തിന്റെ ദൈവമായ Libertas നെയാണ്.ഇടത്തേ കൈയ്യിലുള്ള പുസ്തകത്തിന് മുകളില്‍ July4-1776എന്ന് [അമേരിക്ക ബ്രിട്ടനില്‍ നിന്ന് സ്വതന്ത്രമായ ദിവസ്സം] കൊത്തിവെച്ചിട്ടുണ്ട്. കിരീടത്തിലുള്ള ഏഴ് സ്പൈക്സ് ,എഴ് ഭൂഖണ്‍ധങ്ങളെ ഉദ്ദേശിച്ചാണ്. കടലിലേക്ക് മുഖം തിരിഞ്ഞ് നില്‍ക്കുന്ന ഈ പ്രതിമ പുറമേ നിന്ന് കപ്പലില്‍ വരുന്ന കുടിയേറ്റക്കാരെ വെളിച്ചം പകര്‍ന്ന് വരവേല്‍ക്കുകയാണ്.

Statue of Liberty

ഫ്രഞ്ച് എഴുത്തുകാരനും,രാഷ്ടീയപ്രഗല്‍ഭനുമായ Edouard Rene de Laboulaye ന്റെ മനസ്സില്‍ തോന്നിയ ഒരു ആശയമായിരുന്നു ഇത്.ഫ്രാന്‍സ്സ്-അമേരിക്കാ സൌഹൃദബന്ധം ദൃഡപ്പെടുത്താന്‍ ഒരു സ്മാരകം അമേരിക്കാക്ക് സമര്‍പ്പിക്കുക.ഈ ആശയത്തില്‍ ഉത്തേജിതനായ Fredric Bartholdi എന്ന യുവ ശില്പി സ്മാരകത്തിനായി രേഖാചിത്രമൊരുക്കി.

1871ല്‍ അദ്ദേഹം അനുമതിക്കായി ന്യൂയോര്‍ക്കിലെത്തി.അന്നത്തെ അമേരിക്കന്‍ പ്രസിഡെണ്ട് ആയ Ulysses S.Grantല്‍ നിന്ന് അനുവാദം ലഭിച്ചു.പ്രതിമ സ്ഥാപിക്കാനായി Bedloes Island [ ഇപ്പോള്‍ ലിബെര്‍റ്റി ഐലണ്ട് എന്ന് വിളിക്കുന്നു] ആണ് ഉത്തമമായ സൈറ്റ് എന്ന് നിശ്ചയിച്ചു.

ഉള്‍ഭാഗം125 ടണ്‍ സ്റ്റീലും, പുറമെ 35 ടണ്‍ ചെമ്പും പൊതിഞ്ഞാണ് ഈ പ്രതിമ നിര്‍മ്മിച്ചത്.സ്വര്‍ണ്ണത്തകിട് കൊണ്ടാണ് ദീപം പൊതിഞ്ഞിരിക്കുന്നത്. ഇതിന്റെ നിര്‍മ്മാണ ഫണ്ടിലേക്ക് എല്ലാവരും [സിറ്റി ,ടൌണ്‍, വില്ലേജ്] പണം സംഭാവന ചെയ്തു-ആര്‍ട്ട് ഷോ,ലോട്ടറി...തുടങ്ങിയവ നടത്തി പിരിവെടുത്തു.ഒരു തീവ്രയത്നം തന്നെയായിരുന്നു ഇതിലേക്കുള്ള പണശേഖരണം.അങ്ങിനെ ഈ പ്രതിമയുടെ നിര്‍മ്മാണം നീണ്ടുപോയി.ഏകദേശം 400,000 അമേരിക്കന്‍ ഡോളേഴ്സ് ആണ് അന്ന് ചെലവ് വന്നത് .ഇന്ന് അമേരിക്ക അഭിമാനിക്കുന്ന ഈ പ്രതിമയുടെ നിര്‍മ്മാണത്തെക്കുറിച്ച് അന്ന് അവര്‍ക്ക് ആദരവിനേക്കാള്‍ പരാമര്‍ശങ്ങളായിരുന്നു. എന്തിനാണാവോ ഫ്രാന്‍സുകാര്‍ അമേരിക്കാക്ക് സമ്മാനമൊരുക്കാന്‍ ഇത്ര struggle ചെയ്തത്?????

വിവിധ ഭാഗങ്ങളായി കപ്പലില്‍ ഈ പ്രതിമ ന്യൂയോര്‍ക്കില്‍ എത്തിച്ചു.ഒക്ടൊബര്‍28-1886ല്‍ ഇത് ലിബെര്‍റ്റി ഐലണ്ടില്‍ പ്രതിഷ്ടിച്ചു.പ്രതിമ ഫ്രാന്‍സ്സും,pedestal [ഇരിപ്പിടം] അമേരിക്കായുമാണ് ഉണ്ടാക്കിയത്.

ഈര്‍പ്പമുള്ള കാറ്റ് ചെന്‍പ് തകിടില്‍ oxidation നടത്തിയതിനാല്‍ പ്രതിമയുടെ നിറം ഇളം പച്ചയായി മാറി. കടല്‍ക്കാറ്റേറ്റ് ലോഹങ്ങള്‍ക്ക് corrosion സംഭവിച്ചതിനാല്‍ 1984ല്‍ ഇത് renovation ചെയ്യുകയുണ്ടായി.

പൊള്ളുന്ന ചൂട് കാരണം എല്ലാവരും ക്ഷീണിച്ചു.കോള്‍ഡ് ഡ്രിങ്ക് കുടിച്ച് മരത്തണലില്‍ അല്പനേരം വിശ്രമിച്ചു.

ലിബെര്‍റ്റി ഐലണ്ടില്‍ നിന്ന് ഞങ്ങള്‍ Ellis Island ലേക്കുള്ള ഫെറിയില്‍ കയറി.

Ellis Island ലേക്കുള്ള ഫെറി യാത്ര

1892വില്‍ അമേരിക്കയുടെ ഇമിഗ്രേഷന്‍ സ്റ്റേഷന്‍ ഈ ഐലണ്ടില്‍ ആണ് പണിതീര്‍ത്തത്.1954വരെ ഇത് അമേരിക്കായിലേക്ക് കുടിയേറി പാര്‍ക്കുന്നവരുടെ inspection station ആയിരുന്നു.steamshipല്‍ വരുന്ന ഇവരുടെ ഫിസിക്കല്‍,മെന്റല്‍ പരിശോധന കഴിഞ്ഞാണ് ഇമിഗ്രേഷന്‍ നല്‍കിയിരുന്നത്.

Ellis-Island

മുന്‍ വശത്തുള്ള വലിയ ഹാള്‍ വെയ്റ്റിങ്ങ് റൂം ആണ്.ഹാളിന്റെ ഒരു വശത്ത് ,അന്ന് കാലത്ത് പലരും കൊണ്ടുവന്ന പെട്ടികള്‍ ,ബെഡ്,ബാസ്ക്കറ്റ്..തുടങ്ങിയവ പ്രദര്‍ശനത്തിന് വെച്ചിട്ടുണ്ട്. ഒപ്പം അവരുടെ പല ഫോട്ടോകളും .അവിടെ നിന്ന് മുകളിലേക്ക് വീതിയുള്ള കോണിപ്പടിയുണ്ട്. ഇമിഗ്രന്റ്സ് അത് കയറുമ്പോള്‍ മുകളില്‍ നിന്ന് ഓഫീസേഴ്സ്സ് വല്ല അംഗവൈകല്യവുമുണ്ടോ എന്ന് തിട്ടപ്പെടുത്തും! പിന്നീട് 17 വിവിധ തരമുള്ള മെഡിക്കല്‍ ടെസ്റ്റ്!!!ഇതെല്ലാം പാസ്സായി 20$ അടച്ചാല്‍ അവരെ New Jerseyലേക്കോ Manhattanനിലേക്കോ ഉള്ള ഫെറിയില്‍ കയറ്റി വിടും.

അമേരിക്കന്‍ മേധാവിത്തത്തിന് അന്നും ഇന്നും മാറ്റമൊന്നും ഉണ്ടായിട്ടില്ലെന്ന് ചുരുക്കം.

Ellis Island Immigration Office

ഇതെല്ലാം കണ്ടപ്പോളേക്കും ഉച്ച കഴിഞ്ഞിരുന്നു.കലശലായ വിശപ്പും ദാഹവും.എലിസ്സ് ഐലണ്ടിലെ റെസ്റ്റോറ്ണ്ടില്‍ ഭക്ഷണം കഴിക്കാനിരുന്നു. മനോഹരമായി അലങ്കരിച്ച സ്വാദിഷ്ടമായ ഭക്ഷണം മരച്ചുവട്ടില്‍ ഒരുക്കിയിരുന്ന മേശകളിലിരുന്ന് കഴിച്ചു. കടല്‍ക്കാറ്റ് പൊള്ളുന്ന ചൂടില്‍ ആശ്വാസം നല്‍കി. അവിടേനിന്ന് ന്യൂയോര്‍ക്ക് സിറ്റി വ്യൂ ഭക്ഷണത്തൊടൊപ്പം ആസ്വദിച്ചു.മുന്നിലുള്ള പുല്‍ത്തകിടില്‍ നിറയെ കടല്‍ പക്ഷികള്‍.

Ellis Islandലെ ഉച്ചഭക്ഷണം കാത്ത്

Ellis Island നിന്ന് കാണുന്ന ന്യൂയോര്‍ക്ക് നഗരം

മടക്കയാത്രക്കുള്ള ഫെറി എത്തിക്കഴിഞ്ഞു.മറ്റു വിശേഷങ്ങള്‍ പിന്നീടാവാം

ഫലോദ്യാനത്തിലേക്കൊരു ഉല്ലാസയാത്ര

2010-10-06T23:37:00.000-07:00

ചെറിപഴം കഴിച്ച ഓര്‍മ്മ -സ്കൂളില്‍ പഠിക്കുന്ന കാലം.അച്ഛന്‍ വല്ലപ്പോഴും ത്രിശ്ശൂര്‍ ടൌണിലേക്ക് സിനിമ കാണാന്‍ ഞങ്ങളെ കൊണ്ടു പോകും.സിനിമ കഴിഞ്ഞാല്‍ പിന്നെ ഞങ്ങള്‍ക്കിഷ്ടപ്പെട്ട ഫ്രൂട്ട് സാലഡ് വാങ്ങി തരും.ഭംഗിയുള്ള ഗ്ലാസ്സില്‍ നിറച്ച ഐസ്ക്രീം കലര്‍ന്ന ഫ്രൂട്ട് സാലഡ്-മുകളില്‍ അലങ്കരിച്ച sweetened ചെറീപഴം-ഒപ്പം കുത്തി നിര്‍ത്തിയ wafer biscuit.

അമ്മാവന്റെ വീടിന്റെ പിന്നില്‍ ഒരു ചെറിമരമുണ്ട്.നിറയെ മുള്ളുള്ള ,ചുവന്ന ചെറിപഴം? നിറഞ്ഞ മരം .പക്ഷേ അതിന്റെ പഴത്തിന് നല്ല പുളിയാണ്.പിന്നീട് ബോബേയില്‍ വെച്ചാണ് ശരിക്കുള്ള ചെറിപഴം കാണുന്നത്.

ജുണ്‍-ജുലൈ മാസത്തിലായിരുന്നു ഞങ്ങളുടെ രണ്ടാമത്തെ കനഡാ സന്ദര്‍ശനം. ഈ തവണ Torontoവിലേക്കാണ് യാത്ര. കുട്ടികളെ കാണുക എന്നുള്ളതാണ് പ്രധാന ഉദ്ദേശം.എന്നാല്‍ തിരഞ്ഞെടുത്ത സമയം അല്പം മോശമായി.പൊള്ളുന്ന ചൂട്. മഞ്ഞ് പെയ്യുന്ന കനഡായില്‍ ചൂടോ?! എന്ന് എല്ലാവരും ചോദിച്ചു.കെനിയായില്‍ ഈ സമയം നല്ല തണുപ്പാണ്.

കനഡാവാസികള്‍ വേനല്‍ക്കാലത്തിനെ ആഘോഷത്തോടെയാണ് സ്വീകരിക്കുന്നത്.വലിയ വെടിക്കെട്ടോട് കൂടി.സ്ത്രീ-പുരുഷഭേദമില്ലാതെ ഏതാണ്ട് എല്ലാവരും shorts ആണ് വേഷം. കടകളിലും,ഹോട്ടലുകളിലും ഒരു ഉത്സവക്കാല പ്രതീതി.

വേനല്‍ക്കാലം സുദീര്‍ഘമല്ലെങ്കിലും ഇത് പൂക്കളുടേയും പഴങ്ങളുടേയും കാലമാണ്.എല്ലാവരുടേയും വീട്ട്മുറ്റത്ത് പൂത്തുലഞ്ഞ ചെടികള്‍.പലതരം പഴങ്ങളുടെ ഹാര്‍വെസ്റ്റ് സീസ്സണ്‍ കൂടിയാണിത്. ഇതില്‍ ഞാന്‍ വളരെ ആഹ്ലാദം കണ്ടെത്തുന്നതിനാല്‍ മോന്‍ ഇന്റെര്‍നെറ്റ് നോക്കി അടുത്തുള്ള ഫ്രൂട്ട് പിക്കിങ്ങ് ഫാമുകളുടെ അഡ്രസ്സ് കണ്ടെത്തി.

ബ്രേയ്ക് ഫാസറ്റ് കഴിച്ച് ഞങ്ങള്‍ ,അടുത്തുള്ള ചെറിഫാമിലേക്ക് കാറില്‍ യാത്രയായി. GPS [Global positioning system] ആണ് വഴികാട്ടി. വലത്തോട്ട് തിരിയാനും,ഇടത്തോട്ട് തിരിയാനും നേരെ പോകാനും ഒരു ആനയെ തെളിക്കുന്നത് പോലെ, കൃത്യനിഷ്ടതയോടെ അതിലെ സ്ത്രീശബ്ദം നിര്‍ദ്ദേശം തന്നു കൊണ്ടിരുന്നു..വഴി തെറ്റുമ്പോള്‍ recalculate ചെയ്ത് വീണ്ടും ശരിയായ വഴിക്ക് കാറിനെ നയിച്ചു.

വഴിയോരക്കാഴ്ച്ച

ശാസ്ത്രം ഇത്ര പുരോഗമിച്ചല്ലോ.!! Satellite മുഖേനയാണ് GPS navigation. ഇതില്ലെങ്കില്‍... .വഴി ചോദിച്ച് ചോദിച്ച് പോകാമെന്ന് വെച്ചാല്‍ ...അതൊന്നും ഇവിടെ ശരിയാവില്ല. എല്ലാവരും map,internet, GPS.....ഉപയോഗിച്ചാണ് വഴി തിരഞ്ഞു പിടിക്കുന്നത്.

കൃഷിപാടങ്ങള്‍

കന്നുകാലികള്‍ക്കായി വൈക്കോല്‍ റോള്‍ ചെയ്തത്

പോകുന്ന വഴിയില്‍ നീണ്ടു കിടക്കുന്ന കനോള[എണ്ണ-ധാന്യം],ചോളം....തുടങ്ങിയ കൃഷിപാടങ്ങള്‍. ഇടക്ക് കര്‍ഷകരുടെ ഗോഡവുണുകള്‍. ഭംഗിയുള്ള വീടുകള്‍.ഹൈവേയില്‍-100-150സ്പീഡില്‍ കുതിക്കുന്ന വാഹനങ്ങള്‍.

എന്തായാലും വഴി തെറ്റിക്കാതെ GPS സുന്ദരി ഞങ്ങളെ ഫാമില്‍ എത്തിച്ചു. കാര്‍ പാര്‍ക്കിങ്ങ് സ്ഥലത്ത് ധാരാളം കാറുകള്‍ കണ്ടു.

മുന്നില്‍ ഒരു ബോര്‍ഡ് വെച്ചിട്ടുണ്ട്.ഒരാള്‍ക്ക് entrance fee 4$.ഇതിന് നമുക്ക് 2പൌണ്ട് [1pound=454gms] ചെറി പൊട്ടിക്കാം.കൂടുതല്‍ പൊട്ടിച്ചാല്‍ പൌണ്ടിന് രണ്ട് ഡോളര്‍ വെച്ച് കാശ് കൊടുക്കണം.ഇത് കൊണ്ട് ഫാം ഉടമസ്ഥന് ആദായമുണ്ട്-പണിക്കൂലിയില്ലാതെ പഴങ്ങള്‍ പറിക്കുകയും വിറ്റഴിയുകയും ചെയ്യുന്നു.ഞങ്ങളെ പോലുള്ളവര്‍ക്ക് ഇത് ഒരു ആനന്ദവും.മാത്രമല്ല പഴങ്ങള്‍ കടയില്‍ നിന്ന് ലഭിക്കുന്നതിനേക്കാള്‍ ഫ്രെഷും,വിലക്കുറവും ആണ്.

കണ്ണെത്താത്ത ദൂരത്തില്‍ നീണ്ടു കിടക്കുന്ന ചെറി ഫാം.എതാണ്ട് നൂറ് ഏക്കറോളം കാണും. ഓരൊര്‍ത്തര്‍ക്കും ചെറി പറിച്ചിടാനായി ബാസ്ക്കെറ്റ് നല്‍കി.ഫാമിന്റെ പല ഭാഗങ്ങളിലായി കസ്റ്റമേഴ്സ്സിനെ ഇറക്കുന്നത് ട്രാക്ടറോട് ഘടിപ്പിച്ച വണ്ടിയിലാണ് .ഞങ്ങളെ ഒരു ഭാഗത്തിറക്കി തിരിച്ച് പോകുന്നവരെ കയറ്റാനായി ട്രാക്ടര്‍ നീങ്ങി.

പേരമരത്തിന്റെ ഉയരമേ ചെറിമരത്തിനുള്ളൂ.പല തരം ചെറിമരങ്ങള്‍--ചുമന്ന ചെറിയ പഴങ്ങളുള്ള മരങ്ങള്‍.കറുത്ത തുടുത്ത പഴങ്ങളുള്ള മരങ്ങള്‍ .എത്ര വേണമെങ്കിലും പൊട്ടിച്ചു തിന്നാം.പക്ഷേ കീടനാശിനി കൊണ്ട് പഴങ്ങള്‍ പൊതിഞ്ഞിരിക്കുന്നു.കുറച്ചൊക്കെ കുപ്പായത്തില്‍ തുടച്ച് അകത്താക്കി.ഇത്ര രുചിയുള്ള ചെറി ആദ്യമായാണ് കഴിക്കുന്നത് .

സന്തോഷം കൊണ്ട് ഞങ്ങള്‍ തുള്ളിചാടി. മരങ്ങളുടെ താഴെ ഞാവല്‍ പഴം പോലെ ഉതിര്‍ന്നു കിടക്കുന്ന ചെറീപഴങ്ങള്‍.

ഇത്ര വലിയ കാട്ടിലും താഴെ പുല്ല് വെട്ടി നിര്‍ത്തിയപോലെ- ഓടി നടന്ന് ഞങ്ങള്‍ പഴങ്ങള്‍ പറിച്ചു.ഈ കാടിനുള്ളില്‍ വഴി തെറ്റാതിരിക്കാന്‍ ഞങ്ങള്‍ അങ്ങോട്ടും,ഇങ്ങോട്ടും ഇടയില്‍ വിളിച്ചു കൊണ്ടിരുന്നു. എല്ലാവരുടെയും ബാസ്ക്കറ്റ് നിറഞ്ഞപ്പോള്‍ തിരിച്ച് പോകാനുള്ള വണ്ടി കാത്ത് വഴിയില്‍ നിന്നു.

തിരിച്ച് വണ്ടി pay counterറിനടുത്ത് നിര്‍ത്തി.തൂക്കം നോക്കിയപ്പോള്‍ 11പൌണ്ട് ഉണ്ട്!എങ്കിലും നഷ്ടം തോന്നിയില്ല.ഒന്നു മനസ്സിലായി. ത്രിശ്ശൂരില്‍ കഴിച്ച ചെറീപഴവും,അമ്മാവന്റെ വീട്ടിലെ ചെറീപഴവുമൊക്കെ സാക്ഷാല്‍ അല്ലെന്ന്.

വളരെയധികം മനസ്സിന് ഉന്മേഷം തന്ന ഒരു വിനോദയാത്രയായിരുന്നു എനിക്കിത്.ചെറി ബാസ്കറ്റ് കാറില്‍ വെച്ച് അടുത്ത യാത്രയ്ക്ക് ഒരുങ്ങി.പെല്ലാര്‍ എസ്റ്റേറ്റ് എന്ന വൈനറിയിലേയ്ക്ക്.അവിടെത്തെ വിശേഷം പിന്നീടൊരിക്കലാവാം.

GPS സുന്ദരി വഴി പറഞ്ഞു തുടങ്ങി.യാത്ര തുടരെട്ടെ.

മരുഭൂമിയില്‍ ഒരു സായാഹ്ന സഫാരി

2010-09-16T00:28:00.000-07:00

ഞാന്‍ ഡിഗ്രിക്ക് പഠിക്കുന്ന കാലത്താണ് ചേട്ടന്‍ ദുബായിലേയ്ക് പോകുന്നത്.അന്ന് ദുബായ് എന്നാല്‍, ദൂരെ ദൂരെ കടലിനപ്പുറം സ്വപനങ്ങളുറങ്ങുന്ന മണലാരണ്യമാണെന്ന ഒരു ധാരണ മാത്രമേ എനിക്കുള്ളൂ. അധികം വൈകാതെ ചേട്ടന് ബ്രിട്ടീഷ് ബാങ്കില്‍ ജോലി ശരിയായി.ഒരു വര്‍ഷത്തിന് ശേഷം നിറയെ സമ്മാനങ്ങളുമായി ലീവില്‍ വന്ന ചേട്ടന്റെ വലിയ പെട്ടികള്‍ തുറന്നപ്പോള്‍ മുറിയില്‍ നിറഞ്ഞ സുഗന്ധവും, നിറപകിട്ടാര്‍ന്ന സാരികളും,ഡ്രൈ ഫ്രൂട്ട്സ്സിന്റെ രുചിയും...എല്ലാം ഞങ്ങള്‍ക്ക് പുതുമയായിരുന്നു.

നെയ് റോബിയില്‍ [കെനിയായുടെ തലസ്ഥാനം ]നിന്ന് കൊച്ചിക്ക് എത്തണമെങ്കില്‍, Emiratesല്‍ ദുബായ് വഴി പോകാം. പലരും ദുബായില്‍ സ്റ്റോപ്പ് ഉള്ളതിനാല്‍ അവിടെ ഇറങ്ങി ഷോപ്പിങ്ങ് നടത്താറുണ്ട്. എന്നാല്‍ ഞങ്ങള്‍ നെയ്റോബിയില്‍ നിന്ന് നേരിട്ട് ബോബേയിലേക്ക് പറക്കുന്നതിനാല്‍ ദുബായ് കാണാന്‍ അവസരം കിട്ടിയിട്ടില്ല. കേരളത്തില്‍ വേരുറച്ചു എങ്കിലും,ഞാന്‍ പച്ചപിടിച്ചതും പന്തലിച്ചതും ബോംബേയിലാണ്. ന്യൂ ബോബേയിലെ വാഷി എന്ന സ്ഥലം എനിക്ക് തൃശ്ശൂര്‍ ടൌണ്‍ പോലെ പരിചിതമാണ്. അത് കൊണ്ട് ആഫ്രിക്കായില്‍ നിന്ന് നാട്ടില്‍ പോകുമ്പോള്‍ എല്ലായിപ്പോഴും ബോംബേയിലിറങ്ങി അവിടേയുള്ള വീടും,കൂട്ടുകാരേയും കണ്ടിട്ടേ നാട്ടിലെത്താറുള്ളൂ .

കഴിഞ്ഞ ഈസ്റ്റര്‍ അവധിക്കാലത്ത് mdsന് ഒരു കോണ്‍ഫെറെന്‍സ്സ് ദുബായില്‍ ഉണ്ടായിരുന്നു. കോണ്‍ഫെറെന്‍സ്സിന് ശേഷം മൂന്ന് ദിവസ്സം ഈസ്റ്റര്‍ അവധിയായിരുന്നതിനാല്‍ ഞാനും യാത്രക്കൊരുങ്ങി. ഞങ്ങളുടെ കൂട്ടുകാരും ഈ സമയത്ത് അവരുടെ ദുബായിലുള്ള ബന്ധുവിന്റെ അടുത്തേക്ക് പോകുന്നുണ്ടായിരുന്നു. എല്ലാവരും ഒരുമിച്ചായിരുന്നു യാത്ര.

നെയ് റോബിയില്‍ നിന്ന് നാലര മണിക്കൂറിലേറെയെടുത്തു ദുബായിലെത്താന്‍. ദുബായിയുടെ കൌബേരത വിളിച്ചറിയിക്കുന്ന രീതിയില്‍ അലങ്കാരങ്ങളും, ആര്‍ഭാടവും നിറഞ്ഞ ,വളരെ വളരെ വലിയ എയര്‍പോര്‍ട്ട്. ഇമിഗ്രേഷന്‍ കൌണ്ടറില്‍ എത്തിയപ്പോഴേക്കും നടന്ന് നടന്ന് കാലു കഴച്ചു. നിര്‍വ്വികാരമായ മുഖത്തോടെ പാസ്പോര്‍ട്ട് പരിശോധിക്കുന്ന ശുഭ്രവസ്ത്രധാരികളായ ഇമിഗ്രേഷന്‍ ഓഫീസ്സേഴ്സ്സ്. Eye scanning കഴിഞ്ഞ് പാസ്പോര്‍ട്ടില്‍ സ്റ്റാമ്പ് അടിച്ചതിന് ശേഷം ഞങ്ങള്‍ പുറത്ത് കടന്നു.

ഹോട്ടലില്‍ നിന്നയച്ച കാര്‍ ഞങ്ങള്‍ക്കായി കാത്ത് നില്‍പ്പുണ്ടായിരുന്നതിനാല്‍ ബുദ്ധിമുട്ടില്ലാതെ അവിടെയെത്തി.ദുബായിലെ നിയമവും വകുപ്പുകളും വളരെ strict ആയതിനാല്‍ എല്ലാവരും അച്ചടക്കത്തോടെ ജീവിക്കുന്നു എന്ന് കാര്‍ ഡ്രൈവര്‍ പറയുകയുണ്ടായി.ഫ്ലയ്റ്റ് വൈകിയതിനാല്‍ ഹോട്ടലിലെത്തിയപ്പോള്‍ സമയം പുലര്‍ച്ചെ ഒരു മണി കഴിഞ്ഞിരുന്നു.

ബ്രേയ്ക് ഫാസ്റ്റ് കഴിച്ച് 9.30മണിയോടെ Mds കോണ്‍ഫെറെണ്‍സ്സിന് പോയി.ഞങ്ങളുടെ കുറെ അടുത്ത ബന്ധുക്കള്‍ ദുബായിലുണ്ട്.പലരേയും വര്‍ഷങ്ങള്‍ക്ക് മുന്‍പ് കണ്ടതാണ്.അവരെയൊക്കെ ഞാന്‍ ഫോണില്‍ വിളിച്ച് സംസാരിച്ചു. നെയ്രോബിയില്‍ നിന്ന് കൂടെ വന്നിരുന്ന കൂട്ടുകാര്‍ എന്നെ ദുബായ് ദര്‍ശനത്തിനായി ക്ഷണിച്ചു. ഞാന്‍ പിന്നീടുള്ള മൂന്നു ദിവസ്സം അവരുടെയൊപ്പം കാറിലും,ബസ്സിലും,മെട്രോയിലും സഞ്ചരിച്ച് ദുബായിലെ പല ഭാഗങ്ങളും കണ്ടു.

Dubai mall ന്റെ അടുത്ത് നിന്ന് വാനം മുട്ടി നില്‍ക്കുന്ന Burj Khalifa [ലോകത്തിലെ ഏറ്റവും ഉയരം കൂടിയ ടവ്വര്-2717ft‍] കണ്ടു. എന്തോ ടെക്നിക്കല്‍ ഫോള്‍ട്ട് കാരണം അതിന്റെ മുകളിലേക്ക് കയറാനുള്ള അനുമതി നിരോധിച്ചിരുന്നു. ദുബായ് മാളില്‍ ഉള്ള അക്വേറിയത്തിന്റെ വ്യൂവിങ്ങ് ഗ്ലാസ്സിലൂടെയുള്ള കാഴ്ച വിസ്മയജനകമാണ്.

Burj Khalifa at night

വീതിയേറിയ റോഡുകളും, ഇരുവശത്തും പെറ്റൂണിയ പൂക്കള്‍ നിറഞ്ഞ ഫ്ലവര്‍ ബെഡ്ഡും,വരി വരിയായി വളര്‍ത്തിയ ഈന്തപനകളും ഞാന്‍ കൌതുകത്തോടെ നോക്കിയിരുന്നു. എല്ലാം man made മാത്രം. ഈ കോണ്‍ക്രീറ്റ് വനത്തില്‍ പച്ചപ്പ് നാമാവശേഷം. എവിടെ തിരിഞ്ഞാലും മലയാളികളെ കാണാം‍. അറബികള്‍ പേരിനുമാത്രം.

കരാമയിലെ ലുലു സെന്റര്‍ ന്റെ അടുത്തുള്ള റെസ്റ്റോറെന്റുകളിലെ ഭക്ഷണത്തിന്റെ രുചി ഇന്നും നാവിന്‍ തുമ്പത്തുണ്ട്. ചേട്ടനും കുടുംബവും കരാമയിലായിരുന്നു താമസ്സിച്ചിരുന്നത്. കുറച്ച് വര്‍ഷങ്ങള്‍ക്ക് മുന്നെ അവര്‍ നാട്ടിലേക്ക് തിരിച്ചു പോയി. കരാമയിലെ മരങ്ങളും പൂക്കളും കണ്ടപ്പോള്‍ മരുഭൂമിയാണെന്ന് തോന്നിയില്ല.

കരാമയിലെ ലുലു സെന്ററിനടുത്ത് നിന്നെടുത്ത ഫോട്ടോ

രാത്രി,പല ബന്ധുക്കളും ഞങ്ങളെ കാണുവാനായെത്തി. വര്‍ഷങ്ങള്‍ക്ക് ശേഷമുള്ള ഈ ഒത്തുകൂടല്‍ തികച്ചും സന്തോഷം നല്‍കി. അവരുടെ കൂടെ Jumeira beach കാണാനിറങ്ങി. Al Ain ല്‍ നിന്നെത്തിയ ബന്ധു , മനോഹരമായ ആ മരുപ്പച്ചയിലേക്ക് ഞങ്ങളെ ക്ഷണിച്ചു. സമയക്കുറവ് കൊണ്ട് പോകാന്‍ കഴിഞ്ഞില്ല.

Jumeira Beach at night

ഹോട്ടലില്‍ നിന്ന് ഞങ്ങള്‍ കൂട്ടുകാരൊത്ത് ഒരു Desert safariക്ക് പ്ലാന്‍ ചെയ്തു.അന്ന് വൈകുന്നേരം നാല് മണിക്ക് ഞങ്ങളെ സഫാരിക്ക് കൊണ്ട് പോകാനായി കാര്‍ എത്തി. ഡ്രൈവര്‍ ഒരു സര്‍ദാര്‍ജി ആയിരുന്നു. ‍.ഞങ്ങള്‍ ആവേശഭരിതരായി കാറില്‍ കയറി.

മരുഭൂമി ഞാന്‍ ആദ്യമായി കാണുകയാണ്-ഞങ്ങളെല്ലാവരും സന്തോഷത്തോടെ താഴെയിറങ്ങി. കണ്ണെത്താത്ത ദൂരത്ത് പരന്ന് കിടക്കുന്ന അനന്തമായ,പ്രശാന്തമായ മണല്‍ സാഗരം. കാറ്റിന്റെ കലാവിരുത് തെളിയിക്കുന്ന സമാന്തരരേഖകള്‍ ഉടനീളം. ..- pristine beauty എന്നല്ലാതെ മറ്റൊരു ഉപമയും എനിക്ക് പറയാനില്ല.

കാറ്റ് ഒരുക്കിയ കലാവിരുന്ന്

പുസ്തകതാളുകളില്‍ നിന്ന് അല്പനേരം മോചനം

Dune bashing [മണ്‍കൂനകളുടെ മുകളില്‍ നിന്ന് താഴേക്ക് അതിവേഗത്തില്‍ മണല്‍ തരികള്‍ പറപ്പിച്ചുള്ള സാഹസയാത്ര] നായി സര്‍ദാര്‍ജി കാര്‍ ടയറിലെ എയര്‍ കുറച്ചു. ചുറ്റും നോക്കിയപ്പോള്‍ ഒരു ഡ്സ്സനിലേറെ വെള്ള ലാന്റ് ക്രൂയ്സ്സര്‍ വിനോദസഞ്ചാരികളുമായി അവിടെയിവിടെയായി അണിനിരന്നിട്ടുണ്ട്-ഒരു caravan തന്നെ.

യാത്ര തുടങ്ങിയപ്പോള്‍ കണ്ണുകള്‍ ഞാന്‍ ഇറുക്കിയടച്ചു. ഓരോ തവണ കാര്‍ സ്പീടില്‍ താഴേക്ക് കുതിച്ചിറങ്ങുമ്പോഴും പിന്നിലിരിക്കുന്നവരില്‍ നിന്നുള്ള ആഹ്ലാദത്തിന്റെ കാഹളം എനിക്ക് കേള്‍ക്കാനുണ്ട്. മണ്‍കൂനകളിലൂടെ താഴെക്കും,മുകളിലേക്കും വശങ്ങളിലൂടേയും ഓടിച്ച് സര്‍ദാര്‍ജി അദ്ദേഹത്തിന്റെ പ്രാവീണ്യം പ്രദര്‍ശിപ്പിച്ചു. 20 മിനിറ്റോളം നിന്ന ഈ സാഹസികയത്നം എന്നിലുളവാക്കിയത് ഭയം മാത്രമാണ്.

Dune bashing കഴിഞ്ഞപ്പോള്‍ എല്ലാ വണ്ടികളും ഒരുമിച്ച് നിരയായി നിര്‍ത്തി.ഹാവൂ-എന്റെ ശ്വാസം നേരെ വീണു..പുറത്തിറങ്ങി പൂഴിമണലില്‍ അലസ്സമായി ഞങ്ങള്‍ നടന്നു. കുറച്ചകലെ ഒരു cactus ചെടി, വെള്ളമില്ലാത്ത മരുഭൂമിയില്‍, ചൂടിനെ അവഗണിച്ച് കണ്‍കുളിരുന്ന പച്ചയായി തല ഉയര്‍ത്തി നില്‍ക്കുന്നു. അവിടെ ചെന്ന് ഫോട്ടോ എടുക്കുന്ന നേരം ഒരു ബ്രസ്സിലിയന്‍ കുടുംബത്തിന് ഞങ്ങളുടെ കൂടെ നിന്ന് ഫോട്ടോ എടുക്കാന്‍ ആഗ്രഹം.

ഒരു ബ്രസ്സിലിയന്‍ കുടുംബമൊത്ത്

എല്ലാ കാറുകളും ഒരുമിച്ച് ക്യാമ്പിലേക്കുള്ള യാത്ര തുടര്‍ന്നു. അസ്തമയത്തിന് മുന്‍പ് ക്യാമ്പിലെത്തി. ഉണങ്ങിയ ഈന്തപനയിലകളെ കൊണ്ട് ചുറ്റും മറച്ച വിസ്താരമുള്ള ക്യാമ്പ്. പുറത്ത് സവാരിക്കായി അണിയിച്ചൊരുക്കിയ ഒട്ടകങ്ങള്‍, sand bikes.....തുടങ്ങിയവ .ഞങ്ങളും ഒട്ടകസവാരി നടത്തി.

ഒട്ടക സവാരി

ക്യാമ്പിന് പുറത്ത് sand bikes

ക്യാമ്പിന്റെ മുന്‍ വാതില്‍

കവാടവാതിലില്‍ അറബ് സ്റ്റൈലില്‍ അലങ്കരിച്ച പല തരം മണ്‍കൂജകള്‍,പാനപാത്രങ്ങള്‍...ക്യാമ്പിനുള്ളില്‍ താഴെ ഭംഗിയായി ഒരുക്കിയ മെത്തകള്‍. മദ്ധ്യത്തില്‍ പരവതാനി വിരിച്ച വലിയ സ്റ്റേജ്.

ക്യാബിനുള്ളിലെ സജ്ജീകരണങ്ങള്‍

Hookah bar

വിവിധ സുഗന്ധങ്ങളിലുള്ള [സ്ടോബെറി,പീച്ച്,ചോക്കളേറ്റ്.......] ഹുക്ക ഇവിടെ ലഭ്യമായിരുന്നു.

പേര് അറിയാത്ത പലതും

നേരമ്പോക്കിനായി-ഹുക്ക,ഹെന്നാ പെയ്റ്റിങ്ങ് ,ലോക്കല്‍ ഡ്രെസ്സില്‍ ഫോട്ടോഗ്രാഫി.. ..ഇങ്ങിനെ പലതും.ഒരു holiday village പോലെ തോന്നി.

എന്നെ ആകര്‍ഷിച്ചത് ഗ്ലാസ്സ് flower vaseനുള്ളില്‍ ചിത്രങ്ങള്‍ ഉണ്ടാക്കുന്ന കലയാണ്-പോളിത്തീന്‍ coneല്‍ വിവിധ വര്‍ണ്ണങ്ങളിലുള്ള പൂഴി മണല്‍ നിറച്ച് അനായാസം ആ കലാകാരന്‍ ഫ്ലവര്‍ വാസില്‍ ചിത്രങ്ങള്‍ സൃഷ്ടിച്ചു.അദ്ദേഹം ഒരു മലയാളിയാണെന്ന് തോന്നി.

മണല്‍ കൊണ്ട് ചിത്രങ്ങള്‍ സൃഷ്ടിക്കുന്ന കലാകാരന്‍

ഫ്ലവര്‍വാസിനുള്ളില്‍ മണല്‍ചിത്രങ്ങള്‍

നേരം ഇരുട്ടിയപ്പോള്‍ എല്ലാവരും ഇരിപ്പിടങ്ങളില്‍ സ്ഥാനം പിടിച്ചു. ഒരു കലാകാരന്‍ അവതരിപ്പിച്ച tanura dance [Egyptian folk dance] അഭിനന്ദനമര്‍ഹിക്കുന്നതായിരുന്നു. ഇമ്പമുള്ള പാട്ടിനൊപ്പം കറങ്ങി ,കത്തുന്ന ലൈറ്റുകള്‍ നിറഞ്ഞ വര്‍ണ്ണശബളമായ ഡ്രെസ്സിനുള്ളില്‍ നിന്ന് കുടകളും പൂക്കളും പുറത്തെടുക്കുന്ന അദ്ദേഹം ഒരു ഇന്ദ്രജാലക്കാരനെ ഓര്‍മ്മിപ്പിച്ചു.

Tanura Dance

അറബിക് പാട്ടിന്റെ താളത്തിനൊത്ത് ശരീരഭാഗങ്ങളിളക്കി ബെല്ലി ഡാന്‍സര്‍ നൃത്തമാടി. സദസ്സില്‍ നിന്ന് പലരും സ്റ്റേജില്‍ കയറി അവരെ അനുകരിച്ച് ചുവട് വെച്ചു.

Belly dance

അവിടെ ഒരുക്കിയിരുന്ന ബാര്‍ബെക്യൂ ഡിന്നര്‍ വളരെ വിഭവസമൃദ്ധമായിരുന്നു.hummus [കടല കൊണ്ടുള്ള ഒരു തരം ചട്ട്ണി ]കണ്ട് ഇത് എന്താണെന്ന് സംശയത്തോടെ നോക്കിയ ഞങ്ങളോട് അറബിവേഷധാരിയായി ഭക്ഷണം വിളമ്പുന്ന ആള്‍ മലയാളത്തില്‍! പറഞ്ഞു-“ഇത് കടല അരച്ചുണ്ടാക്കിയതാണ്”.അവിടെ പല തരം കബാബുകളും,സാലഡുകളും,മറ്റു പലയിനവിഭവങ്ങളും ഒരുക്കിയിരുന്നു.

വളരെ വ്യത്യസ്തമായ ഒരു അനുഭവമായിരുന്നു ഈ ഡെസ്സേര്‍ട്ട് സഫാരി. രാത്രി 10 മണിയോടെ ഞങ്ങള്‍ ഹോട്ടലില്‍ തിരിച്ചെത്തി.

പിറ്റേന്ന് വൈകുന്നേരം മടക്കയാത്രക്ക് തയ്യാറായി.

ഒരു Hongkong യാത്ര

2010-08-25T23:42:00.000-07:00

കനഡായില്‍ നിന്ന് ബോബെയിലേക്കുള്ള യാത്രക്കിടയില്‍ ഹോങ്ങ് കോങ്ങില്‍ ഒരു ഇടവേളയുണ്ട്.കനഡായില്‍ നിന്ന് തിരിച്ചു വരുന്ന സമയത്ത് അവിടെയിറങ്ങി ഹോങ്ങ് കോങ്ങ് കാണാന്‍ ഞങ്ങള്‍ തീരുമാനിച്ചു.ഏതാണ്ട് 12 മണിക്കൂര്‍ നീണ്ട വിമാനയാത്ര. ഹോട്ടലില്‍ നിന്നുള്ള കാര്‍ എയര്‍പോര്‍ട്ടില്‍ ഞങ്ങള്‍ക്കായി കാത്തുനില്‍പ്പുണ്ടായിരുന്നു.

ചൈനയുടെ തെക്കുവശത്തുള്ള ദ്വീപാണ് ഹോങ്ങ്കോങ്ങ്.1104സ്ക്വയര്‍ കിലോമീറ്റര്‍ മാത്രമേ വിസ്താരമുള്ളൂ എങ്കിലും ഇവിടെത്തെ ജനസംഖ്യ 7 മില്ല്യന്‍ ആ‍ണ്.1997വരെ ബ്രിട്ടീഷ് ഭരണത്തിലായിരുന്നു ഹോങ്ങ്കോങ്ങ്. 1997 ജുലൈ ഒന്നാം തിയ്യതി ഹോങ്ങ്കോങ്ങ് സ്വയംഭരണാ‍വകാശമുള്ള ഒരു ഭാഗമായി ചൈനയില്‍ ചേര്‍ന്നു. Hongkong Island, Kowloon Peninsula,New Territories[200 islands] അടങ്ങിയതാണ് ഇന്നത്തെ ഹോങ്ങ്കോങ്ങ്.

Causeway Bay [Hongkong Islandന്റെ വടക്കുഭാഗമാണ്] എന്ന സ്ഥലത്ത് L-Hotelലായിരുന്നു ഞങ്ങള്‍ റൂം ബുക്ക് ചെയ്തിരുന്നത് .40 നിലയുള്ള ഹോട്ടല്‍.32മത്തെ നിലയിലായിരുന്നു ഞങ്ങളുടെ റൂം.എല്ലാ കെട്ടിടങ്ങളും വീതി കുറഞ്ഞ് ഉയരത്തില്‍ കെട്ടിപ്പടുത്തിരിക്കുന്നു. വളരെ densely populated ആയതിനാല്‍ സ്ഥലക്കുറവാവാം പ്രധാന കാരണം.

International Convention Center ,Wanchai, Hongkong

mdsന്റെ ഓഫീസ്സ്മായി ബന്ധമുള്ള ഒരു കമ്പനി ഇവിടെയുണ്ട്.അവര്‍ ഉച്ചഭക്ഷണത്തിനായി ഞങ്ങളെ ക്ഷണിച്ചു.അദ്ദേഹം അവരുടെ പ്രിയപ്പെട്ട പല Cantonese വിഭവങ്ങളും ഓര്‍ഡര്‍ ചെയ്തു.സൂപ്പ്,ഫിഷ്,റൈസ്...ഫിഷിനെ ഒട്ടും ഉപദ്രവിക്കാതെ അപ്പാടെ പുഴുങ്ങി വെച്ച പോലെയുണ്ട്-ഞാന്‍ പ്രതീക്ഷിച്ചത് ഒന്നുമില്ലെങ്കിലും സൊയാസോസ്സും,ചിലി-വിനീഗറും ഇതിന്റെ അകമ്പടിയായി വരുമെന്നാണ്.ഇല്ല,അതൊന്നും കാന്റോനീസ്സ് ഭക്ഷണത്തില്‍ ചേര്‍ക്കില്ലെന്ന് അദ്ദേഹം അഭിമാനത്തോടെ പറഞ്ഞു. അന്ന് വൈകുന്നേരം അദ്ദേഹത്തിന്റെ കാറില്‍ ഞങ്ങളെ പട്ടണമെല്ലാം കാണിക്കുകയുണ്ടായി.

അംബരചുംബികളായ കെട്ടിടങ്ങളും,ഷോപ്പിങ്ങ് മോള്‍സ്സും, തിരക്കു പിടിച്ച് ഓടുന്ന ജനങ്ങളും നിറഞ്ഞ ഒരു മഹാനഗരമാണ് ഹോങ്ങ് കോങ്ങ് . Cantonese ആണ് ഇവിടത്തെ ഭാഷ .ഇംഗ്ലീഷ് പലര്‍ക്കും അറിയാം. ട്രാം,ട്രെയിന്‍,ഡബിള്‍ ഡെക്കര്‍ ബസ്സ്, ടേക്സി, ഫെറി.. തുടങ്ങിയ ട്രാന്‍സ്പോര്‍ട്ട് സൌകര്യങ്ങളുണ്ട്.പല സ്ഥലങ്ങളും കണ്ട് ,കുറച്ചു ഷോപ്പിങ്ങ് ചെയ്ത് രാത്രിയായപ്പോള്‍ ഹോട്ടലിലേക്ക് മടങ്ങി.ഹോട്ടലിനടുത്തുള്ള ഒരു സൂപ്പര്‍ മാര്‍ക്കറ്റില്‍ നിന്ന് കുറച്ചു ഫ്രൂട്ട്സും ബ്രെഡ്ഡും രാത്രിഭക്ഷണത്തിനായി വാങ്ങി. ഹോട്ടല്‍ ഡെസ്ക്കില്‍ നിന്ന് പിറ്റേ ദിവസ്സത്തേക്ക് ഒരു സിറ്റി ടൂര്‍ ബുക്ക് ചെയ്തു.

രാവിലെ പത്തുമണിയോടെ ഞങ്ങളെ ടൂറിന് കൊണ്ടുവാനായി മിനി ബസ്സ് എത്തി. കുറച്ചു വെള്ളക്കാരും,ഒന്ന് രണ്ട് ഇന്ത്യക്കാരും ബസ്സിലുണ്ട്.ബസ്സിലുള്ള ഗൈഡ് ടൂറിനെക്കുറിച്ച് ഒരു ചെറിയ മുഖവുര തന്നു.

ആദ്യമായി പോയത് Man Mo Templeല്‍ ആണ്. ഇത് വളരെ പുരാതനമായ ഒരു ചൈനീസ് ആരാധനാലയമാണ്. മാന്‍ മോ എന്നാല്‍ civil &military എന്നാ‍ണര്‍ത്ഥം.ഇവിടെ പ്രതിഷ്ടിച്ചിരിക്കുന്ന ദൈവങ്ങള്‍-God of literatureഉം,God of warഉം ആണ്.മന്ദിരത്തിന്റെ ഉള്ളില്‍ നിറയെ ബെല്‍ രൂപത്തില്‍ ഉള്ള ചന്ദനത്തിരിചുറ്റുകള്‍ തൂക്കിയിട്ടിട്ടുണ്ട്.ഈ തിരികളില്‍ നിന്നുയരുന്ന സുഗന്ധം ആത്മാവുകളെ സന്തുഷ്ടരാക്കുമത്രെ.

Man Mo Temple entrance

Man Mo Temple-ചന്തനതിരിചുറ്റുകള്‍

Man Mo temple

അടുത്ത യാത്ര വിക്ടോറിയ പീക്കിലേക്കാണ്.ഹോങ്ങ്കോങ്ങിന്റെ central districtല്‍ നിന്ന് ട്രാമില്‍ ആണ് ഇവിടേയ്ക്ക് യാത്ര. Austin എന്ന മലമുകളിലെ ഈ പീക്ക് 1181അടി ഉയരത്തിലാണ്.കുത്തനെ സഞ്ചരിക്കുന്ന ട്രാം യാത്ര ഒരു അനുഭവമായിരുന്നു.പീക്ക് ടവ്വറില്‍ നിന്നുള്ള ഹാര്‍ബര്‍ വ്യൂ വളരെ മനോഹരമാണ്.പീക്കില്‍ Madame Tussuad's Wax museum, രണ്ടു വലിയ ഷോപ്പിങ്ങ് സെന്ററുകള്‍, 4 റെസ്റ്റോറെന്റുകള്‍ തുടങ്ങിയവ ഉണ്ട്. അവിടെയുള്ള കോഫീ ഷോപ്പില്‍ നിന്ന് ലഘുഭക്ഷണം കഴിച്ച് ഞങ്ങള്‍ താഴേക്കുള്ള ട്രാമില്‍ കയറി.

Tram to Victoria peak

View from Victoria peak

Aberdeen എന്ന ഫ്ലോട്ടിങ്ങ് വില്ലേജിലേക്കാണ് അടുത്ത യാത്ര.ഇവിടേക്ക് യാത്ര ബോട്ടിലാണ്.ബോട്ടില്‍ ‍[tankas] താമസ്സിക്കുന്ന ഒരു ഫിഷര്‍മെന്‍ കോളണി ആണിത്. ഏതാണ്ട് 600 മീന്‍പിടുത്തക്കാരുടെ കുടുംബങ്ങള്‍ ബോട്ടില്‍ ജീവിക്കുന്നുണ്ടവിടെ. പോകുന്ന വഴിയില്‍ ഉള്ള ഫ്ലോട്ടിങ്ങ് ഹോട്ടല്‍ അതീവ സുന്ദരമായിരുന്നു.Jumbo എന്ന ബോട്ട് രൂപത്തിലുള്ള ഈ ഫ്ലോട്ടിങ്ങ് ഹോട്ടല്‍ കാണേണ്ട ഒരു കാഴ്ച തന്നെയാണ്.

Aberdeen fishing villageലേയ്ക്ക് ബോട്ട് യാത്ര

JUMBO- floating restaurant

പിന്നീട് പോയത് Stanley market ലേക്കാണ്.ധാരാളം കടകളുള്ള ഒരു ഷോപ്പിങ്ങ് സെന്റര്‍ ആണിത്.എനിക്ക് ബോബെയിലെ ഗാന്ധി മാര്‍ക്കറ്റ് പോലെ തോന്നി. ഞാന്‍ Jade stoneല്‍ ഉണ്ടാക്കിയ ഒരു laughing Buddha യെ വാങ്ങി.സന്ധ്യയായതിനാല്‍ കടകളൊക്കെ അടക്കാന്‍ തൂടങ്ങിയിരുന്നു.

അവിടെ നിന്ന് star ferry കയറി Kowloon എന്ന സ്ഥലത്തെത്തി. ഇവിടെ വിക്ടോറിയ ഹാര്‍ബര്‍ ലൈനില്‍ symphony of lights എന്ന പേരില്‍ ടൂറിസ്റ്റുകള്‍ക്കായി ഒരു ലൈറ്റ് & സൌണ്ട് ഷോ നടത്തുന്നുണ്ട്-എന്നും രാത്രി 8മണിക്ക്. 40 ബില്‍ഡിങ്ങുകള്‍ പങ്കെടുക്കുന്ന ഒരു synchronized പ്രോഗ്രാം ആണിത്.Tsim Sha Tsui യിലുള്ള കടലോരത്ത് നിന്നാല്‍ ഇത് ഭംഗിയായി കാണാം. ഇത് കാണുവാനായി ജനങ്ങള്‍ അവിടെ തടിച്ചു കൂടിയിട്ടുണ്ട്. 20 മിനുട്ട് മ്യൂസ്സിക്കിനൊപ്പം നൃത്തം വെക്കുന്ന ഈ ലേസര്‍ ഷോ ഗംഭീരമായിരുന്നു.Worlds largest permanent light & sound show എന്ന Guinness World record ഉണ്ടിതിന്.

Bruce Leeയുടെ പ്രതിമയ്ക്കൊപ്പം Tsim Sha Tsui water frontല്‍

symphony of lights

ഷോ കഴിഞ്ഞതിനു ശേഷം അവിടെ ഹാര്‍ബര്‍ ലൈനെ ഫേസ് ചെയ്യുന്ന ഹോട്ടലില്‍ ഞങ്ങള്‍ക്ക് രാത്രിഭക്ഷണവും ഒരുക്കിയിരുന്നു.ഒരു 5 കോഴ്സ് ഡിന്നര്‍ തന്നെ.അവിടെ വെച്ച് ന്യൂസിലാന്റില്‍ നിന്ന് വന്ന ഒരു ഇന്ത്യന്‍ കുടുംബത്തെ പരിചയപ്പെട്ടു. രാത്രി 10മണിയോടെ ഞങ്ങളെ ഹോട്ടലില്‍ ഡ്രോപ്പ് ചെയ്തു.വളരെ നന്നായി ഓര്‍ഗനൈസ് ചെയ്ത ഒരു worth ആയ വണ്‍ ഡെ ടൂര്‍ ആയിരുന്നു അത്.

ഒരു വഴിയോര കാഴ്ച്ച-Disneylandന്റെ കവാടത്തിനടുത്ത്

പിറ്റേന്ന് ഉച്ചക്കാണ് മടക്കയാത്ര.ബ്രേക്ക്ഫാസ്റ്റിനു ശേഷം ടാക്സിയെടുത്ത് ഞങ്ങള്‍ time squareല്‍ ഉള്ള ഷൊപ്പിങ്ങ് മാളില്‍ പോയി.എല്ലാം ബ്രാന്റട് സാധനങ്ങള്‍. അത് കൊണ്ട് നല്ല വിലയും.ടാക്സിക്കാരന് ഇംഗ്ലീഷ് അറിയാത്തതിനാല്‍ ഞങ്ങള്‍ കുറെ വട്ടം കറങ്ങി.

Time Square-Hongkong

Disneyland ലേക്കുള്ള വഴി

ഹോങ്ങ്കോങ്ങ്-Disney landന്റെ കവാടം വരെ പോകാനേ നേരം കിട്ടിയുള്ളൂ. അത് പോലെ അവിടെയുള്ള പ്രശസ്തമായ ocean-parkഉം കാണാന്‍ സമയക്കുറവുകൊണ്ട് ഞങ്ങള്‍ക്കായില്ല. aquarium,zoo,rides,gondola...തുടങ്ങിയവയുള്ള വളരെ വലിയ ഒരു theme park ആണിത്. ഒന്നു രണ്ടു ദിവസ്സമെങ്കിലും വേണം അതിനുള്ളില്‍ ഒന്നു ചുറ്റിക്കറങ്ങാ‍ന്‍.

ഉച്ചഭക്ഷണത്തിന് ശേഷം ഞങ്ങള്‍ എയര്‍പോര്‍ട്ടിലേയ്ക്ക് തിരിച്ചു.എയര്‍ പോര്‍ട്ട് കടലോരത്തായിരുന്നതിനാല്‍ പ്ലെയിന്‍ ടെയ്ക്ക് ഓഫ് ചെയ്യുമ്പോളുള്ള കാഴ്ച്ച മനോഹരമായിരുന്നു.ക്ഷീണം മൂലം പ്ലേയ്നില്‍ കയറിയതും ഞാന്‍ ഉറങ്ങിപ്പോയി. 7മണിക്കൂറിലധികമെടുത്തു ബോബെയിലെത്താന്‍. നാട്ടിലെത്താന്‍ എനിക്ക് തിടുക്കമായി.

കനേഡിയന്‍ മലനിരകളിലൂടെ ഒരു വിനോദയാത്ര-മൂന്ന്

2010-07-29T22:11:00.000-07:00

നീല തടാകങ്ങള്‍

ഇന്ന് യാത്ര നീലതടാകങ്ങളിലേക്കാണ്.കനഡായില്‍ ,ആല്‍ബെര്‍ട്ടാ പ്രോവിന്‍സ്സിലെ മലമുകളിലുള്ള തടാകങ്ങള്‍. ഇതെല്ലാം glacier fed lakes ആണ്. ഗ്ലേഷിയറില്‍ നിന്ന് വേനല്‍ക്കാലത്ത് ഉരുകിയൊഴുകുന്ന വെള്ളം ഈ തടാകങ്ങളെ നിറക്കുന്നു. ആഗസ്റ്റ് മാസമായതിനാല്‍,വൃക്ഷങ്ങളെല്ലാം പച്ചപിടിച്ച് മലനിരകളുടെ മനോഹാരിത വര്‍ദ്ധിപ്പിച്ചിട്ടുണ്ട്.

പോകുന്ന വഴിയില്‍

ഇവിടെയുള്ള തടാകങ്ങളിലെ ജലത്തിന് turquoise [മരതകപച്ച കലര്‍ന്ന നീല] നിറമാണ്. ഗ്ലേഷിയറില്‍ മഞ്ഞുരുകി, പാറക്കല്ലുകളെ ഉരസ്സി താഴേക്ക് ഒഴുകുമ്പോള്‍, വെള്ളത്തിനൊടൊപ്പം rock flour കൂടി തടാകത്തിലെത്തുന്നു. ഈ പാറപൊടികള്‍ തങ്ങിനില്‍ക്കുന്ന വെള്ളത്തില്‍ refraction of light മൂലം വെള്ളത്തിന്റെ നിറം, പച്ച-നീലയായി മാറുന്നു.

Lake Minnewanka

ആള്‍ബെര്‍ട്ടായിലെ ബാന്‍ഫ് നാഷനല്‍ പാര്‍ക്കിന്റെ കിഴക്ക് വശത്തായി,5000അടി ഉയരത്തില്‍ സ്ഥിതി ചെയ്യുന്ന ഒരു ഗ്ലേഷിയര്‍ ലെയ്ക്കാണ് Lake Minnewanka. 28കി.മി നീളമുള്ള ഈ തടാകം, കനേഡിയന്‍ റോക്കീസ്സിലെ ഏറ്റവും നീണ്ട തടാകമാണ് .water of spirits എന്ന് വിശേഷിപ്പിക്കുന്ന ഈ തടാകത്തിന് ചുറ്റുമുള്ള മലയോരങ്ങളില്‍ elk,mule deer,mountain sheep,bear തുടങ്ങിയ വന്യമൃഗങ്ങളെ കാണാമത്രെ.തടാകത്തിന്റെ തീരത്ത് പാറകള്‍ക്കിടയില്‍ ജീവിക്കുന്ന ഒരു തരം അണ്ണാനുകള്‍ കൌതുകമുളവാക്കി. തടാകത്തിന്റെ പടിഞ്ഞാറു വശത്തായി ഹൈഡ്രോ-ഇലക്ട്രിക് വൈദ്ധ്യുതി ഉല്‍പ്പാദിപ്പിക്കുന്ന ഒരു ഡാം ഉണ്ട്.

ground squirrel

boating in Lake Minnewanka

ഹൈക്കിങ്ങും,ഫിഷിങ്ങും,ബോട്ടിങ്ങുമാണ് ഇവിടെത്തെ പ്രധാന വിനോദം. ബാന്‍ഫ് നാഷനല്‍ പാര്‍ക്കിലെ മോട്ടോര്‍ ബോട്ട് അനുവദിച്ച ഏക തടാകമാണിത്. ഞങ്ങള്‍ ഒരു ബോട്ട് വാടകക്കെടുത്ത് അരമണിക്കൂറോളം തടാകത്തില്‍ കറങ്ങി. മിന്നെവാങ്കെ തടാകത്തിന് ചുറ്റും കോണിഫെറസ്സ് മരങ്ങല്‍ നിറഞ്ഞ മലനിരകള്‍ ഹരിതമനോഹരമാണ്. തടാകത്തിലെ വെള്ളത്തിന് തുരിശ്ശിന്റെ [കോപ്പര്‍ സള്‍ഫേറ്റിന്റെ]നിറം. ബോട്ട് യാത്ര ഞങ്ങളെല്ലാം നന്നായി ആസ്വദിച്ചു.

20 dollar peaks-Moraine Lake

ഇവിടേനിന്ന് 54കി.മി യാത്ര ചെയ്ത് ഞങ്ങള്‍ Moraine lakeല്‍ എത്തി. ഈ ലെയ്ക്കിന്റെ ഭംഗി വര്‍ണ്ണിക്കാന്‍ എനിക്കു വാക്കുകളില്ല. ഈ തടാകം 6183അടി ഉയരത്തില്‍,valley of ten peaksല്‍ സ്ഥിതി ചെയ്യുന്നു. പത്ത് മൌണ്ടന്‍ പീക്കുകള്‍, മൊറൈന്‍ ലെയ്ക്കിന്റെ മുന്നില്‍ നിന്നാല്‍ കാണാം.

Moraine Lake

1969ലും,1979ലും പുറത്തിറക്കിയ കനേഡിയന്‍ '20 ഡോളര്‍' നോട്ടില്‍ ഇതിന്റെ ചിത്രമുള്ളതിനാല്‍ ഈ പീക്കുകളെ ‘20 ഡോളര്‍ പീക്സ്’’ എന്ന് വിളിക്കപ്പെടുന്നു. ഈ ലെയ്ക്കിന്റെ ചിത്രം google blackberrypearl, windows7[കനഡാ സീരീസ്സ്] തുടങ്ങിയതിന്റെ ബേക്ക്ഗ്രൌണ്ട് ആണ് .സുന്ദരമായ നിറവും, മനോഹരമായ ചുറ്റുപാടും ഇതിനെ ചിത്രകാരന്മാരുടെ പ്രിയപ്പെട്ട തടാകമാക്കുന്നു.

ജൂലൈ മാസാവസാനത്തില്‍ salmon spawning seasonനില്‍ ഇവിടെ കൂട്ടങ്ങളായി grizzly bear [ബ്രൌണ്‍ നിറത്തിലുള്ള കരടികള്‍] നെ കാണാമത്രെ. ഈ സമയത്ത് ആയിരക്കണക്കിന് സാല്‍മന്‍ മത്സ്യങ്ങള്‍ മുട്ടയിടാനായി കടലില്‍ നിന്ന് നദിയിലേക്കും,തടാകങ്ങളിലേക്കും വരുമത്രെ. അതിനാല്‍ ഈ സമയം ഗ്രിസ്ലി കരടികള്‍ക്ക് ഓണക്കാലമാണ്. ഇതൊക്കെ ഭക്ഷിച്ച് കുടുംബവും കുട്ടികളും ഒക്കെയായി ഇവര്‍ തടാകക്കരയില്‍ താമസ്സിക്കുമത്രെ!

grizzly bear

Rock pile hiking-Moraine Lake

കാനോയിങ്ങ്,ഹൈക്കിങ്ങ് തുടങ്ങിയതിനായി വേനല്‍ക്കാലത്ത് ധാരാളം വിനോദസഞ്ചാരികള്‍ ഇവിടെയെത്താറുണ്ട്. ഒരുവശത്തുള്ള പാറക്കല്ലുകള്‍ കൂട്ടിയ ഹൈക്കിങ്ങ് ട്രേക്കിലൂടെ ഞങ്ങളും കുറച്ചു കയറി.

മൊറൈന്‍ ലെയ്ക്കില്‍ നിന്ന് 14കി.മി.ഡ്രൈവ് ചെയ്താല്‍, Lake Louiseല്‍ എത്താം.‘ ലൂയിസ്സ് കാരൊലീന്‍ ആര്‍ബെര്‍ട്ടാ’ എന്ന രാജകുമാരിയുടെ [1848-1939] പേരാണ് ഈ ലെയ്ക്കിനും,ടൌണിനും കൊടുത്തിരിക്കുന്നത്. 1878തൊട്ട് 1883വരെ ഗവര്‍ണ്ണര്‍ ജനറലായിരുന്ന sir john camphellന്റേയും,ഭാര്യ Queen Victoriaയുടേയും നാലാമത്തെ മകളായിരുന്നു ഈ പ്രിന്‍സെസ്സ്. ഈ തടാകത്തിന്റെ ഒരു വശത്ത് വിക്ടോറിയ ഗ്ലേഷിയര്‍ ആണ്. ഈ തടാകത്തെക്കുറിച്ച് അതിമനോഹരമെന്നല്ലാതെ ഒരു വിശേഷണവും എനിക്ക് നല്‍കാനില്ല. മറ്റു തടാകങ്ങളിലെ പോലെ റാഫ്റ്റിങ്ങ്,കാനോയിങ്ങ്,ഹൈക്കിങ്ങ്...തുടങ്ങിയതാണ് ഇവിടെ സഞ്ചാരികളെ ആകര്‍ഷിക്കുന്നത്.

Lake Louise

മടക്കയാത്രയില്‍ ഞാന്‍ എനിക്ക് കാണാന്‍ കഴിഞ്ഞ ഈ വിസ്മയക്കാഴ്ച്ചകളെല്ലാം ഒന്നൊന്നായി അയവിറക്കി.

കനേഡിയന്‍ മലനിരകളിലൂടെ ഒരു വിനോദയാത്ര-രണ്ട്

2010-06-12T22:08:00.000-07:00

ബാന്‍ഫ് ഗൊണ്ടോള

ഇന്ന് ആഗസ്റ്റ് 25th 2007.യാത്ര Banff Gondola[cable car]യിലേക്കാണ്.കാള്‍ഗരി[കാനഡാ]യിലെ കൂട്ടുകാരുടെ വീട്ടില്‍ നിന്ന് 124 കി.മി.ഡ്രൈവ് ചെയ്ത് ആല്‍ബെര്‍ട്ടാ പ്രോവിന്‍സ്സിലെ ബാന്‍ഫ് എന്ന ടൌണില്‍ എത്തി.കാള്‍ഗരി വിസ്താരത്തില്‍ കനഡായിലെ രണ്ടാമത്തെ വലിയ ടൌണ്‍ ആണ്.

ബാന്‍ഫ് ടൌണ്‍, ‍ ബാന്‍ഫ് നാഷണല്‍പാര്‍ക്കിന്റെ മദ്ധ്യത്തിലാണ്. ആഗസ്റ്റ്-സെപതംബെര്‍ മാസങ്ങളില്‍ ഇവിടെത്തെ താപനില 7-22ഡിഗ്രി സെന്റിഗ്രേഡ് ആണ്.ഏതാണ്ട് ഉച്ചസമയത്ത് ഞങ്ങള്‍ ഗൊണ്ടോളാ സ്റ്റേഷനിലെത്തി.നല്ല കാലാവസ്ഥ കാരണമാവാം വിനോദ സഞ്ചാരികളുടെ തിരക്കാണ്.നീണ്ട ക്യൂവില്‍ ഞങ്ങളും ചേര്‍ന്ന് ടിക്കറ്റ് എടുത്തു.

on the way

ഗൊണ്ടോളാ, ഗ്ലാസ്സ് കൊണ്ടുണ്ടാക്കിയ ഒരു പേടകം പോലെയാണ്. ഇതില്‍ 4 യാത്രക്കാര്‍ക്കിരിക്കാം.ഇത് ഒരു കേബിളില്‍ കൂടി താഴെനിന്ന് യാത്രക്കാരെ മിനിറ്റുകളില്‍ മല മുകളിലത്തിക്കും.ബാന്‍ഫ് ഗൊണ്ടോളാ സള്‍ഫര്‍ മൌണ്ടന്റെ അടിവാരത്തിലാണ്.ഈ സല്‍ഫര്‍ മലയുടെ താഴ്വരയില്‍ ചൂടുവെള്ള തടാകങ്ങളുണ്ട്.ഗൊണ്ടോളയില്‍ കയറുമ്പോള്‍ എനിക്ക് അല്പം ഭയമൊക്കെ തോന്നി.താഴേക്കുള്ള കാഴ്ച വളരെ മനോഹരമായിരുന്നു. തടാകങ്ങളുടേയും, മരങ്ങള്‍ നിറഞ്ഞ മലകളുടേയും മുകളിലൂടെ ഒഴുകി 8മിനിറ്റിനുള്ളില്‍ ഞങ്ങള്‍ 7486അടി ഉയരമുള്ള സള്‍ഫര്‍ മൌണ്ടന്റെ മുകളിലെത്തി.

പിന്നില്‍ sulphur mountainനും Gondola cableഉം

gondola station

gondolaക്കുള്ളില്‍

ഗൊണ്ടോളയില്‍ നിന്നുള്ള കാഴ്ച്ച

സള്‍ഫര്‍ മലയുടെ മുകളില്‍ ഒരു വലിയ കോഫീഷോപ്പും,ഗിഫ്റ്റ് ഷോപ്പും ഉണ്ട്.അവിടെനിന്ന് 1കി.മി നീണ്ട board walk track [മരപലകകൊണ്ട് ഉണ്ടാക്കിയത്] ലൂടെ വിനോദസഞ്ചാരികള്‍ക്ക് Sanson's peakലേക്ക് നടന്ന് കയറാം.Norman Sansonഎന്ന കാലാവസ്ഥ നിരീക്ഷകന്‍ 30വര്‍ഷങ്ങളോളം തുടര്‍ച്ചയായി എല്ലാ ആഴ്ച്ചയും കാലാവസ്ഥ അറിയാന്‍ ഈ മലമുകളില്‍ കയറിയിരുന്നത്രെ. അതിനാല്‍ അദ്ദേഹത്തിന്റെ ഓര്‍മ്മക്കായാണ് ഈ peakനാമകരണം ചെയ്തത്.തണുപ്പ് കാരണം ഞങ്ങള്‍ ഓടികയറാന്‍ തുടങ്ങി.

സള്‍ഫര്‍മലയുടെ മുകളിലെ Coffee shop

boardwalk

പീക്കില്‍ ആ കാലത്ത് സ്ഥാപിച്ചിട്ടുള്ള ഒരു meteorological stationഇപ്പോഴും ഉണ്ട്-കല്ലു കൊണ്ട് കെട്ടിയ ഒരു ചെറിയ മുറി-പക്ഷെ അതിപ്പോള്‍ പ്രവര്‍ത്തനരഹിതമാണ്. പീക്കില്‍ നിന്ന് birds eye viewerല്‍ കൂടി നോക്കിയാല്‍ 6മലനിരകളെ കാണാം.പിന്നെ ബാന്‍ഫ് ടൌണും,തടാകങ്ങളും.360ഡിഗ്രി ചുറ്റിലും അവിടേനിന്നുള്ള വ്യൂ അതിമനോഹരവും അവര്‍ണ്ണനീയവുമാണ്. മരം കോച്ചുന്ന തണുപ്പില്‍ ഫോട്ടോഗ്രാഫിയെല്ലാം ഞാന്‍ മറന്നു. അതിനാല്‍ പലതും ക്ലിക്ക് ചെയ്യാന്‍ വിട്ടുപോയി. പീക്കില്‍ നിന്ന് താഴേക്കിറങ്ങുമ്പോള്‍ മലമുകളില്‍ കാണുന്ന ഒരു തരം ചെമ്മരിയാടുകളെ[big horn sheep] കാണുകയുണ്ടായി.

birds eye view-Sanson's Peak

ഗൊണ്ടോളയില്‍ താഴേക്കിറങ്ങാന്‍ 5മിനിട്ടേ എടുത്തുള്ളൂ.ഈ മലമുകളിലേക്ക് ഹൈക്കിങ്ങ് ട്രാക്കിലൂടെ പലരും കയറി ഇറങ്ങുന്നത് കാണാന്‍ കഴിഞ്ഞു.

ഇത്തരം അപൂര്‍വമായ കാഴ്ച്ചകള്‍ കാണാന്‍ ഒരുക്കങ്ങള്‍ചെയ്ത ഞങ്ങളുടെ കൂട്ടുകാരെ നന്ദിയോടെ ഓര്‍ക്കുന്നു.